మేకప్ వేసుకుంటే క్యాన్సర్ వస్తుందా?
ఇటీవల కాలంలో యువత మేకప్ వేసుకునేందుకు ఎక్కువ ఆసక్తిని చూపుతోంది. చిన్నవారి నుంచి పెద్దవారు కూడా అందంగా ఉండేందుకు చాలా రకాల సౌందర్య ఉత్పత్తులు వినియోగిస్తున్నారు. అయితే చాలా మందిలో మేకప్ వేసుకుంటే క్యాన్సర్ వస్తుందా అనే అనుమానం ఉంది. దీని గురించి నిపుణులు కొన్ని ఆసక్తికర విషయాలు చెప్పారు. వీటితో పాటు మేకప్ వేసుకునేటప్పుడు తీసుకోవాల్సిన కొన్ని జాగ్రత్తలను తెలిపారు. అవేంటంటే?..
- మేకప్ వేసుకుంటే క్యాన్సర్ వస్తుంది అనేది అపోహ మాత్రమే. ఇంతకు ముందు మేకప్ బాక్స్లలో అమోనియా వంటి చర్మానికి హానికలిగించే కెమికల్స్ వాడేవారు. ఇప్పుడైతే అలాంటి ప్రమాదకరమైన రసాయనాల్ని నిషేధించారు.
- చవకబారు మేకప్ బాక్స్, క్రీమ్స్ వాడటం మంచిది కాదు. మంచి బ్రాండ్ల నుంచి ప్రొడక్ట్స్ను ఎంపిక చేసుకోవటం ఉత్తమం.
- చర్మానికి వాడే ఏ ప్రొడక్ట్స్ వల్లనైనా అప్పుడప్పుడూ కొన్ని స్కిన్ అలర్జీస్ వస్తాయి. అయితే అవి క్యాన్సర్కు దారితీస్తాయని భయపడాల్సిన అవసరం లేదు.
- మేకప్, కాస్మొటిక్స్ క్రీమ్స్ వాడుతున్నవారు అది వారి చర్మానికి సూట్ అవుతుందో లేదో అని స్కిన్ టెస్ట్ చేసి చూసుకోవాలి. ఈ టెస్ట్ చేసేటప్పుడు వారి చర్మం ఎర్రగా మారి రాషెస్ వస్తే వెంటనే అలాంటి ఉత్పత్తులను వాడటం మానేయటం ఉత్తమం.
- మేకప్ను సరైన పద్ధతిలో తీసేయాలి. అయితే తరచుగా మేకప్ వేసుకోకుండా, ఏదైనా తప్పనిసరి పరిస్థితులలో అప్పుడప్పుడు మాత్రమే మేకప్ వేసుకుంటే మంచిది.
- నాణ్యమైన ఉత్పత్తులు వాడకపోయినా పర్లేదు కానీ, గడువు దాటినవి వాడకపోతే మంచిది. వీటివల్ల స్కిన్ అలర్జీస్ వచ్చే అవకాశాలు ఉన్నాయి.
- మేకప్ వేసుకుని చర్మంపై ఎక్కువసేపు ఉంచటం మంచిది కాదు. మేకప్ను తొందరగా తొలగించేయాలి.
- ముఖ్యంగా రాత్రులు పడుకునే ముందు మేకప్ రిమూవ్ చేసుకోవటం తప్పనిసరిగా భావించాలి. లేదంటే చర్మ సంబంధిత సమస్యలు ఎదురయ్యే అవకాశాలు చాలా ఎక్కువగా ఉన్నాయి.
- వీలైనంత తక్కువగా మేకప్ వేసుకోవటం ఉత్తమం.
- నాణ్యమైన మేకప్ ఉత్పత్తులను.. పరిశుభ్రమైన పద్ధతులలో వాడటం మంచిది.
- మేకప్ ద్వారా వచ్చే అందం కంటే సహజసిద్ధంగా వచ్చే సౌందర్యమే శాశ్వతం. కొన్ని చిట్కాలను పాటిస్తే సహజసిద్ధంగా చర్మం నిగారిస్తుంది.
సహజంగా మెరిసే అందమైన చర్మం కోసం చిట్కాలు:
- ఫేస్ వాష్ చేసుకున్నాక ముఖం తాజాగా కనిపించేందుకు కార్న్ఫ్లవర్ వాటర్, రోజ్ వాటర్, థర్మల్ స్ప్రింగ్ వాటర్ వంటి టోనర్లను ఉపయోగిస్తారు. అయితే బయట దొరికే ఉత్పత్తులు కాకుండా ఇంట్లో తయారు చేసుకున్న సహజసిద్ధమైన టోనర్స్ను వాడటం మంచిది.
- చర్మం మృదువుగా, అందంగా కనిపించేందుకు పెరుగు చాలా సహాయం చేస్తుంది. కమలాపండ్ల తొక్కల పొడిలో తగినంత పెరుగు కలిపి ముఖానికి అప్లై చేసుకుని ఆరిన తర్వాత కడిగేసుకుంటే చర్మం అందంగా మెరిసిపోతుంది.
- టొమాటో రసం, పెరుగును సమాన పరిమాణంలో తీసుకుని ముఖానికి, మెడకు అప్లై చేసుకుని పది నిమిషాల తర్వాత చల్లని నీటితో కడిగేస్తే చర్మం మృదువుగా తయారవుతుంది.
- పాలపొడి కూడా చర్మం అందంగా కనిపించేందుకు ఉపయోగపడుతుంది. రెండు స్పూన్ల పాలపొడిలో కాస్త రోజ్ వాటర్, పెరుగు, తేనె, వెనిగర్ కలిపి ఫేస్ ప్యాక్ వేసుకుంటే చర్మం కాంతివంతంగా కనిపిస్తుంది.
ఈ ఆహారంతో సహజసిద్ధమైన మెరుపు..
ఈ చిట్కాలను పాటిస్తూనే కొన్ని ఆహారాలను తీసుకుంటే సహజసిద్ధంగా అందంగా మారొచ్చని నిపుణులు అంటున్నారు.
- గుడ్లు తినటం ఆరోగ్యానికి మాత్రమే కాక చర్మం అందాన్ని పెంచడంలో తోడ్పడుతుంది. రోజూ ఆహారంలో గుడ్డు తీసుకుంటే మంచిది. ఇది చర్మాన్ని సంరక్షించి, ఆరోగ్యంగా మెరిసేలా చేస్తుంది. దీనిలోని లూటిన్, జెనాక్సాంథిన్.. కణాలు పాడవకుండా కాపాడి, వృద్ధాప్య ఛాయల్ని దరిచేరనివ్వవు.
- చేపలు, మాంసం ఆహారంలో తీసుకుంటే చర్మం ఆరోగ్యంగా కనిపిస్తుంది.
- రోజూ పండ్లు తినటం ఆరోగ్యంతో పాటు చర్మానికి కూడా చాలా మంచిది. తాజా పండ్ల రసాలను తాగితే చర్మం యవ్వనంగా కనిపిస్తుంది.
- రోజూ సమయానికి నిద్రపోవాలి. రాత్రిళ్లు ఆలస్యంగా నిద్రపోయే అలవాటు మానుకోవాలి.
- అధిక మోతాదులో నీటిని తాగడం మంచిది. నీరు చర్మాన్ని నిగనిగలాడేలా చేస్తుంది.
- ఇవీ చదవండి:
- 'మెదడు'లోకి వాయు గరళం.. ఇళ్లలో మొక్కలు మస్ట్.. బయటకు వెళ్తే 'మాస్క్' ఉండాల్సిందే!
- అప్పుడప్పుడు వనవాసం.. కంటినిండా నిద్ర.. కొత్త ఏడాదికి హెల్తీ రూల్స్!
