ఈ ఏడాది చివరినాటికి మానవ రహిత అంతరిక్ష యాత్ర సహా మొత్తం 14 ప్రయోగాలు చేపట్టనున్నట్లు భారతీయ అంతరిక్ష పరిశోధన సంస్థ(ఇస్రో) ఛైర్మన్ శివన్ వెల్లడించారు. పీఎస్ఎల్వీ సీ-51 వాహకనౌకను విజయవంతంగా కక్ష్యలోకి ప్రవేశపెట్టిన అనంతరం మిషన్ కంట్రోల్ సెంటర్‌లో శాస్త్రవేత్తలను ఉద్దేశించి ఆయన ప్రసంగించారు.
ఏడు వాహకనౌకలు, ఆరు ఉపగ్రహ ప్రయోగాలు సహా ఈ ఏడాది చివరి నాటికి మొదటి మానవరహిత మిషన్ లక్ష్యంగా శాస్త్రవేత్తలు శ్రమిస్తున్నట్లు శివన్ తెలిపారు. గగన్‌యాన్‌కు ముందు రెండు మానవ రహిత అంతరిక్ష యాత్రలు చేపట్టాలని ఇస్రో యోచిస్తోందన్నారు. ఇస్రో నిర్దేశించుకున్న అన్ని లక్ష్యాలను చేరుకుంటుందని ఆశాభావం వ్యక్తం చేశారు.
2022లో గగన్‌యాన్‌ మిషన్ ద్వారా ముగ్గురు భారతీయులను అంతరిక్షంలోకి పంపనున్నారు. ఈ మిషన్‌కు ఎంపికైన నలుగురు పైలట్లు ప్రస్తుతం రష్యాలో శిక్షణ పొందుతున్నారు.
ఇదీ చదవండి: 'మంగళ్యాన్-2 సైతం ఒక ఆర్బిటరే'
