కరోనా ఎఫెక్ట్: మూగబోయిన ‘ప్రజా విజ్ఞప్తుల’ కార్యక్రమం

స్పందన.. మీకోసం.. ప్రజా విజ్ఞప్తుల దినం.. పేరు ఏదైనా ఆ కార్యక్రమం లక్ష్యం మాత్రం ఒక్కటే.. ప్రభుత్వం ఏదైనా ఉద్దేశం మాత్రం ఒక్కటే.. తమకు ఎలాంటి ఇబ్బంది ఉన్నా.. ఆరు రోజులు ఓపిగ్గా ఎదురుచూసే బాధితులు సోమవారం రాగానే కార్యాలయాల వద్ద వాలిపోతుంటారు. భూ సంబంధ సమస్యల నుంచి పింఛన్లు, రేషన్‌ కార్డుల వరకు ఎలాంటి సమస్య ఉన్నా అధికారులకు మొరపెట్టుకుంటూ ఉంటారు. కరోనా కారణంగా చాలా రోజులుగా ఆ అవకాశం లేకుండా పోయింది. ఏడు నెలలుగా ప్రక్రియ మూగబోవడంతో పలువురు ఇబ్బంది పడుతున్నారు. ప్రభుత్వం ఎప్పుడు మళ్లీ ఈ కార్యక్రమాన్ని పునరుద్ధరిస్తుందా అని ఆశగా ఎదురుచూస్తున్నారు. ఆన్‌లైన్‌ ద్వారా ‘అవకాశం’ ఇచ్చినా... జిల్లాలో ఆ మేరకు స్పందన కరవు అవడం గమనార్హం.

నెల్లూరు జిల్లాలో ‘స్పందన’ కార్యక్రమ నిర్వహణను మార్చి చివరి వారం నుంచి నిలిపివేశారు. దాంతో అర్జీదారులు అధికారుల వద్దకు వచ్చే అవకాశం లేకుండా పోయింది. అనంతరం కొద్ది రోజులకు ప్రభుత్వం సమస్యపై దృష్టి పెట్టి ఆన్‌లైన్‌ ద్వారా కార్యక్రమం నిర్వహించాలని నిర్ణయించింది. ఆ మేరకు అవకాశం కల్పించినా.. బాధితులకు అవగాహన లేకపోవడం.. వచ్చిన ఫిర్యాదులకు పరిష్కారం దొరక్కపోవడం.. అదే సమయంలో నిర్దేశిత వెబ్‌సైట్‌ పనిచేయకపోవటంతో బాధితులు గోడు చెప్పుకోవడానికి అవకాశం లేకుండా పోతోంది. పట్టాదారు పాసుపుస్తకాల నుంచి మ్యుటేషన్లు, అడంగల్‌ ధ్రువీకరణ పత్రాలకు అవసరం ఉంటోంది. సచివాలయాల ద్వారా సేవలు అందుతున్నా సమస్యలకు పూర్తిస్థాయి పరిష్కారం లభించడం లేదన్నది నిజం. ఈ స్థితిలో ప్రభుత్వం కరోనా నిబంధనలు అమలు చేస్తూనే... ప్రత్యామ్నాయ మార్గాల్లో స్పందన నిర్వహిస్తే బాగుంటుందన్న అభిప్రాయం ప్రజల నుంచి వ్యక్తమవుతోంది.

త్వరలోనే అందుబాటులోకి..

కరోనా కారణంగా స్పందన కార్యక్రమాన్ని రాష్ట్ర ప్రభుత్వం నిలిపివేసింది. ఆన్‌లైన్‌ ద్వారా అభ్యర్థనలు ఇచ్చేందుకు అవకాశం కల్పించగా.. ఇప్పుడు ఆ వెబ్‌సైట్‌ కూడా పనిచేయడం లేదు. త్వరలోనే ఈ సమస్య పరిష్కారమవుతుందని భావిస్తున్నాం. ప్రభుత్వం సైతం నిర్ణయం తీసుకునే అవకాశం ఉంది. ఆదేశాలు రాగానే పూర్తిస్థాయిలో తిరిగి ప్రారంభిస్తాం. - - ఎం.వి.రమణ, డీఆర్వో, నెల్లూరు

నేనూ.. నాలాగే మరికొందరు...

నాకు నాలుగు ఎకరాల భూమి ఉంది. రెండేళ్ల కిందట కొనుగోలు చేశా. 1బి పత్రాలు అందినా.. పాసుపుస్తకం రాలేదు. మంజూరు కోరుతూ అధికారుల చుట్టూ కాళ్లరిగేలా తిరుగుతున్నా ఫలితం లేకుండా ఉంది. ‘స్పందన’లో మొరపెట్టుకుందామంటే, ఇప్పుడు ఆ కార్యక్రమమూ జరగడం లేదు. ప్రభుత్వం ఈ సమస్యపై దృష్టి పెట్టాలి. మా గ్రామంలో నాలాగే రెవెన్యూ సమస్యలతో అనేక మంది బాధపడుతున్నారు. -- బొగ్గల నారాయణరెడ్డి, చేజర్ల కండ్రిగ

అవకాశమే కరవైంది

నాకు ఏడెకరాల భూమి ఉంది. దానికి సంబంధించి అడంగల్, 1బి వంటి రెవెన్యూ ధ్రువీకరణ పత్రాల కోసం రెండున్నర నెలల కిందట దరఖాస్తు చేసుకున్నా. అప్పటి నుంచి కార్యాలయాలు, అధికారుల చుట్టూ తిరుగుతున్నా. ఫలితం లేదు. నాకు వాటి అవసరం చాలా ఉంది. ‘స్పందన’ కార్యక్రమం ఉంటే.. అక్కడ ఫిర్యాదు చేసేవాణ్ని. ఆ మేరకు అధికారులు రసీదు ఇచ్చేవారు. ప్రతి ఫిర్యాదుకూ జవాబుదారీతనం ఉండేది. ఇప్పుడు ఆ పరిస్థితి లేదు. సచివాలయాల ద్వారా ఆ పత్రాలు అందడం గగనంగా మారింది. మా గోడు చెప్పుకనే అవకాశమే కరవైంది. -- గండికోట తిరుపతయ్య, రుద్రకోట, కావలి మండలం

ఇవీ చదవండి..