మహిళా గ్రాండ్ మాస్టర్​గా నిలిచిన మూడో తెలుగమ్మాయి

చిన్నతనంలోనే చదరంగంలో చిచ్చరపిడుగు అయ్యింది. మేధస్సు, ఆటోలో నైపుణ్యంతో రాణిస్తూ జాతీయ, అంతర్జాతీయ స్థాయి పతకాలు సొంతం చేసుకుంది. తాజాగా ఉమెన్ గ్రాండ్ మాస్టర్ టైటిల్​ను అందుకుంది. ఈ హోదా అందుకున్న మూడో తెలుగమ్మాయిగా గుర్తింపు పొందింది విశాఖకు చెందిన ప్రత్యూష.

విశాఖ జిల్లా పాయకరావుపేట మండలం మంగవరం గ్రామానికి చెందిన ప్రసాద్‌, సత్యదేవి గారాలపట్టి ప్రత్యూష. ఆరేళ్ల వయసులో కేవలం కాలక్షేపం కోసం నేర్చుకున్న చదరంగం నేడు అంతర్జాతీయ స్థాయికి తీసుకెళ్లింది. ఇప్పటివరకు 24 అంతర్జాతీయ, 8 జాతీయ స్థాయి పతకాలు కైవసం చేసుకుంది.

ఆత్మవిశ్వాసం చెదిరిపోకుండా శ్రమించి... ఇంగ్లాండ్​లో జరిగిన జిబ్రాల్టర్ ఓపెన్ చెస్​ ఛాంపియన్ ​షిప్​లో 9, 5 పాయింట్లను దక్కించుకుని మహిళా గ్రాండ్ మాస్టర్ టైటిల్​ అందుకుంది. ఇప్పటివరకు ఈ హోదా దేశంలో ఎనిమిది మందికి దక్కగా.. వారిలో తెలుగు రాష్ట్రాలకు చెందిన ఇద్దరు అమ్మాయిలు ఉన్నారు. ఈ జాబితాలో చోటు దక్కించుకున్న మూడో తెలుగమ్మాయిగా ప్రత్యూష రికార్డు సాధించింది.

ప్రస్తుతం దూరవిద్య ద్వారా డిగ్రీ చదువుతున్న ప్రత్యూష తల్లి సత్యదేవి పోస్ట్ గ్రాడ్యుయేషన్ పూర్తి చేసి ఓ కళాశాలలో అధ్యాపకురాలిగా పని చేస్తున్నారు. గ్రాండ్ మాస్టర్ టైటిల్ దక్కించుకున్న స్ఫూర్తితోనే భవిష్యత్తులో మరిన్ని పతకాలు ఆకాంక్షిస్తున్నట్లు ప్రత్యూష పేర్కొంది.

ఆర్థిక ఇబ్బందులను ఎదుర్కొంటూ ఈ స్థాయికి వచ్చానని...ఇకపై జరిగే టోర్నమెంట్లకు ప్రభుత్వం తరపు నుంచి సాయం అందిస్తే ప్రోత్సాహకరంగా ఉంటుందని చెస్​ క్రీడాకారిణి ప్రత్యూష ఆశాభావంతో ఉంది.

ఇదీ చూడండి కరోనా ఎఫెక్ట్​ : క్రికెట్​ సంబర్లాలో విచిత్ర అభివాదం