అభం శుభం తెలియని ఓ పసికందును డబ్బాలో పెట్టి గంగా నదిలో వదిలారు ఆమె తల్లిదండ్రులు. చిన్నారి జాతకం సహా పలు వివరాలు ఓ కాగితంపై రాసి చెక్క డబ్బాలో వదిలేశారు. చివరకు ఆ చిన్నారి ఓ బోటు యజమానికి దొరికింది. ఈ ఘటన ఉత్తర్ప్రదేశ్ గాజీపుర్లో జరిగింది.
ఇదీ జరిగింది..
గంగా నది దాద్రీ ఘాట్ సమీపంలో నీటిపై తేలుతున్న డబ్బాలో చిన్నారి ఏడుపు వినిపించింది. అటుగా వెళ్తున్న బోటు యజమాని మల్లాహ్ గుల్లు.. ఆ డబ్బా తెరిచి చూశారు. 21 రోజుల పసికందు ఏడుస్తూ కనిపించింది.
వెంటనే చిన్నారిని డబ్బాలో నుంచి బయటకు తీసి ఇంటికి తీసుకెళ్లారు. చిన్నారికి స్నానం చేయించి ఆహారం అందించారు. డబ్బాలో దుర్గామాత, విష్ణుమూర్తి ఫొటోలు ఉన్నట్లు గుల్లు తెలిపారు.
మేమే తల్లిదండ్రులం..
సోమవారం తామే చిన్నారి తల్లిదండ్రులమంటూ.. ఓ జంట తమ ఇంటివద్దకు వచ్చినట్లు గుల్లు తెలిపారు. అయితే.. చిన్నారి తమకు గంగా మాత ప్రసాదించిన బహుమతిలాంటిదని గుల్లు అంటున్నారు. ఆ చిన్నారిని తామే పెంచుకుంటామని పేర్కొన్నారు. ఈ మేరకు పోలీసు స్టేషన్లో కేసు నమోదు చేశారు.
ఈ విషయంపై త్వరలోనే స్పష్టత ఇవ్వనున్నట్లు పోలీసులు తెలిపారు. వారంలో ఈ సమస్యను పరిష్కరిస్తామని అన్నారు. చిన్నారి అసలు తల్లిదండ్రులెవరనేది ఇంకా తెలియాల్సి ఉంది.
