ప్రపంచ దేశాలను భయపెడుతున్న కరోనా వైరస్ పై విశాఖ జిల్లా యంత్రాంగం అప్రమత్తమైంది. విశాఖ కేజీహెచ్ ఆసుపత్రిలో కరోనా వైరస్ వైద్య సేవలకు ముందస్తుగా ఒక ప్రత్యేక వైద్య విభాగాన్ని ఏర్పాటు చేశారు. ఇప్పటికే విశాఖ విమానాశ్రయంలో ఒక సమాచార కేంద్రాన్ని ఏర్పాటు చేసిన అధికారులు... విదేశాలకు వెళ్లిన వారు, విదేశాల నుంచి వచ్చిన వారి వివరాలు సేకరిస్తున్నారు. ఏదైనా అనుమానం ఉంటే వారికీ వైద్య సేవలు అందించే ప్రణాళిక సిద్ధం చేశారు. దీని కోసం వాల్తేర్లోని అంటువ్యాధులు నివారణ ఆసుపత్రిలో అదనంగా మరో పది పడకల వార్డు ఏర్పాటు చేశారు. పోర్టులకు ఇతర దేశాల నుంచి, ముఖ్యంగా చైనా నుంచి వచ్చిన నౌకలు ఏమైనా ఉంటే వాటిని కూడా అప్రమత్తం చేసేందుకు సిద్ధం చేశారు. కరోనా వైరస్పై చైతన్యం కల్పించడం, నివారణకు... జిల్లా వైద్య శాఖ, కేజీహెచ్, ఆంధ్రా మెడికల్ కళాశాలలు సంయుక్తంగా సేవలు అందించేలా చర్యలు తీసుకున్నారు.
జర జాగ్రత్త!
జన సంచారం ఎక్కువగా ఉండే ప్రదేశాల్లో అప్రమత్తంగా ఉండాలని వైద్యులు సూచిస్తున్నారు. అపరిశుభ్రమైన వాతావరణం.... ఈ వైరస్కి అనుకూలమని చెప్తున్నారు. అదే విధంగా వ్యాధి లక్షణాల్లో ఏ ఒక్కటి గుర్తించిన వెంటనే వైద్యులను సంప్రదించాలని కోరుతున్నారు. కొన్ని ఆహార నియమాలు పాటించి వ్యాయమం చేస్తే రోగ నిరోధక శక్తి పెరిగి కరోనా వైరస్ లాంటివి దరిచేరవని వైద్యులు చెబుతున్నారు.
ఇదీ చదవండి:
'మేము క్షేమంగా ఉన్నాం : చైనాలో తెలుగు విద్యార్థుల సెల్ఫీ వీడియో'
