నవశకం ప్రాంగణంలో పండుగ వాతావరణం - ఆకర్షణీయంగా నేతల భారీ కటౌట్లు

All Arrangements Set For Yuvagalam Vijayotsava Sabha: యువగళం-నవశకం భారీ బహిరంగ సభకు సర్వం సిద్ధమైంది. విజయనగరం జిల్లా పోలిపల్లిలో నిర్వహిస్తున్న యువగళం విజయోత్సవ సభకు ఏర్పాట్లు పూర్తయ్యాయి. ఈ సందర్భంగా నవశకం ప్రాంగణంలో పండుగ వాతావరణం నెలకొంది. బెలూన్లు, డీజే చప్పుళ్లు, నినాదాలతో సభా ప్రాంగణం హోరెత్తుతోంది. వేదికపై ఉత్తరాంధ్ర సాంప్రదాయ కళా నృత్యాలు అలరిస్తున్నాయి. ప్రాంగణం అంతటా ఎన్టీఆర్, చంద్రబాబు, లోకేశ్​, పవన్ కళ్యాణ్, బాలకృష్ట భారీ కటౌట్లను ఏర్పాటు చేశారు. 

టీడీపీ- జనసేన కార్యకర్తల కేరింతలతో సభా ప్రాంగణంలో సందడి నెలకొంది. ఈ కార్యక్రమానికి ఇప్పటికే రాష్ట్ర నలుమూలల నుంచి ఇరుపార్టీల నేతలు, కార్యకర్తలు సభా ప్రాంగణానికి చేరుకున్నారు. విశాఖ నుంచి సభ జరిగే పోలిపల్లి వరకు బ్యానర్లు, జెండాలు, ఫ్లెక్సీలతో జాతీయరహదారి కన్నుల పండువగా మారింది. రోడ్డుకు ఇరువైపులా ఎక్కడ చూసినా చంద్రబాబు, లోకేశ్​, పవన్ కల్యాణ్‌ల కటౌట్లు కనిపిస్తున్నాయి. స్థానిక నాయకులు ఎక్కడికక్కడ తమ అభిమాన నాయకుల ఫ్లెక్సీలు ఏర్పాటు చేశారు. నవశకం వేదికవద్ద టీడీపీ-జనసేన నేతలు సమన్వయంతో ఏర్పాట్లను పర్యవేక్షిస్తూ కార్యకర్తలకు సూచనలిస్తున్నారు.