ఫేస్బుక్ పరిచయం బంగారు నగల చోరీకి దారితీసింది. కృష్ణా జిల్లా నూజివీడు మండలం తూర్పు దిగవల్లి గ్రామంలో జరిగిన ఈ చోరీని పోలీసులు చాకచక్యంతో ఛేదించారు. డీఎస్పీ బి.శ్రీనివాసులు తెలిపిన వివరాల ప్రకారం...నూజివీడు మండలం తూర్పు దిగవల్లి గ్రామానికి చెందిన వసంత శ్రీ, ఆమె భర్తకు ఫేస్బుక్లో ఖమ్మం జిల్లా మధిర పట్టణానికి చెందిన కర్నాటి ప్రవీణ్ పరిచయం అయ్యాడు. ఫేస్బుక్ పరిచయంతో కర్నాటి ప్రవీణ్ వసంతశ్రీ వాళ్ల ఇంటికి అప్పుడప్పుడు వస్తుండేవాడు. అలా ఇంటికి వచ్చినప్పుడు సుమారు రూ. 3 లక్షల విలువైన బంగారు ఆభరణాలను చోరీ చేశాడు.
ఈ నెల 1వ తేదీన బంగారు నగలు చోరీకి గురైనట్లు వసంత శ్రీ, ఆమె భర్త పోలీసులకు ఫిర్యాదు చేశారు. విచారణ చేపట్టిన పోలీసులు.. ఫేస్బుక్ కర్నాటి ప్రవీణ్ నిందితుడని నిర్ధారణ చేశారు. నూజివీడు శివాలయం వద్ద ప్రవీణ్ను పట్టుకున్న పోలీసులు.. అతని వద్ద నుంచి నగలు స్వాధీనం చేసుకున్నారు. ఈ కేసు విచారణలో చాకచక్యంగా వ్యవహరించిన నూజివీడు గ్రామీణ ఎస్సై సీహెచ్ రంజిత్ కుమార్, సిబ్బందిని డీఎస్పీ శ్రీనివాసులు అభినందించారు.
ఇదీ చదవండి : రాష్ట్రంలో కొత్తగా 4,038 కరోనా కేసులు
