Lokesh Padha Yatra Issue: భారత రాజ్యాంగం కల్పించిన భావ ప్రకటన స్వేచ్ఛ, శాంతియుతంగా సమావేశాలు నిర్వహించుకునే హక్కు వంటివి అధికార పార్టీకే పరిమితమా? ప్రతిపక్షాలకు, ప్రజాసంఘాలకు, సమస్యలపై గళమెత్తే వర్గాలకు ఆ హక్కులుండవా? టీడీపీ ప్రధాన కార్యదర్శి నారా లోకేశ్‌ ఈ నెల 27 నుంచి తలపెట్టిన పాదయాత్రకు పోలీసులు ఇప్పటివరకు అనుమతులివ్వలేదు సరికదా.. గతంలో ఎన్నడూ లేనివిధంగా, ఇప్పటివరకూ ఏ నాయకుడు పాదయాత్ర చేసినప్పుడూ అడగని రీతిలో అనేక వివరాలు కోరుతూ రాష్ట్ర డీజీపీ రాజేంద్రనాథరెడ్డి టీడీపీ పొలిట్‌బ్యూరో సభ్యుడు వర్ల రామయ్యకు శనివారం లేఖ రాయడంపై రాజకీయ వర్గాలు విస్మయం వ్యక్తం చేస్తున్నాయి. పాదయాత్రలో ఎంతమంది పాల్గొంటారు? వారి వివరాలేంటి? రాత్రుళ్లు ఎక్కడ బస చేస్తారు? ఇలా డీజీపీ అనేక యక్ష ప్రశ్నలు వేయడం, ఆ వివరాలన్నీ ఆదివారం ఉదయం 11 గంటలకల్లా తమకు అందజేయాలంటూ, శనివారం సాయంత్రం లేఖ రాయడం చూస్తుంటే.. ఏదో ఒక సాకుతో లోకేశ్‌ పాదయాత్రకు అనుమతి నిరాకరించాలన్నదే పోలీసుల వ్యూహంగా కనిపిస్తోందన్న అభిప్రాయం రాజకీయ వర్గాల్లో వ్యక్తమవుతోంది.
విపక్షాల ముందరి కాళ్లకు బంధం వేయడానికి జీవో 1 తీసుకొచ్చిన రాష్ట్ర ప్రభుత్వం.. అది వివాదాస్పదం కావడం, దానిపై కోర్టులో కేసు ఉండటంతో, అసాధ్యమైన వివరాల్ని పోలీసులతో అడిగించడం ద్వారా పాదయాత్రకు అనుమతివ్వరాదన్న ఎత్తుగడ వేసిందని ఆ వర్గాలంటున్నాయి. ముఖ్యమంత్రి జగన్‌ గతంలో ప్రతిపక్ష నేతగా పాదయాత్ర చేసినప్పుడు.. అనుమతి తీసుకోవాలని పోలీసులు కోరినా, ఆ అవసరమే తమకు లేదని అప్పటి వైసీపీ ఎంపీ వైవీ సుబ్బారెడ్డి బదులివ్వడం, జగన్‌ పాదయాత్రపై కేవలం పోలీసులకు సమాచారం మాత్రం ఇస్తూ.. ఆయన వ్యక్తిగత కార్యదర్శి పి.కృష్ణమోహన్‌రెడ్డి అప్పటి డీజీపీకి హైదరాబాద్‌లోని వైసీపీ కార్యాలయం నుంచి ఒక లేఖ రాయడాన్ని రాజకీయవర్గాలు గుర్తుచేస్తున్నాయి. అప్పట్లో వైవీ సుబ్బారెడ్డి పోలీసులకు చెప్పిన సమాధానంపై ‘సాక్షి’ పత్రికలో వచ్చిన కథనాన్ని, జగన్‌ వ్యక్తిగత కార్యదర్శి డీజీపీకి రాసిన లేఖను టీడీపీ వర్గాలు సామాజిక మాధ్యమాల్లో విడుదల చేశాయి.
చరిత్రలో ఎప్పుడైనా విన్నామా?: భారత రాజ్యాంగం దేశ పౌరులందరికీ భావప్రకటన స్వేచ్ఛ వంటి హక్కుల్ని సమానంగా కల్పిస్తే.. ఏపీ పోలీసులు మాత్రం కుదరదంటున్నారు. రాష్ట్రంలో భావప్రకటన స్వేచ్ఛ, శాంతియుతంగా సమావేశాలు, సభలు, ప్రదర్శనలు నిర్వహించుకునే హక్కు వంటివి కేవలం అధికారపార్టీకే వర్తిస్తాయన్నట్టుగా వ్యవహరిస్తున్నారు. టీడీపీ వర్గాలు వెల్లడించిన వివరాల ప్రకారం.. లోకేశ్‌ పాదయాత్రకు అనుమతి కోరుతూ ఆ పార్టీ జాతీయ ప్రధాన కార్యదర్శి హోదాలో వర్ల రామయ్య ఈ నెల 9నే డీజీపీకి, రాష్ట్ర హోం శాఖ కార్యదర్శికి లేఖలు రాశారు. 9న ఇ-మెయిల్‌లో ఆ లేఖలు పంపారు. 10న డీజీపీ, 11న హోం శాఖ కార్యదర్శి కార్యాలయాల్లో హార్డ్‌ కాపీలు అందజేశారు. ఈ నెల 10న, మళ్లీ 18న పలమనేరు డీఎస్పీకి టీడీపీ లేఖలు రాసింది. కుప్పం, పూతలపట్టు, చిత్తూరు డీఎస్పీలకూ లేఖలు రాశారు. పాదయాత్ర గడువు దగ్గర పడుతున్నా పోలీసుల నుంచి ఉలుకూ పలుకూ లేకపోవడంతో.. అనుమతి కోరిన విషయాన్ని గుర్తు చేస్తూ వర్ల రామయ్య శుక్రవారం మళ్లీ డీజీపీకి లేఖ రాశారు. శనివారం సాయంత్రానికి తీరికగా స్పందించిన డీజీపీ.. తామడిగిన వివరాలన్నీ ఇవ్వాలని కోరారు.
మానవమాత్రులకు సాధ్యమేనా?: లోకేశ్‌ 125 శాసనసభ నియోజకవర్గాల మీదుగా.. 400 రోజులపాటు, 4 వేల కి.మీ.ల సుదీర్ఘ పాదయాత్ర తలపెట్టారు. ఆయన తెలుగుదేశం పార్టీ ప్రధాన కార్యదర్శి, మాజీ మంత్రి. ఆ స్థాయి నాయకుడు పాదయాత్ర చేస్తుంటే.. సంఘీభావం చెప్పేందుకు టీడీపీ నాయకులు, పార్టీ కార్యకర్తలు, మద్దతుదారులు, ప్రజలు పెద్ద సంఖ్యలో తరలి వస్తారు. లోకేశ్‌ అనే కాదు.. ఏ పార్టీ ముఖ్య నాయకులు పాదయాత్ర చేసినా అదే స్థాయిలో హడావుడి ఉంటుంది. గతంలో వై.ఎస్‌.రాజశేఖరరెడ్డి, చంద్రబాబు, షర్మిల, జగన్‌ పాదయాత్రలూ అలాగే సాగాయి. కాంగ్రెస్‌ నేత రాహుల్‌గాంధీ చేస్తున్న భారత్‌ జోడో యాత్రా అలాగే సాగుతోంది. అప్పుడెప్పుడూ లేని, దేశంలో మరెక్కడాలేని విధంగా.. ఏపీ పోలీసులే ఇలా ఎందుకు ప్రవర్తిస్తున్నారో అర్థం కావడం లేదని విపక్షాలు వ్యాఖ్యానిస్తున్నాయి.
ముఖ్య నాయకులు పాదయాత్రలు చేస్తున్నప్పుడు.. దానిలో పాల్గొనేవారు, సంఘీభావం చెప్పేవారు ఎక్కడికక్కడ మారుతూ ఉంటారు. ఆయా గ్రామాలు, నియోజకవర్గాల మీదుగా యాత్ర సాగేటప్పుడు ఎక్కడికక్కడ స్థానికులు చేరుతూ ఉంటారు. వారందరి పేర్లు, వివరాలు ముందే ఇవ్వడం సాధ్యమేనా? పాదయాత్రలో పాల్గొనే వాహనాల నంబర్లు, పూర్తి వివరాలు ఇవ్వాలని కూడా డీజీపీ కోరారు. లోకేశ్‌ పాదయాత్ర 400 రోజులపాటు జరుగుతుంది. ఆయన వెంట పాదయాత్రలో పాల్గొనేందుకు ఎవరెవరు వస్తారో, ఏ వాహనాల్లో వస్తారో.. ఇప్పుడే ఊహించి ఆ వివరాల్ని ఇవ్వడం ఎలా సాధ్యపడుతుంది? డీజీపీకి ఆ విషయం తెలీదా? ఏదో ఒక సాకుతో పాదయాత్రకు అనుమతి నిరాకరించేందుకే అవన్నీ అడిగారా? అని రాజకీయ వర్గాలు ప్రశ్నిస్తున్నాయి.
అప్పట్లో పాదయాత్రలకు అనుమతే అవసరం లేదన్నారుగా? : జగన్‌ పాదయాత్రకు సంబంధించి 2017 నవంబరు 4న సాక్షి పత్రికలో ఒక కథనం వచ్చింది. ‘జగన్‌ పాదయాత్రకు అనుమతి తీసుకోలేదంటూ మెలికపెట్టేందుకు రాష్ట్రప్రభుత్వం చేస్తున్న ప్రయత్నాలను వైసీపీ ఎంపీ వైవీ సుబ్బారెడ్డి వ్యతిరేకించారు’ అన్నది ఆ కథనంలోని మొదటి వాక్యం. రాష్ట్ర పోలీసు శాఖలోని సీనియర్‌ అధికారి ఒకరు సుబ్బారెడ్డికి ఫోన్‌ చేసి యాత్రకు అనుమతి తీసుకున్నారా? అని ప్రశ్నించారని.. పాదయాత్రలకు అనుమతుల అంశం తలెత్తబోదని, గతంలో కూడా అనుమతుల ప్రస్తావన రాలేదని ఎంపీ స్పష్టం చేశారని ఆ కథనంలో రాశారు.
జగన్‌ పాదయాత్ర సమాచారాన్ని డీజీపీకి ఇది వరకే తెలియజేశామని సుబ్బారెడ్డి వివరించారని, అనుమతులు తీసుకోవాలి కదా అని ఆ అధికారి రెండోసారి ఒత్తిడి చేసినా.. ఆ అంశమే ఉత్పన్నం కాదని ఆయన తేల్చిచెప్పారని ఆ కథనంలో పేర్కొన్నారు. దీని ప్రకారం చూస్తే జగన్‌ పాదయాత్రకు అనుమతి తీసుకోలేదు సరికదా, కేవలం డీజీపీకి సమాచారం మాత్రమే ఇచ్చారని అర్థమవుతోంది. జగన్‌ వ్యక్తిగత కార్యదర్శి కృష్ణమోహన్‌రెడ్డి బంజారాహిల్స్‌లోని వైసీపీ కార్యాలయం చిరునామాతో... 2017 నవంబరు 1న రాసిన లేఖలో కూడా.. డీజీపీకి సమాచారం కోసమే ఆ లేఖ రాస్తున్నట్టు పేర్కొన్నారు. జగన్‌ తన పాదయాత్రలో భాగంగా వివిధ వర్గాల ప్రజల్ని కలుస్తారని, వారితో మాట్లాడతారని, కాబట్టి తగిన భద్రతా ఏర్పాట్లు చేయాలని కోరారు. మరి జగన్‌కో రూలు.. మిగతా నాయకులకు ఒక రూలు ఉంటాయా?
రాష్ట్రంలో చట్టబద్ధ పాలన ఉందా? : అధికార పార్టీకి వత్తాసు పలుకుతూ.. ప్రతిపక్షాల్ని, ప్రజాసంఘాల్ని, సమస్యలపై గళమెత్తిన వర్గాల్ని అణచివేయడమే లక్ష్యంగా పనిచేస్తున్న కొందరు పోలీసు అధికారులు, ప్రతిపక్షాలకు చెందినవారు ఏ స్థాయి నాయకులైనా వారిపై అమానుషంగా, అవమానకరంగా ప్రవర్తిస్తున్నారు. వారు స్వేచ్ఛగా తమ రాజకీయ కార్యకలాపాలు, పార్టీ సమావేశాలు నిర్వహించుకోకుండా అవరోధాలు కల్పిస్తున్నారు. పోలీసుల తీరును హైకోర్టు వివిధ సందర్భాల్లో గర్హించినా, గత డీజీపీని కోర్టుకి పిలిపించి నిబంధనల్ని కోర్టు హాల్‌లోనే చదివించినా.. పోలీసుల్లో మార్పు రావడం లేదు. వైసీపీ అధికారంలోకి వచ్చిన మరుక్షణం నుంచీ.. అసలు ఈ రాష్ట్రంలో చట్టబద్ధ పాలన ఉందా? అన్న అనుమానం కలిగేలా పోలీసుల తీరు మారిపోయింది.
అడుగడుగునా అడ్డంకులే: పల్నాడు జిల్లా ఆత్మకూరులో వైసీపీ దాడుల్లో గాయపడ్డ టీడీపీ మద్దతుదారులకు అండగా నిలిచేందుకు ప్రతిపక్ష నేత చంద్రబాబు వెళ్లేందుకు సిద్ధపడితే.. మాజీ ముఖ్యమంత్రి అని కూడా చూడకుండా, ఆయన ఇంటి గేటుకి తాళ్లు కట్టేసి పోలీసులు అడ్డుకున్నారు. ఆ తర్వాత విశాఖ విమానాశ్రయంలో ఆయనను అడ్డుకుని వెనక్కు పంపేశారు. జనసేన అధినేత పవన్‌ కళ్యాణ్‌ విషయంలోనూ ఇటీవల విశాఖలో పోలీసులు అమానుషంగా ప్రవర్తించారు. బాధితుల్ని పరామర్శించేందుకు లోకేశ్‌ నరసరావుపేట వెళుతుంటే అడ్డుకున్నారు. విపక్షాలకు అవరోధాలు సృష్టించడమే లక్ష్యంగా ప్రభుత్వం తెచ్చిన జీవో 1 వెలుగులోకి వచ్చిన మర్నాడే... కుప్పంలో చంద్రబాబు పర్యటనకు అడుగడుగునా పోలీసులు అడ్డుతగిలారు. వాహనాల్ని సీజ్‌ చేశారు.
ముఖ్యమంత్రి సహా మంత్రులు, వైసీపీ ఎమ్మెల్యేలు, ఆ పార్టీ నాయకులు.. ఆ జీవోను ఖాతరు చేయకపోయినా, రోడ్లపై భారీ ర్యాలీలు నిర్వహిస్తున్నా పోలీసులు చోద్యం చూస్తున్నారే తప్ప.. అడ్డుకోవడం లేదు. ఎవరిపైనా కేసులూ పెట్టలేదు. విపక్షాలు ఏ కార్యక్రమాలు చేసినా.. దానికి పోటీగా అధికారపార్టీ నాయకులు, కార్యకర్తలు ఏ కార్యక్రమాలు తలపెట్టినా పోలీసులు అనుమతించారు. శాంతిభద్రతల సమస్య తలెత్తుతుందని తెలిసినా.. అధికార పార్టీకి కొమ్ముకాశారు.
2019 నవంబరులో చంద్రబాబు రాజధాని అమరావతిలో పర్యటించినప్పుడు ఆయన కాన్వాయ్‌పై కొందరు రాళ్లు, చెప్పులు విసిరారు. అప్పటి డీజీపీ గౌతమ్‌ సవాంగ్‌ దానిపై స్పందిస్తూ.. ‘నిరసన తెలపటం భావప్రకటన స్వేచ్ఛ. రాజ్యాంగం ఆ హక్కు ప్రతి ఒక్కరికీ కల్పించింది’ అని పేర్కొన్నారు. జెడ్‌ ప్లస్‌ కేటగిరీలో ఉన్న ఒక మాజీ ముఖ్యమంత్రి పర్యటనకు తగిన భద్రత కల్పించాల్సింది పోయి, పోటీగా నిరసనలకు అనుమతిచ్చిందే కాకుండా, కాన్వాయ్‌పై దాడి జరిగితే సాక్షాత్తు రాష్ట్ర డీజీపీ అలా స్పందించడం బాధ్యతారాహిత్యం కాదా? రాజధాని రైతులు ఇటీవల చేసిన పాదయాత్రలోనూ ఎక్కడిక్కడ... అధికార పార్టీ నాయకుల ఆధ్వర్యంలో జరిగిన పోటీ కార్యక్రమాలకు పోలీసులు అనుమతిచ్చారు. ‘మీ నిరసనలు మీరు చేసుకోండి. కానీ అమరావతి రైతుల పాదయాత్రను అడ్డుకోవద్దు.. అని నిరసన తెలుపుతున్నవారికి చెబుతున్నాం’ అని ప్రస్తుత డీజీపీ రాజేంద్రనాథరెడ్డి చెప్పడం రాష్ట్రంలో పోలీసుల తీరుకు అద్దం పడుతోంది.
ఇవీ చదవండి:
