ఎమ్మెల్యే - మాజీ ఎమ్మెల్యే అనుచరుల మధ్య వర్గపోరు

చిలకలూరిపేట ఎమ్మెల్యే విడదల రజని, మాజీ ఎమ్మెల్యే మర్రి రాజశేఖర్ వర్గాల మధ్య పోరు బయటపడింది. రెండు వర్గాల వారు ఒకరిపై ఒకరు దాడికి దిగారు. బాధితులు ప్రభుత్వ ఆసుపత్రిలో చికిత్స పొందుతున్నారు.

గుంటూరు జిల్లా చిలకలూరిపేట నియోజకవర్గంలో... వైకాపా ఎమ్మెల్యే విడదల రజని, మాజీ ఎమ్మెల్యే మర్రి రాజశేఖర్ వర్గాల మధ్య వర్గపోరు భగ్గుమంది. నాదెండ్ల మండల పరిధి సాతులూరులో రెండు వర్గాల వారు పరస్పరం దాడి చేసుకున్నారు. ఎమ్మెల్యే వర్గానికి చెందిన ప్రసాదరావు.. మీ సేవ కేంద్రం నిర్వహిస్తున్నారు. మర్రి వర్గానికి చెందినవారూ అదే ప్రాంతంలో మీసేవ కేంద్రం ఏర్పాటుకు ప్రయత్నించటం వివాదానికి కారణమైంది. ఈ నేపథ్యంలో.. పరస్పర దాడులు చేసుకోగా.. వరప్రసాద్ గాయపడ్డారు. ఆయనను చిలకలూరిపేట ప్రభుత్వ ఆస్పత్రికి తరలించి చికిత్స అందిస్తున్నారు.