రాష్ట్రంలో కరోనా కేసులు అమాంతం పెరుగుతున్నా ఇదేమీ పట్టనట్లుగా కొందరు సమావేశాలు నిర్వహిస్తున్నారు. కరోనా వైరస్ వ్యాప్తికి పరోక్షంగా కారణం అవుతున్నారు. ప్రభుత్వాలు, పోలీసు యంత్రాంగాలు ఎన్ని చర్యలు తీసుకున్నప్పటికీ వారి తీరులో మార్పు రావడం లేదు. పశ్చిమ గోదావరి జిల్లా తాడేపల్లిగూడెం భాగ్యలక్ష్మిపేటలోని ఎల్ఎల్ఎం చర్చిలో నిబంధనలకు విరుద్ధంగా సమావేశం నిర్వహించారు.
తాడేపల్లిగూడెం నియోజకవర్గ పరిధిలో ఉన్న గ్రామాలకు సంబంధించిన పాస్టర్లు అందరూ చర్చిలో సమావేశానికి హాజరయ్యారు. స్థానికులు సమాచారం అందించటంతో పోలీసులు దాడి చేసి 49 మంది పాస్టర్లను పోలీస్ స్టేషన్కు తరలించారు. పాస్టర్లు అందరికీ పట్టణ సీఐ ఆకుల రఘు కౌన్సిలింగ్ ఇచ్చారు. పది మందికి ఆదర్శంగా ఉండాల్సిన వారు సామూహికంగా ప్రార్థనలు చేయటం ఏంటని నిలదీశారు. వారిపై పలు సెక్షన్ల కింద కేసు నమోదు చేసి కోర్టులో హాజరుపరుస్తామని రఘు మీడియాకు తెలియజేశారు. ప్రజలు సామాజిక దూరం పాటించాలని పట్టణ సీఐ ఆకుల రఘు సూచించారు.
ఇదీ చదవండి: రాష్ట్రంలో 180 కరోనా పాజిటివ్ కేసులు
