Ragging Incident in Guntur Medical College: గుంటూరు వైద్య కళాశాలలో ర్యాగింగ్.. జాతీయ మెడికల్ కమిషన్​కు విద్యార్థుల ఫిర్యాదు..

Ragging Incident in Guntur Medical College: ర్యాగింగ్​ను నివారించటానికి ప్రభుత్వాలు, విద్యాసంస్థల వంటివి ఎన్ని చర్యలు తీసుకున్నా.. ఎక్కడోచోట ర్యాగింగ్​ ఘటనలు వెలుగులోకి వస్తూనే ఉన్నాయి. విద్యార్థుల జీవితాల్లోకి అడుగిడుతున్నా ర్యాగింగ్​ భూతం.. బాధితులుగా మారుస్తోంది. తాజాగా గుంటూరులో జూనియర్​ విద్యార్థులను.. సీనియర్​ విద్యార్థులు వేధించారని ఫిర్యాదు చేసిన ఘటన వెలుగులోకి వచ్చింది.

అసలేం జరిగిందంటే.. గుంటూరు వైద్య కళాశాలలో ర్యాగింగ్ ఘటన కలకలం సృష్టించింది. ఎంబీబీఎస్​ మొదటి సంవత్సరం చదువుతున్న విద్యార్థి.. సీనియర్లు వేధించారని కాలేజి ప్రిన్సిపల్​తో పాటు జాతీయ మెడికల్ కమిషన్​కు ఈ మెయిల్ ద్వారా ఫిర్యాదు చేశారు. గతేడాది కూడా కాలేజిలో జూనియర్ విద్యార్థిపై సీనియర్ ర్యాగింగ్ చేయగా ఇలాగే ఫిర్యాదు వెళ్లింది. మెడికల్ కమిషన్ నుంచి వచ్చిన ఆదేశాలతో విద్యార్థులకు కౌన్సిలింగ్ నిర్వహించారు. మళ్లీ ఈ ఏడాది కూడా ర్యాగింగ్ పునరావృతమైంది. మొదటి సంవత్సరం విద్యార్థులకు నెల రోజుల క్రితమే తరగతులు మొదలయ్యాయి. ఈ లోపే ర్యాగింగ్ ఘటన చోటు చేసుకోవటం విద్యార్థులను ఆందోళనకు గురి చేస్తోంది. ప్రతి సంవత్సరం ఇలా ర్యాగింగ్​ ఘటనలు వెలుగులోకి వస్తుండటం కలకలం సృష్టిస్తోంది.