Rushikonda Was Destroyed by the YSRCP Government: ఎండాడ సర్వే నంబర్లు 19/1, 19/3, 19/4లో మొత్తం 69.65 ఎకరాల్లో విశాఖ నగరానికి మణిమకుటంలా భాసిల్లే రుషికొండ విస్తరించి ఉంది. కొండపై రిసార్ట్స్ పునర్నిర్మాణం పేరిట గతంలో ఉన్న స్థలంలో కంటే అదనంగా రుషికొండ (Rushikonda)ను తవ్వేస్తున్నారని జనసేన పార్టీ కార్పొరేటర్ పీతల మూర్తి యాదవ్ 2021 డిసెంబరులో హైకోర్టును (Rushikonda Hill Case) ఆశ్రయించారు. ఎమ్మెల్యే వెలగపూడి రామకృష్ణ బాబు, ఎంపీ రఘురామకృష్ణ రాజు కూడా పిటిషన్లు వేశారు.
Over 90 Percent of the Area on Rushikonda has Construction Permits : పర్యాటకశాఖ అధికారులు 9.88 ఎకరాల విస్తీర్ణంలో హరిత రిసార్ట్స్ పునర్నిర్మాణానానికి కేంద్ర పర్యావరణ, అటవీశాఖ నుంచి అనుమతి పొందారు. తర్వాత మోసపూరితంగా 21 ఎకరాల్లో కొండను తొలిచేశారు. National Green Tribunal (NGT), సుప్రీంకోర్టు ఆదేశాలను లెక్కచేయకుండా తవ్వేశారు. ఇది కోర్టు ధిక్కరణ అంటూ మూర్తి యాదవ్ మరోసారి హైకోర్టును ఆశ్రయించారు. న్యాయస్థానాల్లో కేసులు ఉండగానే పర్యాటకశాఖ 61 ఎకరాల్లో నిర్మాణాలకు ప్లాను కోసం మరోసారి GVMCకి దరఖాస్తు చేసింది.
కేంద్ర పర్యావరణ, అటవీశాఖ ఇచ్చిన అనుమతులకు విరుద్ధంగా Greater Visakhapatnam Municipal Corporation (GVMC) ప్లాన్‌ మంజూరు చేసేసింది. గతంలో 5.99 ఎకరాల విస్తీర్ణంలో రిసార్టులు ఉండేవి. ఇప్పుడు అనుమతులు పొందిన విస్తీర్ణం ఏకంగా 61 ఎకరాలకు చేరుకుంది. ఈ లెక్కన ఖాళీ స్థలాల పన్ను కింద 100 కోట్ల వరకు GVMCకి చెల్లించాల్సి ఉంది. ఈ విషయాన్ని రెండు శాఖల అధికారులూ పట్టించుకోలేదు.
CM Jagan Decisions Danger to Rushikonda : రుషికొండ విస్తీర్ణం 69.65 ఎకరాలైతే అందులో ఏకంగా 61 ఎకరాల్లో కట్టడాలకు GVMC ప్లాను మంజూరు చేశారు. ఇది మొత్తం విస్తీర్ణంలో 90 శాతానికి పైమాటే. ప్రస్తుతం 21 ఎకరాల్లో కొండను తొలిచేశారు. భవిష్యత్తులో మిగతా 40 ఎకరాల్లోనూ నిర్మాణాలు చేపట్టే అవకాశం ఉంది. అదే జరిగితే రుషికొండ పూర్తిగా కనుమరుగయ్యే ప్రమాదం ఉంది.
ప్లాను పొందే సమయంలో ఏయే నిర్మాణాలు చేస్తున్నారో GVMCకి కచ్చితంగా తెలియజేయాల్సి ఉన్నా, ఎలాంటి సమాచారం ఇవ్వలేదు. పర్యాటక శాఖ ఆధ్వర్యంలో జరుగుతున్న నిర్మాణాలకు భవన రుసుముల కింద 19.05 కోట్లు చెల్లించాలి. వాటిని అయిదేళ్లలో సర్దుబాటు చేసేలా వెసులుబాటు కల్పిస్తూ ప్రభుత్వం ఉత్తర్వులు ఇచ్చింది.
Coastal Regulation Zone (CRZ) నిబంధనల ప్రకారం తీరం పక్కన భూగర్భ జలాలను తోడకూడదు. కానీ ఇక్కడ హైస్పీడ్‌ బోర్లతో నీరు తోడినట్లు ఆరోపణలు ఉన్నాయి. ఎలాంటి అనుమతులు లేకుండానే పూర్తయిన నిర్మాణాల చుట్టూ రహదారులను నిర్మిస్తున్నారు.
శ్వేతపత్రం విడుదల చేయాలి: రుషికొండను తొలిచేసి, పర్యాటక శాఖ కట్టడాలను లీజు పేరుతో కాజేయడానికి సీఎం జగన్‌ కుట్ర పన్నారని మాజీమంత్రి బండారు సత్యనారాయణమూర్తి ఆరోపించారు. రుషికొండపై నిర్మిస్తున్న విశాలవంతమైన భవనానికి కోట్ల రూపాయలు ఖర్చుచేస్తున్న ముఖ్యమంత్రి.. పేదవాడినంటూ ప్రచారం చేసుకోవటం హాస్యాస్పదంగా ఉందన్నారు. ఆ భవనాల కోసం చేస్తున్న ఖర్చులపై శ్వేతపత్రం విడుదల చేయాలని ఆయన డిమాండ్‌ చేశారు.
