కొవిడ్ టూల్కిట్ వ్యవహారానికి సంబంధించి ఇద్దరు కాంగ్రెస్ నేతలకు నోటీసులు ఇచ్చారు దిల్లీ పోలీసులు. కాంగ్రెస్ సోషల్ మీడియా హెడ్ రోహన్ గుప్తా, కాంగ్రెస్ ప్రతినిధి ఎంవీ రాజీవ్ గౌడను దర్యాప్తునకు సహకరించాలని కోరినట్లు సీనియర్ పోలీసు అధికారి స్పష్టం చేశారు.
అయితే.. ఇవి కొత్తగా ఇస్తున్న నోటీసులు కాదని 8-9 రోజుల క్రితమే ఇచ్చినట్లు అధికారి పేర్కొన్నారు. కాంగ్రెస్ నేతలు సహకరిస్తే దర్యాప్తు వేగంగా పూర్తి చేయొచ్చని తెలిపారు.
కొవిడ్ టూల్కిట్ విషయంపై దర్యాప్తులో భాగంగా.. సోమవారం ట్విట్టర్కు నోటీసులు ఇచ్చింది దిల్లీ పోలీసు స్పెషల్ సెల్. భాజపా ప్రతినిధి సంబిత్ పాత్రా ట్వీట్ను 'మ్యానిపులేటెడ్ మీడియా' అని ఏ విధంగా పరిగణించిందో వివరించాలని కోరింది. అనంతరం.. దిల్లీ లాడోసరాయ్, గురుగ్రామ్లోని ట్విట్టర్ కార్యాలయాల్లో సోదాలు నిర్వహించింది.
11 మంది మంత్రులపై చర్యలు?
కొవిడ్పై రాజకీయ వివాదానికి తెరలేపిన 'టూల్కిట్' వ్యవహారంపై ఆగ్రహించిన కాంగ్రెస్ జనరల్ సెక్రటరీ రణ్దీప్ సుర్జేవాలా.. ట్విట్టర్కు లేఖ రాశారు. పార్టీకి సంబంధించి తప్పుడు సమాచారం అందించేలా ట్వీట్లు ఉన్నాయని ఆరోపిస్తూ.. 11 మంది కేంద్ర మంత్రుల ట్వీట్లకు 'మ్యానిపులేటివ్ మీడియా' ట్యాగ్ జోడించాలని కోరారు. ఫోర్జరీకి పాల్పడిన మంత్రులపై సత్వరమే చర్యలు తీసుకోవాలని విజ్ఞప్తి చేశారు.
ఇప్పటికే కాంగ్రెస్ టూల్కిట్గా వెలుగులోకి వచ్చిన డాక్యుమెంట్లను ట్విట్టర్ మ్యానిపులేటివ్ మీడియాగా పేర్కొన్నట్లు గుర్తుచేశారు. గిరిరాజ్ సింగ్, పీయూష్ గోయల్, స్మృతి ఇరానీ, రవిశంకర్ ప్రసాద్, ప్రహ్లాద్ జోషీ, ధర్మేంద్ర ప్రధాన్, రమేశ్ పోఖ్రియాల్, థావర్చంద్ గహ్లోత్, హర్షవర్ధన్, ముఖ్తార్ అబ్బాస్ నఖ్వీ, గజేంద్ర సింగ్ షెకావత్లపై చర్యలు తీసుకోవాలని సుర్జేవాలా కోరారు.
ఇదీ చదవండి:టూల్కిట్ వివాదం- ట్విట్టర్కు కేంద్రం వార్నింగ్!
