Periods Twice in a Month Reasons : మహిళల్లో పీరియడ్స్ అనేవి కామన్. ఓ వయసు వచ్చాక ఇవి ప్రారంభమవుతాయి. ఇకపోతే సాధారణంగా ఆరోగ్యవంతమైన మహిళలల్లో పీరియడ్స్ ప్రతి 28 రోజులకు ఒకసారి వస్తాయి. ఇక కొందరి శరీర తత్వాన్ని బట్టి 24 నుంచి 35 రోజుల మధ్య వస్తుంటాయి. ఇది సాధారణమైనప్పటికీ.. కొందరికి ఒకే నెలలో రెండు సార్లు పీరియడ్స్(Periods) వస్తుంటాయి. మరి ఇలా రావడం సాధారణమేనా? దీని వెనుక ఇతర కారణాలేమైనా ఉన్నాయా? నిపుణులు ఏం చెబుతున్నారు? అనే వివరాలు ఈ స్టోరీలో తెలుసుకుందాం..
సాధారణంగా రుతుచక్రం వ్యవధి 28 రోజులు. రుతుస్రావం 3-5 రోజులు ఉంటుంది. అయితే ఈ రుతుక్రమం సైకిల్‌ ప్రతి 28 రోజులకొకసారి కాకుండా 24 రోజులకొకసారి వస్తే ఒకే నెలలో రెండు సార్లు పీరియడ్స్ రావచ్చని.. ఇది సాధారణమే అని.. ఈ పీరియడ్స్ వ్యవధి అందరిలో ఒకేలా ఉండదంటున్నారు. అలా కాకుండా వస్తుంటే మాత్రం వైద్యుడిని సంప్రదించాల్సిందేనని.. అంతే కాకుండా ఈ పరిస్థితి తలెత్తడానికి వేరే కారణాలు కూడా ఉన్నాయంటున్నారు.
పాలీమెనోరియా : ఈ సమస్య వల్ల కూడా నెలలో రెండుసార్లు పీరియడ్స్ వస్తుంటాయి. ఇది రెండు రుతుచక్రాల మధ్య వ్యవధిని దాదాపు 21 రోజులకు తగ్గిస్తుంది. అంటే ఈ సమస్య ఉన్నవారిలో మిగతావారికంటే త్వరగా నెలసరి వస్తుంది. ఇది సంతానోత్పత్తిని కూడా ప్రభావితం చేస్తుంది. కాబట్టి ఇలాంటి సమస్య ఉంటే వెంటనే మీరు వైద్యుడిని సంప్రదించి తగిన చికిత్స తీసుకోవడం బెటర్.
గర్భనిరోధక మాత్రలు : కొందరు పిల్లలు పుట్టకుండా కొన్ని రకాల మందుల్ని యూజ్ చేస్తుంటారు. పీరియడ్స్పై అవి కూడా తీవ్ర ప్రభావాన్ని చూపిస్తాయి. అయితే మీరు గర్భనిరోధక మాత్రలు, ఇంప్లాంట్లు లేదా హార్మోన్ల ఇంట్రాయూటెరైన్ పరికరాలను తీసుకుంటే.. రక్తస్రావం జరుగుతూ ఉండవచ్చు లేదా పీరియడ్స్ మధ్య చుక్కలు కనిపించవచ్చు. అలాగే వీటి వల్ల కలిగే దుష్ప్రభావాలు అధికంగా ఉంటాయి. కాబట్టి వీటి కారణంగా కూడా నెలలో రెండుసార్లు పీరియడ్స్ రావడం జరుగుతుంది.
పీరియడ్స్ టైమ్లో పెయిన్ కిల్లర్స్ వాడుతున్నారా? - ఈ విషయాలు తెలియకపోతే ఇబ్బందే!
ఒత్తిడి : మీరు విపరీతమైన ఒత్తిడితో బాధపడుతుంటే అది కూడా చాలా తరచుగా పీరియడ్స్ రావడానికి కారణమవుతోంది. బాడీలోని హార్మోన్లు ఒత్తిడికి గురికావడం ద్వారా ఒకే నెలలో రెండు సార్లు రక్తస్రావం జరుగుతుంది. అయితే ముఖ్యంగా స్ట్రెస్ మాత్రమే దీనికి ప్రధానంగా కారణమని చెప్పలేం. ఒక్కోసారి బాడీలోని వేడి కారణంగా కూడా రెండుసార్లు నెలసరి వస్తుంది.
PCOS : పాలీసిస్టిక్ ఓవేరియన్ సిండ్రోమ్ కూడా నెలలో రెండుసార్లు పీరియడ్స్ రావడానికి కారణంగా చెప్పుకోవచ్చు. ఇది ఈస్ట్రోజెన్, ప్రొజెస్టెరాన్, టెస్టోస్టెరాన్ లాంటి హార్మోన్ల అసమతుల్యతకు దారితీస్తుంది. ఈ పరిస్థితి క్రమరహిత పీరియడ్స్, స్కిప్ పీరియడ్స్, తీవ్రమైన పొత్తికడుపు నొప్పి లేదా భారీ రక్తస్రావం, నెలకు రెండుసార్లు పీరియడ్స్కు కారణం కావచ్చు.
పెరిమెనోపాజ్ : నెలలో రెండుసార్లు పీరియడ్స్ రావడానికి మరో కారణం పెరిమెనోపాజ్. ఇది కూడా తరచుగా రక్రస్రావాన్ని కలిగిస్తుంది. ఈ సమయంలో మీ హార్మోన్లు మరింత అసమతుల్యత చెందుతాయి. అదేవిధంగా థైరాయిడ్‌కి సంబంధించిన సమస్యలు ఉన్నా ఈ మెన్స్ట్రువల్ సైకిల్‌ అస్తవ్యస్తం అవుతుంది. ఇక చివరగా కడుపులోని ఫైబ్రాయిడ్లు రక్తం గడ్డకట్టడం, భారీ రక్తస్రావం జరగడానికి కారణమవుతాయి. ఈ రక్తస్రావం ఇర్రెగ్యులర్ పీరియడ్స్కు దారితీస్తుంది.
పీరియడ్స్ సరిగా రావట్లేదా? ఇవి తింటే చాలు - ప్రాబ్లమ్ క్లియర్!
పీరియడ్స్ కోసం మందులు వాడుతున్నారా? మరిన్ని చిక్కులొస్తాయి - ఇలా సరిచేసుకోండి!
