దేశంలో కరోనా టీకా డోసుల పంపిణీ 19 కోట్ల మైలురాయి దాటింది. గురువారం రాత్రి 8 గంటల వరకు 19,18,10,604 డోసులు అందజేసినట్లు కేంద్ర ఆరోగ్య శాఖ తెలిపింది. గురువారం ఒక్కరోజే 14.56 లక్షలకు పైగా టీకా డోసులు అందజేసినట్లు వెల్లడించింది. ఇందులో 12,73,785 తొలి డోసులు కాగా.. 1,82,303 రెండో డోసులని తెలిపింది. 18- 44 మధ్య వయసుగల వారిలో.. గురువారం 7,36,514 మంది తొలి డోసు తీసుకున్నట్లు ఆరోగ్య శాఖ వివరించింది.
విదేశాల సాయం..
కరోనా సంక్షోభంలో భారత్కు అండగా నిలిచాయి వివిధ దేశాలు. ఏప్రిల్ 27 నుంచి మే 19 వరకు.. 13,093 ఆక్సిజన్ కాన్సంట్రేటర్లు, 15,801 ఆక్సిజన్ సిలిండర్లు, 6.1లక్షల రెమ్డెసివిర్ ఔషధాలు ప్రపంచ దేశాల నుంచి భారత్కు చేరుకున్నట్లు కేంద్ర ఆరోగ్య శాఖ పేర్కొంది. భారత్కు చేరుకున్న వైద్యపరికరాలను రాష్ట్రాలకు, కేంద్ర పాలిత ప్రాంతాలకు పంపినట్లు ఆరోగ్య శాఖ తెలిపింది.
19 ఆక్సిజన్ జనరేషన్ ప్లాంట్లతో పాటు 10,425 వెంటిలేటర్లు భారత్కు చేరుకున్నట్లు స్పష్టం చేసింది ఆరోగ్య శాఖ. మే 18-19న.. కెనడా, కువైట్, ఓమన్, మయన్మార్, యూకే దేశాల నుంచి ఎక్కువ మొత్తంలో వైద్య పరికరాలు అందినట్లు వెల్లడించింది.
ఇదీ చదవండి:తమిళనాడులో తగ్గని కరోనా ఉద్ధృతి
