దిల్లీలో స్కూటీపై వెళ్తున్న అంజలీ సింగ్ను కారుతో ఢీకొట్టి 12 కిలోమీటర్లు ఈడ్చుకెళ్లిన తరహా ఘటన గుజరాత్లోని సూరత్లో జరిగింది. మోటార్ సైకిల్పై వెళ్తున్న సాగర్ పాటిల్, అతడి భార్యను వేగంగా వచ్చిన ఓ కారు ఢీకొంది. ఈ ఘటనలో పాటిల్ మృతి చెందగా, తీవ్ర గాయాలపాలైన అతడి భార్య ఆసుపత్రిలో చికిత్స పొందుతుంది. కేసు నమోదు చేసుకున్న పోలీసులు దర్యాప్తు చేపట్టారు. అసలేం జరిగిందంటే?..
సమాచారం ప్రకారం..
కడోదర - బర్డోలి రహదారిపై జనవరి 18 రాత్రి సాగర్ పాటిల్, అతడి భార్య అశ్వినీ బెన్ బైక్పై వెళ్తున్నారు. అదే సమయంలో వేగంగా వెళ్తున్న ఓ కారు వీరిని ఢీకొట్టింది. ఈ ఘటన అనంతరం డ్రైవర్ కారును ఆపకుండా వెళ్లిపోయాడు. ఈ ఘటనలో పాటిల్ వెనుక సీట్లో కూర్చున్న అతడి భార్య బైక్ పైనుంచి కిందికి పడిపోయింది. వెంటనే స్థానికులు ఆమెను హుటాహుటిన ఆసుపత్రికి తరలించారు.
అయితే పాటిల్ మృతదేహాం మాత్రం కనిపించలేదు. ఈ ఘటనపై సమాచారం అందుకున్న పోలీసులు ఘటనా స్థలానికి చేరుకుని దర్యాప్తు చేపట్టారు. ఘటన జరిగిన కొన్ని గంటల తర్వాత ప్రమాదం జరిగిన ప్రదేశానికి 12 కిలోమీటర్ల దూరంలో ఓ వ్యక్తి మృతదేహం లభ్యమయింది. దీనిని పాటిల్ మృతదేహంగా గుర్తించారు పోలీసులు. వాహనం కింద ఇరుక్కుపోయిన అతడిని నిందితుడు రోడ్డుపై ఈడ్చుకుని వెళ్లటం వల్ల ప్రాణాలు కోల్పోయాడని పోలీసులు తెలిపారు. ఈ ఘటనలో నిందితుడిని త్వరలో పట్టుకుంటామని పోలీసులు అన్నారు. ఈ ప్రమాదానికి సంబంధిన వీడియోను ఓ వ్యక్తి తన ఫోన్లో రికార్డు చేసి పోలీసులకు అందించాడు.
ట్రాఫిక్ పోలీస్ను ఢీకొట్టి.. ఈడ్చుకుని వెళ్లిన వ్యక్తి..
మరోవైపు.. చెక్ పాయింట్ వద్ద సిగ్నల్స్ను పట్టించుకోకుండా వెళ్తున్న మినీ ట్రక్కును ఆపమని చెప్పిన ట్రాఫిక్ పోలీస్ను ఓ వ్యక్తి తన ట్రక్కుతో ఢీ కొట్టాడు. ఈ విషాదకర ఘటన పంజాబ్లో వెలుగులోకి వచ్చింది. ఈ ఘటనలో ట్రాఫిక్ పోలీసు అధికారి మృతి చెందారు. ఈ ఘటనపై కేసు నమోదు చేసుకుని దర్యాప్తు చర్యలు చేపట్టారు. అసలేం జరిగిందంటే?..
పోలీసులు తెలిపిన సమాచారం ప్రకారం
పంజాబ్ కపుర్తలాలో అసిస్టెంట్ సబ్ ఇన్స్పెక్టర్ మల్కియాత్ మంగళవారం మధ్యాహ్నం డీసీ చెక్పాయింట్ దగ్గర తనిఖీ చేయటానికి ట్రక్కును ఆపారు. అయితే అతడు వాహనాన్ని ఆపకుండా ట్రాఫిక్ పోలీస్ను ఢీకొట్టి.. కొంతదూరం ఈడ్చుకుని వెళ్లాడు. దీంతో తీవ్ర గాయాలపాలైన పోలీస్ను స్థానిక సివిల్ ఆస్పత్రికి తరలించారు. హాస్పిటల్లో చికిత్స పొందుతూ పోలీసు అధికారి మృతి చెందారు. నిందితుడిని పట్టుకునేందుకు అన్ని జిల్లాల పోలీసులను అప్రమత్తం చేశామని సూపరిండెంట్ ఆఫ్ పోలీస్ హర్విందర్ సింగ్ తెలిపారు.
