Girl pregnant before marriage: ఓ 12 ఏళ్ల బాలిక పొరుగింటి యువకుడిని ప్రేమించి.. సన్నిహితంగా మెలిగింది. దీంతో గర్భం దాల్చింది. గుట్టుచప్పుడు కాకుండా వారికి వివాహం జరిపించారు కుటుంబ సభ్యులు. సమాచారం అందుకున్న పోలీసులు మండపానికి చేరుకుని అత్యాచారం నేరం కింద వరుడిని అదుపులోకి తీసుకున్నారు. ఈ సంఘటన మహారాష్ట్రలోని నాగ్పుర్లో జరిగింది.
ఇదీ జరిగింది: నాగ్పుర్, ఎంఐడీసీ పోలీస్ స్టేషన్ పరిధిలోని ఓ కాలనీలో 12 ఏళ్ల బాలిక నివాసం ఉంటోంది. ఆమెకు తల్లి లేదు. తండ్రి కూలి పనులు చేసుకుంటూ పోషిస్తున్నాడు. పని ధ్యాసలో పడి కుమార్తె ఏం చేస్తుందని గమనించలేకపోయాడు. ఈ క్రమంలోనే పొరుగింటిలో ఉండే యువకుడి(22)తో ప్రేమలో పడి గర్భం దాల్చింది బాలిక. ఇది తెలుసుకున్న బాలిక తండ్రి.. సమాజంలో తమ పరువు పోతుందని భయపడ్డాడు. ఈ విషయం బయటకు రాకుండా జాగ్రత్త పడ్డాడు. పోలీసులకు ఫిర్యాదు చేయటానికి బదులుగా యువకుడి కుటుంబ సభ్యులను ఒప్పించి ఇరువురికి గుట్టు చప్పుడు కాకుండా వివాహం చేశారు. తమ బిడ్డను పెళ్లి చేసుకుంటే కొత్త ఇల్లు కట్నంగా ఇస్తామని హామీ ఇచ్చాడు ఆ తండ్రి.
మైనర్కు వివాహం చేస్తున్నారని ఆశా కార్యకర్తకు తెలియగా.. దీనిపై ఎంఐడీసీ పోలీసులకు ఫిర్యాదు చేసింది. వెంటనే మండపానికి చేరుకున్న పోలీసులు బాల్యవివాహల నిరోధక చట్టం 2006 కింద వరుడిని అరెస్ట్ చేశారు. వధువుకు వైద్య పరీక్షలు నిర్వహించగా గర్భం దాల్చినట్లు నిర్ధరణ అయింది. వరుడిపై అత్యాచారం కేసు సైతం నమోదు చేశారు.
ఇదీ చూడండి: ప్రేమకథ విషాదాంతం.. చిన్న గొడవకే అమ్మాయి ఆత్మహత్య.. భయంతో అబ్బాయి...
