DSP Transfers Disputes In YSRCP: రాష్ట్రంలో DSPల బదిలీలు అధికార వైసీపీలో మంటలు రాజేశాయి. అత్యంత సీనియర్ మంత్రి నుంచి తొలిసారి ఎన్నికైన MLA వరకూ.. పలువురు ఈ బదిలీలను వ్యతిరేకిస్తున్నారు. కొందరు కొత్తవారిని చేరనివ్వడం లేదు. మరికొందరు.. ఉన్నవారిని రిలీవ్ కానివ్వడం లేదు. ఇలాంటి పరిస్థితుల్లో ఈ బదిలీలపై గందరగోళం నెలకొంది. బదిలీల్లో తమను పరిగణనలోకి తీసుకోలేదని కొందరు మంత్రులు అనధికారిక చర్చల్లో అసంతృప్తి వ్యక్తం చేస్తున్నారు.
ఉత్తరాంధ్రలో ఒక DSP నియామకంపై ఓ మంత్రి నేరుగా.. DGPతోనే సీరియస్‌గా మాట్లాడినట్లు సమాచారం. కనీస సమాచారం లేకుండా డీఎస్పీని వేయడానికి మీరెవరు? ఇక్కడ పరిస్థితులేంటో తెలుసా? ఇక్కడ రాజకీయాలు చేయాల్సింది మేము, మీ ఇష్టం వచ్చినవాళ్లను వేస్తామంటే ఎలా? అని ఆ మంత్రి గట్టిగానే మాట్లాడినట్లు వైసీపీ వర్గాల్లో చర్చ జరుగుతోంది.
ఇదే ప్రాంతంలో మరో మంత్రి డీఎస్పీగా ఒక అధికారి పేరును ప్రతిపాదించగా.. ఆయన్ను కాదని మరొకరిని పంపారు. దీన్ని జీర్ణించుకోలేకపోయిన ఆ మంత్రి.. భోగాపురం, విశాఖలో ముఖ్యమంత్రి పర్యటనలో అంటీముట్టనట్లుగా పాల్గొనడం చర్చనీయాంశమైంది. ఆదోని ASPగా.. ఐపీఎస్ అధికారి అధిరాజ్ సింగ్ రాణాను నియమించారు. ఆయన బాధ్యతలు స్వీకరించిన అరగంటకే అక్కడి నుంచి వెళ్లిపోయారు. అంతకుముందు నుంచి అక్కడ డీఎస్పీగా ఉన్న వినోద్ కుమారే ఇప్పుడు కొనసాగుతున్నారు.
కర్నూలు జిల్లాలో ఒక డీఎస్పీ కోసం ఇద్దరు ఎమ్మెల్యేలు లేఖ ఇవ్వగా.. ఆయన్ను కాదని మరో వ్యక్తిని డీఎస్పీగా నియమించారు. NTR, కృష్ణా జిల్లాల్లో ఇద్దరు డీఎస్సీల నియామకంపై కొందరు ఎమ్మెల్యేలు, ఒక మంత్రి అసంతృప్తిగా ఉన్నారు. ఒక డీఎస్పీ పోస్టులో కొత్తగా నియమితులైన అధికారి ఇప్పటివరకూ చేరలేదు.
ప్రకాశం జిల్లా ఒంగోలు డీఎస్పీగా అశోక వర్దన్‌రెడ్డి.. గురువారం రాత్రి 8 గంటల సమయంలో బాధ్యతలు స్వీకరించారు. అప్పటివరకు బాధ్యతలు నిర్వహిస్తున్న నాగరాజు, ఆయన కార్యాలయ సిబ్బంది పుష్పగుచ్ఛంతో నూతన డీఎస్పీని స్వాగతించారు. సిమ్‌కార్డు కూడా అందజేశారు. గంటల్లోనే పరిస్థితులు మారిపోయాయి. అశోకవర్ధన్ తప్పుకోవాలని, త్వరలో కొత్త డీఎస్పీని నియమిస్తారని మౌఖిక ఆదేశాలు వచ్చినట్లు సమాచారం.
ఈ నియామకంపైనే.. మాజీమంత్రి బాలినేని శ్రీనివాసరెడ్డి ఇటీవల ముఖ్యమంత్రిని కలిసినప్పుడు సీఎంఓలో గట్టిగా ప్రస్తావించారని తెలుస్తోంది. మంత్రిగా తొలగించినా, జిల్లాలో మీరే అనధికారికంగా మంత్రి, ఆ గౌరవం తగ్గకుండా ఉంటుందని చెప్పి.. చివరకు ఒక డీఎస్పీని కూడా నేను అడిగిన వ్యక్తిని ఇవ్వలేదని.. ఏంటి మీ ఉద్దేశమంటూ బాలినేని శ్రీనివాసరెడ్డి సీఎంఓలోని కీలక అధికారిపై తీవ్ర అసహనం వ్యక్తం చేసినట్లు సమాచారం.
డీఎస్సీల బదిలీల విషయంలో మంత్రులు, వైసీపీ ఎమ్మెల్యేలు ప్రధానంగా..ఆ పార్టీలో కీలకనేత, ముఖ్యమంత్రి కార్యాలయంలో ముఖ్య అధికారి, పోలీసు బాస్.. ఈ ముగ్గురిపై అసహనం వ్యక్తం చేస్తున్నారు. జిల్లాల్లో ఏ అధికారి ఎక్కడుంటే బాగుంటుందో క్షేత్రస్థాయిలో ఉన్న మాకు తెలుసు కానీ, ఈ ముగ్గురి పెత్తనమేంటి? మేం ప్రతిపాదించిన వారిని కాదని, వాళ్లకు నచ్చిన.. వారినే నియమిస్తామంటే మేమెందుకని అసహనం వ్యక్తం చేస్తున్నారు.
ఇవీ చదవండి:
