'హైదరాబాద్​ నుంచి వచ్చారు..అయినా అధికారులకు సమాచారమివ్వలేదు'

వారంతా రెండు రోజుల క్రితం హైదరాబాద్​ నుంచి స్వగ్రామానికి వచ్చారు. క్వారంటైన్​లో ఉండకుండా... అధికారులకు సమాచారమివ్వకుండా గ్రామంలో తిరుగుతుండటంతో గ్రామస్తులు పోలీసులకు సమాచారం అందించారు. దీంతో వారందర్నీ క్వారంటైన్​ కేంద్రానికి తరలించారు. ఈ ఘటన విశాఖ జిల్లా చోడవరంలో జరిగింది.

విశాఖ జిల్లా కండివరం గ్రామస్తులు రెండు రోజుల క్రితం హైదరాబాద్​ నుంచి స్వగ్రామం చేరుకున్నారు. వీరు గ్రామంలో ఉండేందుకు గ్రామస్తులు అభ్యంతరం తెలిపారు. కరోనా వైరస్ వ్యాప్తి చెందుతున్న నేపథ్యంలో హైదరాబాద్​ నుంచి వచ్చినా అధికారులకు సమాచారం ఇవ్వకుండా, క్వారంటైన్​లో ఉండకుండా జనావాసంలో కలిసి ఉన్నారని గ్రామస్తులు పోలీసులకు ఫిర్యాదు చేశారు. దీంతో అధికారులు గ్రామానికి చేరుకొని 8మందిని చోడవరంలోని క్వారంటైన్​కు తరలించారు. వీరికి వైరస్ లక్షణాలు లేకపోయినా, ముందస్తు జాగ్రత్త చర్యగా క్వారంటైన్​లో ఉంచినట్లు అధికారులు వెల్లడించారు.

చోడవరంలో క్వారంటైన్ కేంద్రాన్ని ఏర్పాటు చేసినట్లు తెలిపిన అధికారులు... 10 మందికి సరిపడేలా ఏర్పాట్లు చేసినట్లు వెల్లడించారు.

ఇదీ చదవండి: కరోనా నియంత్రణకు సరికొత్త ఆలోచన !