ఆటోలో వెళ్తుంటే హెల్మెట్‌ లేదట...

మీరు ఆటోడ్రైవరా? అయితే... ఆటో నడుపుతున్నప్పుడు శిరస్త్రాణం పెట్టుకోండి. లేదంటే జరిమానా తప్పదు. అదేంటని ఆశ్చర్యపోతున్నారా ? విజయవాడలో అంతే..

ఆటో నడిపేవాళ్లు హెల్మెట్‌ ధరించాలట. లేదంటే చలానా కట్టాల్సివస్తుంది. వినడానికి వింతగా ఉన్నా... ఇది విజయవాడ ట్రాఫిక్‌ పోలీసుల రూలు. రవాణాశాఖ నిబంధనల్లో లేకపోయినా... ట్రాఫిక్‌ పోలీసులు ఆచరిస్తున్న తీరు ఇది.

ఏపీ 16టిఎస్ 8597 నంబరున్న ఆటోపై... విజయవాడ మూడో పట్టణ ట్రాఫిక్ పోలీసులు చలానా విధించారు. ఆ డ్రైవర్... ఆన్ లైన్‌లో చలానా చూసుకుని నివ్వెరపోయాడు. ఆటో నడుపుతుండగా హెల్మెట్ పెట్టుకోలేదని అందులో రాసి ఉంది. సాధారణంగా... చలానాతోపాటు, ట్రాఫిక్ పోలీసులు తీసిన ఫొటో జత చేస్తారు. ఆన్ లైన్‌లో చలానా పొందుపరిచేటప్పుడు... ఆ ఫొటోనూ పొందుపరుస్తారు. ఫొటోలో ఆటో స్పష్టంగా కనిపిస్తున్నా... హెల్మెట్‌ లేదని ఛలానా రాయడం విశేషం.

దీనిపై పోలీసులను వివరణ కోరితే సాంకేతిక లోపం కారణంగా తప్పులు జరుగుతాయని.. తమ దృష్టికి తెస్తే సమస్య పరిష్కరిస్తామని చెప్పుకొచ్చారు.