నేరస్థుల పాలిట సింహస్వప్నం... ఫాల్కన్ వాహనం

వేల మంది మధ్యన నేరస్థులు ఉన్నా ఇట్టే పసిగడుతుంది ఆ వాహనం. వంద మంది పోలీసుల పనిని అదొక్కటే చేయగలదు. జేబు దొంగ నుంచి ఉగ్రవాది వరకు ఎవరైనా ఈ వాహనానికి దగ్గర్లో ఉంటే.. ఇట్టే పసిగడుతుంది. ఒళ్లంతా కెమెరా కళ్లతో పహారా కాస్తుంటుంది. రాష్ట్ర పోలీసుల వద్దనున్న ఫాల్కన్ వాహనం ప్రత్యేకతలే ఇవన్నీ.

సాంకేతికతతో నేరాలను నియంత్రించేందుకు ముందుండే రాష్ట్ర పోలీసులు.. మరో కొత్తతరహా వ్యవస్థను అందిపుచ్చుకున్నారు. అత్యాధునిక సాంకేతికతో రూపొందించిన ఫాల్కన్‌ వాహనాన్ని.. సాగర నగరం విశాఖలో అందుబాటులోకి తెచ్చారు. నగరంతో పాటు జిల్లాలో జరిగే అన్ని కార్యక్రమాల్లోనూ.. ముఖ్యంగా వీఐపీల పర్యటనలు, జాతరల్లో ఈ వాహనం సేవలను అధికంగా వినియోగిస్తున్నారు. నేరస్థుల ముఖ కవళికలతో పాటు కార్యక్రమంలో అనుమానాస్పదంగా తిరుగుతున్న వారిని పసిగట్టేందుకు ఫాల్కన్‌ ఉపయోగపడుతుంది. విదేశాల నుంచి దిగుమతి చేసుకున్న ఈ మొబైల్ సెక్యూరిటీ వాహనం ద్వారా నేరాలు జరగకుండా నిలువరించేందు వీలు కలుగుతుందని అధికారులు చెబుతున్నారు.

ఫాల్కన్ ప్రత్యేకతలు

• పాత నేరస్థుడిని అతని ముఖ కవలికల ఆధారంగా గుర్తించి పోలీసులను అప్రమత్తం చేస్తుంది
• 360 డిగ్రీల్లో కెమెరాలు ఉన్నందున ఏ చిన్న ఘటననైనా రికార్డు చేయగలవు
• నాలుగు హై రెజల్యూషన్ కెమెరాలు వీడియోలు తీసి యూనిట్​కు పంపిస్తాయి
• ఎక్కడికైనా సులభంగా వాహనానాన్ని తరలించవచ్చు

సరికొత్త సాంకేతికతతో నేరాల నియంత్రణకు అడ్డుకట్టవేస్తున్న పోలీసు యంత్రాంగాన్ని.. జిల్లా ప్రజలు అభినందిస్తున్నారు.