HC SERIOUS ON CI: న్యాయవాది ఉదయ్‌ సింహారెడ్డి, కోర్టు సిబ్బంది శివశంకర్‌పై.. హిందూపురం 1వ పట్టణ పోలీస్‌స్టేషన్‌ సీఐ ఇస్మాయిల్ చేయిచేసుకోవడాన్ని హైకోర్టు తీవ్రంగా ఆక్షేపించింది. ఠాణాకు వెళ్లేందుకు న్యాయవాదులు భయపడితే ఆ రోజు వ్యవస్థ పతనమైనట్లేనని.. ఘాటుగా వ్యాఖ్యానించింది. న్యాయవ్యవస్థను గౌరవించాల్సిన బాధ్యత అందరిపైనా ఉందని ధర్మాసనం పేర్కొంది. కోర్టు సిబ్బందిని భయపెట్టేందుకే పోలీసులు క్రిమినల్‌ కేసు నమోదు చేశారని.., ఆ తర్వాత పొరపాటు జరిగిందని చెబుతూ కేసును మూసివేశారని గుర్తుచేసింది. ఆయన వ్యవహార శైలి ఏవిధంగా ఆమోదయోగ్యమని ధర్మాసనం ప్రశ్నించింది. సీఐపై సంబంధిత డీఐజీ ఎలాంటి క్రమశిక్షణ చర్యలు తీసుకుంటారో కొంత కాలం వేచిచూద్దామని పేర్కొంటూ.. విచారణను ఆగస్టు 16కు వాయిదా వేసింది. ఆ రోజు విచారణకు సీఐ ఇస్మాయిల్ హాజరుకావాల్సిందేనని తేల్చిచెప్పింది.
HC SERIOUS ON CI: అధికార పార్టీ నేతలకు కొమ్ము కాస్తూ.. అమాయకులను చితకబాదుతూ..
ఇదీ జరిగింది.. గతేడాది అక్టోబర్లో దొంగతనం ఆరోపణతో గిరీష్ అనే వ్యక్తిని హిందూపురం పోలీసు స్టేషన్కు తీసుకొచ్చిన సీఐ ఇస్మాయిల్.. విచక్షణారహితంగా కొట్టారు. దీంతో తన కుమారుడిని అక్రమ నిర్బంధంలో హింసిస్తున్నారని నిందితుడి తల్లి స్థానిక కోర్టును ఆశ్రయించారు. దీనిపై హిందూపురం కోర్టు.. అడ్వకేట్ కమిషన్‌ను ఏర్పాటు చేసి పోలీసు స్టేషన్లోని నిందితుడిని కోర్టు ఎదుట హాజరుపరచాలని ఆదేశించింది. అక్రమ నిర్బంధంలో ఉన్న గిరీష్ కోసం అడ్వకేట్ కమిషన్ సభ్యులు, న్యాయవాదులు 2022 అక్టోబర్ 21న ఠాణాకు వెళ్లారు. ఆ సమయంలో గిరీష్ అక్రమ నిర్బంధంలో ఉన్నట్లు, పోలీసులు అతడిని కొట్టినట్లు అడ్వకేట్ కమిషనర్‌ గమనించారు. అతన్ని కోర్టు ముందు హాజరుపరిచేందుకు తీసుకెల్తానని చెప్పగా.. అందుకు సీఐ ఇస్మాయిల్ నిరాకరించారు.
ఈ క్రమంలో అడ్వకేట్ కమిషనర్‌పై సీఐ చేయి చేసుకున్నారు. అంతటితో ఆగకుండా కమిషన్ అధికారి సహాయకుడిగా వెళ్లిన కోర్టు సిబ్బందిపై కూడా అక్రమ కేసు పెట్టారు. ఆ తర్వాత కోర్టు ఆదేశాల మేరకు గిరీష్‌ను కోర్టు ముందు హాజరుపరిచారు. అతడికి వైద్య పరీక్షలు చేయించగా.. పోలీసులు చిత్రహింసలకు గురిచేసినట్లు తేలింది. ఈ వ్యవహారంలో సీఐ ఇస్మాయిల్పై చర్యలు తీసుకోవాలని ప్రిన్సిపల్‌ జూనియర్‌ సివిల్‌ జడ్జి.. పోలీసు ఉన్నతాధికారులకు లేఖ రాశారు. ఆ లేఖ ప్రతులను డీఐజీతోపాటు జిల్లా ప్రధాన న్యాయమూర్తికి కూడా పంపించారు. ఇంత జరిగినా సీఐని.. కనీసం సస్పెండ్ కూడా చేయలేదు. కాగా హిందూపురం పోలీసు స్టేషన్లో జరిగిన ఈ ఘటనపై హైకోర్టు ఇటీవల జరిపిన విచారణలో తీవ్రంగా స్పందించి.. సీఐ ఇస్మాయిల్ వ్యవహరించిన తీరుపై మండిపడింది.
AP High Court: జ్యుడీషియల్‌ అధికారిని బెదిరించడానికి ఎంత ధైర్యం?.. సీఐపై హైకోర్టు ఆగ్రహం
ఈ వ్యవహారం హైకోర్టు రిజిస్ట్రార్‌ విజిలెన్స్‌కు చేరింది. ఆ సమయంలో అనంతపురం జిల్లా అడ్మినిస్ట్రేటివ్‌ జడ్జిగా ఉన్న హైకోర్టు అప్పటి న్యాయమూర్తి జస్టిస్‌ బట్టు దేవానంద్‌.. ఇది చాలా తీవ్రమైన వ్యవహారంగా పరిగణించారు. న్యాయవ్యవస్థ హుందాతనాన్ని కాపాడేందుకు ఈ అంశాన్ని సుమోటో పిల్‌గా పరిగణించాలని నిర్దేశించారు. పిల్‌ను కమిటీ ముందు ఉంచేందుకు ఈ వ్యవహారాన్ని హైకోర్టు సీజే దృష్టికి తీసుకెళ్లాలని రిజిస్ట్రీని ఆదేశించారు. ఈ వ్యవహారాన్ని హైకోర్టు సుమోటో పిల్‌, కోర్టుధిక్కరణ వ్యాజ్యాలుగా మలిచి విచారణ చేస్తోంది. కోర్టు ఆదేశాల మేరకు హిందూపురం సీఐ ఇస్మాయిల్ బుధవారం విచారణకు హాజరయ్యారు. ఈ కేసులో కోర్టుకు సహాయకారిగా వ్యవహరిస్తున్న అడ్వొకేట్‌ జనరల్‌ శ్రీరామ్‌ వాదనలు వినిపిస్తూ.. సీఐ ఇస్మాయిల్కు విధించిన స్వల్ప శిక్షను పెద్ద శిక్షగా మార్చినట్లు తెలిపారు. పోలీసుల తరఫున ప్రభుత్వ ప్రత్యేక న్యాయవాది సుమన్‌ తన వాదనలు వినిపిస్తూ.. క్రమశిక్షణ చర్యలు తీసుకునే వ్యవహారం ఇంకా డీఐజీ పరిధిలో ఉందన్నని తెలిపారు. ఆ వివరాలను పరిగణనలోకి తీసుకున్న ధర్మాసనం విచారణను ఆగస్టు 16కు వాయిదా వేసింది.
BJP leaders protest: సీఐ ఇస్మాయిల్ను సస్పెండ్ చేయాలి: భాజపా
