కరోనా కారణంగా రాష్ట్రవ్యాప్తంగా మూతపడిన ఆలయాల తలుపులు ఇవాళ తెరుచుకుంటున్నాయి. వైరస్ వ్యాప్తిని నియంత్రించేలా ఆయా ఆలయాల అధికారులు తగిన జాగ్రత్తలు తీసుకుంటున్నారు. బెజవాడ దుర్గ గుడిలో సోమవారం,మంగళవారం ఆలయ సిబ్బంది, స్థానికులతో ట్రయల్ రన్ నిర్వహించి బుధవారం నుంచి భక్తులను దర్శనానికి అనుమతిస్తామని ఆలయపాలక మండలి ఛైర్మన్ పైలా సోమినాయుడు వెల్లడించారు. నిత్యం ఉదయం 6 గంటల నుంచి సాయంత్రం 5 గంటల వరకు దర్శనం ఉంటుందని స్పష్టం చేశారు.
ఆలయాలకు వచ్చే భక్తులు అన్నిరకాల జాగ్రత్తలు తీసుకోవాలని తూర్పుగోదావరి జిల్లా అధికారులు సూచించారు. మాస్క్ ధరించిన వారిని మాత్రమే దర్శనానికి అనుమతించాలని సిబ్బందిని ఆదేశించారు. అన్నవరం ఆలయంలో దర్శనాలు ప్రయోగాత్మకంగా ప్రారంభిస్తున్నా కొండపై దుకాణాలు తెరిచేందుకు వ్యాపారాలు నిరాసక్తత కనబరుస్తున్నారు. కరోనా వ్యాప్తి, నిబంధనలతో భక్తుల రాక తగ్గే పరిస్థితుల్లో వ్యాపారులు చేయలేమని తెలిపారు. అయినవిల్లి సిద్ధి వినాయకుడి ఆలయం రెడ్ జోన్లో ఉండడం వల్ల గణేశుడి భక్తులకు నిరీక్షణ తప్పేలా లేదు.
300 మంది మాత్రమే..!
పశ్చిమగోదావరి జిల్లా ద్వారకాతిరుమల శేషాచలం కొండపై కొలువైన చిన్న వెంకన్న దర్శనానికి ఆలయ సిబ్బంది, స్థానికులను అనుమతిస్తున్నారు. ఈనెల 10 నుంచి.... సామాన్య భక్తులకు దర్శనభాగ్యం కలగనుంది. గంటకు 300 మందిని మాత్రమే అనుమతిస్తామని ఈవో తెలిపారు.
విశాఖ సింహగిరి అప్పన్న ఆలయం
విశాఖ సింహగిరి అప్పన్న ఆలయంలో 2 రోజులపాటు ట్రయల్ రన్ నిర్వహించనున్నారు. భౌతికదూరం పాటించేలా క్యూలైన్లు ఏర్పాటు చేశారు. విజయనగరం జిల్లాలో ఆలయాలు, మందిరాల్లో తీసుకోవాల్సిన జాగ్రత్తలను మత పెద్దలు, దేవాలయ కమిటీ సభ్యులు, చర్చి ఫాదర్స్కు ఎస్పీ రాజకుమారి వివరించారు.
ఇవీ చదవండి
