Vangalapudi Anitha Comments on Next Elections: 'వచ్చే ఎన్నికల్లో పాయకరావుపేట నుంచే పోటీ చేస్తా': వంగలపూడి అనిత

Vangalapudi Anitha Comments on Next Elections: రాష్ట్రంలో మరికొన్ని నెలల్లో రాబోయే అసెంబ్లీ ఎన్నికల్లో తాను పాయకరావుపేట నియోజకవర్గం నుంచే పోటీ చేస్తానని.. తెలుగు మహిళ రాష్ట్ర అధ్యక్షురాలు వంగలపూడి అనిత వెల్లడించారు. పార్టీ టికెట్ విషయంలో కార్యకర్తలు ఎటువంటి అనుమానం పెట్టుకోవద్దని ఆమె స్పష్టం చేశారు. ఇప్పటి నుంచే పార్టీ శ్రేణులంతా ఉత్సాహంగా పని చేస్తే.. కచ్చితంగా 2024 ఎన్నికల్లో తెలుగుదేశం పార్టీ తిరుగులేని విజయాన్ని సొంతం చేసుకుంటుందని ఆమె ఉద్ఘాటించారు. 

Anitha Comments on CM YS Jagan: జనాల్లోకి వస్తే కొడతారనే భయంతోనే అడ్డుతెరలు.. అనకాపల్లి జిల్లా నక్కపల్లిలో నిర్వహించిన టీడీపీ మండల పార్టీ సమావేశానికి తెలుగు మహిళ రాష్ట్ర అధ్యక్షురాలు వంగలపూడి అనిత ముఖ్యఅతిథిగా విచ్చేశారు. ఈ సందర్భంగా ఆమె మాట్లాడుతూ..''వైసీపీ పాలనలో రాష్ట్ర ప్రజలు విసిగిపోయారు. జనాల్లోకి వస్తే కొడతారనే భయంతో అడ్డుతెరలు పెట్టుకుని సీఎం జగన్ పర్యటిస్తున్నారు. ప్రభుత్వ వైఫల్యాలపై ప్రశ్నిస్తే కేసులు పెడుతున్నారు. నాపైన ఇప్పటికీ 20 కేసులు పెట్టారు. చివరికి ఆడవాళ్లను లైంగిక వేధింపులకు గురి చేసిన ఆ కేసులను కూడా నాపైనే పెడుతున్నారు. చంద్రబాబు నాయుడు ప్రకటించిన మేనిఫెస్టో అన్ని వర్గాలకు మేలు చేస్తుంది. దసరాకు తుది విడతా మేనిఫెస్టో విడుదల చేయనున్నారు. వచ్చే ఎన్నికల్లో పాయకరావుపేట నియోజకవర్గం నుంచే నేను పార్టీ తరఫున పోటీ చేస్తున్నా. ఈ విషయంలో కార్యకర్తలకు ఏ అనుమానం అక్కర్లేదు. వైఎస్సార్సీపీ పాలనపై తిరుగుబాటు మొదలైంది. ఇప్పటి నుంచే టీడీపీ శ్రేణులు పార్టీ గెలుపు కోసం ఉత్సాహంగా చేయాలి'' అని ఆమె అన్నారు.