Tulasi Reddy fires on AP Capital Shifting to Vizag: విశాఖకు రాజధాని తరలింపు.. రాయలసీమకు తీరని నష్టం : తులసిరెడ్డి

Tulasi Reddy fires on AP Capital Shifting to Vizag: ఆంధ్రప్రదేశ్​ రాష్ట్ర రాజధానిని ప్రస్తుతమున్న అమరావతి నుంచి విశాఖకు తరలించాలని వైసీపీ ప్రభుత్వం తీసుకున్న నిర్ణయం కారణంగా రాయలసీమకు తీరని నష్టం, అన్యాయం జరుగుతుందని ఏపీసీసీ మీడియా ఛైర్మన్ తులసి రెడ్డి ఆగ్రహం వ్యక్తం చేశారు. కడప జిల్లా వేంపల్లిలో తులసి రెడ్డి మాట్లాడుతూ రాయలసీమవాసులు అనేక వ్యయప్రయాసలకు గురవుతారని తెలిపారు. ప్రస్తుతమున్న రాజధాని రాష్ట్ర నడిబొడ్డున అన్ని ప్రాంతాల వారికి అందుబాటులో.. సౌకర్యంగా ఉందని అన్నారు. 8 సంవత్సరాలుగా అమరావతి నుంచి పరిపాలన సాగుతోందని పేర్కొన్నారు.

విజయదశమి నుంచి రాజధానిని విశాఖకు తరలించాలని, విశాఖ నుంచే పరిపాలన సాగించాలని వైసీపీ ప్రభుత్వం నిర్ణయించడం చారిత్రక తప్పిదం అవుతుందని మండిపడ్డారు. రాయలసీమ వాసిగా ఉంటూ.. రాయలసీమకు తీరని ద్రోహాన్ని సీఎం జగన మోహన్ రెడ్డి చేస్తుండటం దురదృష్టకరమన్నారు. రాజధాని తరలింపు నిర్ణయాన్ని వైసీపీ ప్రభుత్వం వెనక్కి తీసుకోవాలని కాంగ్రెస్ పార్టీ సూచిస్తుందని తులసిరెడ్డి అన్నారు.