లాక్డౌన్ నేపథ్యంలో అధికారులు అప్రమత్తమవుతున్నారు. కరోనా వైరస్ విస్తరించకుండా శ్రీకాకుళం జిల్లా నరసన్నపేటలో అగ్నిమాపక వాహనంతో సోడియం హైడ్రోక్లోరైడ్ ద్రావణాన్ని పిచికారీ చేశారు. మొత్తం వీధులు తడిసేలా సోడియం క్లోరైడ్తో పరిశుభ్రం చేశారు.
నెల్లూరు జిల్లా ఆత్మకూరు పురపాల సంఘం పరిధిలోని మార్కెట్ ప్రాంగణం ముఖ ద్వారం వద్ద కరోనా వైరస్ వ్యాప్తి చెందకుండా డిస్ ఇన్ఫెక్షన్ టన్నెల్ ఏర్పాటు చేశారు. వచ్చీ పోయేవారందరికీ వైరస్ నాశక రసాయనాన్ని తుంపరలు తుంపరలుగా పడేలా చర్యలు తీసుకున్నారు. ఇలాంటి ఏర్పాటుల.. జిల్లాలోనే మొదటిదని ఆర్డీఓ ఉమాదేవి, మునిసిపల్ కమిషనర్ రమేష్లు తెలిపారు.
కర్నూలు జిల్లా నందికొట్కూరులో 3 కరోనా పాజిటివ్ కేసులు నమోదయ్యాయి. సంగయ్యపేటలో మండల పరిధిలో ఒక కేసు నమోదవగా ఆ ప్రాంతాలను రెడ్జోన్లుగా ప్రకటించారు. బందోబస్తును కట్టుదిట్టం చేశామని పోలీసులు తెలిపారు. పాణ్యంలోనూ కరోనా పాజిటివ్ కేసులు నమోదు కావడంపై.. పారిశుద్ధ్య కార్యక్రమాలు చేస్తున్నారు. గడివేముల మండల పరిధిలోని ఆయా ప్రాంతాలను అధికారులు అప్రమత్తం చేశారు. మూడు కిలోమీటర్ల వరకు రెడ్జోన్గా ప్రకటించి పోలీసులు కట్టుదిట్టమైన చర్యలు చేపడుతున్నారు. అధికారులు హైపోక్లోరైడ్ ద్రావణాన్ని పిచికారీ చేయించారు. దుకాణాలను మూసివేసి ప్రజలు ఇళ్లకు పరిమితం కావాలని పోలీసులు వాహనంలో తిరుగుతూ హెచ్చరికలు జారీ చేశారు.
కడప జిల్లా మైదుకూరులో సాయినాథపురానికి చెందిన దంపతులకు కరోనా పాజిటివ్ రావడంతో యంత్రాంగం అప్రమత్తమైంది. వారు ఉంటున్న నివాస ప్రాంత వీధిలో బ్లీచింగ్‌ పొడిని చల్లించారు. హైపో క్లోరైడ్ ద్రావణాన్ని పిచికారీ చేయించారు. ఆ ప్రాంతాన్ని రెడ్ జోన్‌గా ప్రకటించిన అధికారులు.. ఇళ్ల నుంచి ప్రజలు ఎవరూ బయటకు రాకుండా చర్యలు చేపట్టారు. అటు పోలీసులు ఇటు పురపాలిక, వైద్యాధికారులు పర్యవేక్షిస్తున్నారు.
ఇదీ చూడండి:
