‘గత ఏడాది మార్చి 23న జరగాల్సిన మున్సిపల్ ఎన్నికలు వాయిదా పడిన విషయం తెలిసిందే. నామినేషన్లు దాఖలు చేసిన అనంతరం ఎన్నికలను ఎస్‌ఈసీ నిలుపుదల చేసింది. గత ఏడాది మార్చి 9న ఎన్నికల ప్రకటన వచ్చింది. మార్చి 11 నుంచి 13 వరకు నామినేషన్లు స్వీకరించారు. 14న పరిశీలన, 16 వరకు ఉప సంహరణకు అవకాశం ఇచ్చారు. కానీ, 13వ తేదీ సాయంత్రం ఎన్నికలను నిలుపుదల చేస్తున్నట్లు ఈసీ ప్రకటించింది. తాజాగా సోమవారం రాష్ట్ర ఎన్నికల సంఘం షెడ్యూల్‌ విడుదల చేయడంతో పట్టణాల్లో కోలాహలం మొదలైంది.’
నెల్లూరులో పురపోరుకు రంగం సిద్ధమైంది. ఓ వైపు పంచాయతీ ఎన్నికలు జరుగుతుండగానే... కరోనా కారణంగా వాయిదా పడిన మున్సిపల్ ఎన్నికలను మార్చి పదో తేదీన నిర్వహిస్తున్నట్లు ఎస్‌ఈసీ ప్రకటించింది. గత ఏడాది ప్రక్రియ ఎక్కడ నిలిచిందో.. అక్కడి నుంచే కొనసాగించేలా ఉత్తర్వులు వెలువరించడంతో పట్టణాల్లో కోలాహలం మొదలైంది. అప్పుడే అధికార, ప్రతిపక్ష పార్టీలు రంగంలోకి దిగగా- నామినేషన్‌ వేసిన అభ్యర్థులు ప్రచారాన్ని ముమ్మరం చేసే పనిలో ఉన్నారు. ప్రచార రథాలను తిప్పేందుకు పోలీసులకు దరఖాస్తులు చేస్తున్నారు. జిల్లాలో నెల్లూరు నగరపాలక సంస్థతో పాటు కావలి, గూడూరు, ఆత్మకూరు, సూళ్లూరుపేట, నాయుడుపేట, వెంకటగిరి మున్సిపాలిటీలు, బుచ్చిరెడ్డిపాళెం, అల్లూరు నగర పంచాయతీలు ఉండగా- వీటిలో కేవలం నాలుగు మున్సిపాలిటీల్లో మాత్రమే ఎన్నికలు జరగనున్నాయి. సూళ్లూరుపేట స్థానం జనరల్‌ కాగా, నాయుడుపేట మున్సిపాలిటీని ఎస్సీలకు కేటాయించారు. వెంకటగిరి బీసీ మహిళకు, ఆత్మకూరు ఎస్టీ జనరల్‌కు రిజర్వు అయింది. ఈ నాలుగు పురపాలికల్లోని 98 వార్డు స్థానాలకు వివిధ రాజకీయ పక్షాల అభ్యర్థులుగా, స్వతంత్రులుగా 568 మంది అప్పట్లో నామినేషన్‌ వేశారు. వాటిలో 25 తిరస్కరించారు. అనంతరం ఉపసంహరణ దశలో ఎన్నికలు వాయిదా పడ్డాయి. దీంతో చాలా స్థానాల్లో అభ్యర్థులు ఎవరనేది తేలలేదు. పలు స్థానాల్లో ఒకే పార్టీ నుంచి ఇద్దరు, ముగ్గురు పోటీ చేసేందుకు మొగ్గుచూపుతుండటం స్థానిక నాయకులకు తలనొప్పిగా తయారైంది. మార్చి పదో తేదీ పురపాలక ఎన్నికలు నిర్వహించనుండటంతో గతంలో వేసిన నామినేషన్లను ఉపసంహరించుకునేందుకు మార్చి మూడో తేదీ మధ్యాహ్నం 3 గంటల వరకు సమయమిచ్చారు. దీంతో అధికార, ప్రతిపక్ష పార్టీల అభ్యర్థులు ప్రచార రంగంలోకి దిగారు.
ఇక్కడ ఎందుకు లేవంటే...
కొత్త ప్రాంతాలు, గ్రామాల విలీనం, వార్డుల పునర్‌ వ్యవస్థీకరణపై అభ్యంతరాలు, న్యాయస్థానాల్లో కేసుల దృష్ట్యా నెల్లూరు నగరపాలక సంస్థతో పాటు రెండు మున్సిపాలిటీలు, రెండు నగర పంచాయతీలకు ఎన్నికలు జరపరాదని.. అప్పట్లో ఎన్నికల సంఘం నిర్ణయించింది. ప్రస్తుతం అదే నోటిఫికేషన్‌ను కొనసాగిస్తుండటంతో కావలి, గూడూరు పురపాలక సంఘాలు, అల్లూరు, బుచ్చిరెడ్డిపాళెం నగర పంచాయతీలకు ఎన్నికలు జరగడం లేదు.
నెల్లూరు నగరపాలక సంస్థలో మొత్తం 54 డివిజన్లు ఉండగా- ఎన్నికల కోసం 2019 డిసెంబరులో డివిజన్ల వారీగా ప్రకటించిన ఓటర్లు, పోలింగ్‌ బూత్‌ల వివరాలు సక్రమంగా లేవు. డివిజన్ల జాబితాలను అసెంబ్లీ ఓటర్ల జాబితాల నుంచి విభజించి ఏర్పాటు చేశారు. దీంతో ఒకటో డివిజన్‌లో 16,563 మంది ఓటర్లుంటే.. 44వ డివిజన్‌లో 5,515 మంది మాత్రమే ఉన్నారు. ఇలాంటి వాటిపై అభ్యంతరాలు వ్యక్తం చేస్తూ.. తెదేపా కార్పొరేటర్లు కోర్టును ఆశ్రయించారు. దాన్ని పరిశీలించిన న్యాయస్థానం 2020 ఫిబ్రవరిలో రద్దు చేసి అభ్యంతరాలను చక్కదిద్దాలని సూచించింది. అలా ఎన్నికలకు ఆటంకం ఏర్పడింది. ప్రస్తుతం కొత్తగా నోటిఫికేషన్‌ ఇచ్చినా.. నెల్లూరు నగరపాలక సంస్థ పరిధిలో నిర్వహించే పరిస్థితి లేదు. గతంలో తెలిపిన అభ్యంతరాలను పరిగణనలోకి తీసుకుని, రాజకీయ పార్టీల సలహాలు, సూచనలు పరిశీలించి.. ఓటర్లు, వార్డుల విభజన చేయాల్సి ఉంది. ఇదేమీ లేకుండా గత ఏడాది డిసెంబరు 22న హడావుడిగా గతంలో కోర్టు రద్దు చేసిన నమూనానే నగరపాలక సంస్థ అధికారులు తిరిగి ప్రచురించారన్న ఆరోపణలు ఉన్నాయి.
చెన్నూరు, నెల్లటూరు, దివిపాలెం, పోటుపాలెం, చిల్లకూరు గ్రామాలను గూడురు పురపాలక సంస్థలో విలీనం చేస్తూ ప్రభుత్వం నిర్ణయం తీసుకుంది. దీనిపై అభ్యంతరాలున్న కొందరు కోర్టును ఆశ్రయించడంతో ఎన్నికల ప్రక్రియ వాయిదా పడింది. అలాగే, కావలికి సుమారు 10-11కి.మీ.ల దూరంలో చౌదరిపాలెం పంచాయతీని మున్సిపాలిటీలో విలీనం చేస్తూ ప్రభుత్వం తీసుకున్న నిర్ణయాన్ని సవాలు చూస్తూ ఆ గ్రామస్థులు హైకోర్టును ఆశ్రయించారు. బుచ్చిరెడ్డిపాలెం, అల్లూరు నగర పంచాయతీలు నూతనంగా ఏర్పడటంతో ఎన్నికలకు దూరమయ్యాయి.
