కరోనా టీకా పొందగలిగే దారి తెలియక మధ్య తరగతి ప్రజలు విసుగెత్తిపోతున్నారు. టీకా తయారైన కొత్తలో దానిని తీసుకునేందుకు పెద్దగా ఎవరూ ముందుకు రాకపోయినా ఇప్పుడు అవగాహన పెరగడం వల్ల ఎగబడుతున్నారు. అటు ప్రభుత్వ ఆసుపత్రిలో గానీ, ఇటు ప్రైవేటు రంగంలో గానీ ఇవి దొరక్క వారంతా నిట్టూర్పు విడుస్తున్నారు. దేశంలో మధ్య తరగతి ప్రజలు 30-35 కోట్ల మంది ఉంటారని ఒక అంచనా. కొత్త కొత్త మార్పులతో చెలరేగిపోతున్న వైరస్ కారణంగా రోజుకు రమారమి 4 లక్షల కొత్త కేసులు వెలుగు చూస్తుండడం, వేల సంఖ్యలో బాధితులు ప్రాణాలు కోల్పోతున్న నేపథ్యంలో దేశవ్యాప్తంగా కరోనా వ్యాక్సిన్లకు డిమాండ్ గణనీయంగా పెరిగిపోయింది. సాంకేతికతపై అవగాహన ఉన్న వర్గాలు కూడా టీకాలకు స్లాట్లు బుక్ చేసుకోలేక, నేరుగా ఆసుపత్రులకు వెళ్తే పని పూర్తయ్యే దారిలేక అల్లాడిపోతున్నాయి.
వయో వృద్ధుల కోసం మార్చి 1 నుంచి, 45 ఏళ్లు పైబడినవారికి ఏప్రిల్ 1 నుంచి వ్యాక్సిన్లు వేయడం ప్రారంభించినప్పుడు ఆ అవకాశాన్ని మొదట్లోనే ఉపయోగించు కోనివారు ఇప్పుడు విఫల యత్నాలు చేయాల్సి వస్తోంది.
ఇటీవల గురుగ్రామ్లో నడివయస్సు జంట ఒకటి కొవిడ్ సహాయ వాణి (1075) ద్వారా సమాచారం తెలుసుకుని, ఎక్కడా కరోనా బారిన పడకూడదనే జాగ్రత్తతో పీపీఈ కిట్ ధరించి మరీ వ్యాక్సిన్ కోసం ప్రభుత్వ ఆసుపత్రికి వచ్చింది. పోర్టల్ ద్వారా ముందుగా బుక్ చేసుకుంటేనే వ్యాక్సిన్ ఇస్తామంటూ అధికారులు వారిని తిప్పి పంపించారు. ఇలాంటి అనేక దృష్టాంతాలు 'ఈటీవీ భారత్' దృష్టికి వచ్చాయి.
అన్నిచోట్లా నో స్టాక్
'ఈటీవీ భారత్' బృందం దిల్లీలో వేర్వేరు ప్రాంతాల్లో ఐదు మధ్యతరహా, పెద్ద ప్రైవేటు ఆసుపత్రుల్లో పరిస్థితిని స్వయంగా పరిశీలించింది. గత నెలాఖరు వరకు వీటన్నిటిలో వ్యాక్సిన్లు దొరికేవి. ఇప్పుడు మాత్రం వీటివద్ద మొదటి డోసు, రెండో డోసులలో ఏదీ అందుబాటులో లేదు. ఆసుపత్రులు బయటే 'నో స్టాక్ బోర్డులు దర్శనమిస్తున్నాయి.
కొవిన్ పోర్టల్లో సమాచారం ప్రకారం దిల్లీలో రెండు ప్రైవేటు ఆసుపత్రుల్లోనే డబ్బు చెల్లించి పొందగలిగే కరోనా వ్యాక్సిన్లు ఉన్నాయి. గురుగ్రామ్లో మాత్రం ప్రభుత్వ ఆరోగ్య కేంద్రాల్లో ఉచిత వ్యాక్సిన్లు లభ్యమవుతున్నాయి. నోయిడాలో మూడు ప్రైవేటు ఆస్పత్రుల్లో డబ్బు చెల్లించి వ్యాక్సిన్లు పొందడానికి వీలుంది.
ముంబయిలో అనేక ఆసుపత్రులు డబ్బు కట్టించుకుని టీకాలు ఇస్తున్నా ప్రస్తుతం స్లాట్లు అందుబాటులో లేవు. బెంగళూరులోనూ ఇదే పరిస్థితి. చెన్నై ప్రైవేటు ఆసుపత్రుల్లో మాత్రం స్లాట్లు ఉన్నాయి.
రోజుకు 18-20 లక్షల పరీక్షలు
భారత్లో సరాసరిన రోజుకు 18-20 లక్షల కౌవిడ్ 19 నిర్ధరణ పరీక్షలను నిర్వహిస్తున్నట్లు ఐసీఎంఆర్ డైరెక్టర్ జనరల్ బలరామ్ భార్గవ తెలిపారు. ల్యాబ్ సిబ్బంది కూడా ఇన్ఫెక్షన్ల బారినపడినప్పటికీ పరీక్షలను తగ్గించడం లేదన్నారు.
వ్యాక్సిన్ల కోసం గ్లోబల్ టెండర్ల బాటలో రాష్ట్రాలు
కావిడ్ 19 టీకాల కొరత నివారణకు ఇప్పటికే పలు రాష్ట్రాలు గ్లోబల్ టెండర్లను ఆహ్వానిస్తుండగా.. మంగళవారం దిల్లీ, కర్ణాటక, ఆంధ్రప్రదేశ్, తెలంగాణా రాష్ట్రాలు కూడా ఈ జాబితాలో చేరాయి. దేశీయంగా టీకాల సరఫరా తగినంత లేకపోవడం వల్ల రాష్ట్రాలు గ్లోబల్ టెండర్లకు వెళ్లక తప్పడం లేదు. వివిధ రాష్ట్రాలు, కేంద్ర పాలిత ప్రాంతాలకు ఇప్పటిదాకా 18 కోట్లకు పైగా వ్యాక్సిన్ దోసులు ఉచితంగా సరఫరా చేసినట్టు కేంద్రం చెబుతుండగా.. ఆయా రాష్ట్రాలు, యూటీల నుంచి డిమాండు రోజురోజుకూ పెరుగుతూనే ఉంది. ఉత్తర్ ప్రదేశ్, మహారాష్ట్ర, ఒడిశా ఇప్పటికే గ్లోబల్ టెండర్లకు వెళ్లాయి. యూపీ అధికారులు అంతర్జాతీయ స్పుత్నిక్ 'బి' మొడెర్నా, జాన్సన్ అండ్ జాన్సన్ వ్యాక్సిన్లు భారీ మొత్తంలో నేరుగా సేకరించనున్నట్లు మంగళవారం వెల్లడించారు. 18-14 వయసు వారి కోసమని తమకు అందుబాటులో ఉన్న మూడు లక్షల కోవాక్సిన్ డోసులను 45 ఏళ్లు పైబడ్డ వారికి రెండో డోసు ఇచ్చేందుకు మళ్లిస్తామని మహారాష్ట్ర ప్రకటించింది.
ఇవీ చదవండి:
