Farmers Concerns for Water in Nellore District : ఆరుగాలం శ్రమించి పండించిన పంట కళ్లముందే నీరు లేక ఎండిపోతుంటే రైతులు విలవిల పోతున్నారు. తక్షణమే నీరు విడుదల చేయకుంటే తమకు ఆత్మహత్యలే శరణ్యమని రైతులు కన్నీళ్లుపెడుతున్నారు. సాగునీటి విడుదల చేయాలంటూ నెల్లూరు జిల్లా చేజర్ల మండలం నాగుల వెల్లటూరు రైతులు రోడ్డెక్కారు. సోమశిల జలాశయం నుంచి నీటిని విడుదల చేయాలని డిమాండ్ చేస్తూ రహదారిపైనే బైఠాయించారు. ఎండిపోతున్న వరి నారును తీసుకొని వచ్చి నిరసనలు తెలిపారు. నీరు విడుదల చేయకుంటే తమకు ఆత్మహత్యలే శరణ్యమని పురుగుల మందు డబ్బాలతో ఆందోళనకు దిగారు.
నీరు అందక ఎండిపోతున్న పంటలు - ఆవేదనతో పశువుల్ని మేపుతున్న రైతులు
చేజర్ల మండలంలోని నాగుల వెల్లటూరు, ఎదనపత్తి, చినగోపవరం, పెదగోపవరం, ఎర్రగుట్లపల్లి గ్రామాల్లో సుమారు పదివేల ఎకరాల్లో వరి నాట్లు ఎండిపోతున్నాయని రైతులు ఆవేదన వ్యక్తం చేశారు. అధికారులు, ప్రజాప్రతినిధుల చుట్టూ తిరిగినా ఫలితం లేకనే రోడ్డెక్కామని వాపోయారు. రహదారిపై బైఠాయించి వంట వార్పు చేపట్టడంతో ఆ మార్గంలో రాకపోకలు నిలిచిపోయాయి. సోమశిల జలాశయం నుంచి సాగునీటి అవసరాల కోసం దక్షిణ కాలువ ద్వారా నీరు విడుదల చేయలని డిమాండ్ చేశారు. నీటిని విడుదల చేసెంతవరకు ఇక్కడ నుంచి కదిలేదీ లేదంటూ ఆందోళనలు చేశారు. అధికారుల నీటిని విడుదల చేయకుంటే తమకు ఆత్మహత్యే శరణం అంటూ పురుగుల మందు డబ్బాలతో రైతులు ఆవేదన వ్యక్తం చేశారు. నీరులేక పొలంలో ఎండుతున్న వరి నారును చూపించి వాపోయారు. వెంటనే దక్షిణ కాలువకు నీటిని విడుదల చేయాలని డిమాండ్ చేశారు.
