ఉపాధి అవకాశాలు లేని మహిళలకు, యువతులకు.. పశ్చిమ గోదావరి జిల్లా ఏలూరులో బ్యాంకర్ల గ్రామీణ ఔత్సాహిక అభివృద్ధి సంస్థ, సత్యసాయి సేవా సంస్థలు.. నైపుణ్యాభివృద్ధి శిక్షణా కార్యక్రమాలు నిర్వహిస్తున్నాయి. పేద, దిగువ, మధ్యతరగతి మహిళలు, యువతులు ఉపాధి పొందేలా.. టైలరింగ్‌, ఫ్యాషన్‌ డిజైనింగ్‌లో పూర్తి శిక్షణ ఇస్తున్నారు.
శిక్షణతో పాటు రుణసాయం..
ఏడాది పొడవునా సాగే ఈ శిక్షణా కార్యక్రమాల్లో.. ఒక్కో బ్యాచ్‌కు 40 రోజుల శిక్షణ ఉంటుంది. ఒక్కో బ్యాచ్‌లో 60 మందికి శిక్షణ ఇస్తారు. నేటి కాలానికి తగ్గట్టుగా.. టైలరింగ్‌లో డిజైనింగ్‌లు నేర్పుతున్నారు. శిక్షణ పూర్తయ్యాక ధ్రువీకరణ పత్రాలు ఇస్తున్నారు. ఈ ధ్రువీకరణ పత్రం సాయంతో.. సంబంధిత బ్యాంకుల నుంచి రుణం పొందేలా చర్యలు చేపట్టారు. శిక్షణా కాలంలోనే టైలరింగ్‌లో పూర్తి నైపుణ్యం అందిస్తామని శిక్షకురాలు చెబుతుండగా.. తమ కాళ్ల మీద నిలబడగలమన్న ధైర్యం వచ్చిందని శిక్షణ పొందిన మహిలలు చెబుతున్నారు.
మహిళల ఉన్నతే ధ్యేయంగా..
మూడేళ్లుగా బ్యాంకర్ల గ్రామీణ ఔత్సాహిక అభివృద్ధి సంస్థ, సత్యసాయి సేవా సంస్థలు సంయుక్తంగా మహిళలు, యువతులకు శిక్షణా కార్యక్రమాలు నిర్వహిస్తున్నాయి. ఏటా 500 మంది మహిళలకు శిక్షణ ఇస్తున్నారు. ఆర్థికంగా, ఆధ్యాత్మికంగా ఉన్నత స్థానాలకు వెళ్లాలనే ఉద్దేశంతోనే శిక్షణ ఇస్తున్నట్లు.. సత్యసాయి సేవా సంస్థల జిల్లా అధ్యక్షుడు శశిశేఖర్‌ చెబుతున్నారు. ఇక్కడ శిక్షణ తీసుకున్న మహిళలు ఆర్థికంగా నిలదొక్కుకోవడమే కాకుండా.. మరో పది మందికి ఉపాధి కల్పిస్తున్నారు.
ఇదీ చదవండీ..విధి వంచితుడిపై ఈటీవీ కథనానికి స్పందన..
