రైలు ఢీ కొని 170 గొర్రెలు, ఒక కాపరి మృతి చెందిన సంఘటన గుంటూరు జిల్లా నరసరావుపేటలో చోటు చేసుకుంది. పట్టణ శివారులోని ఫ్లై ఓవర్ బ్రిడ్జి సమీపంలో గురువారం ఉదయం ప్రకాశం జిల్లా తర్లుబాడు మండలం ఉమ్మారెడ్డిపల్లె గ్రామానికి చెందిన నాగం తిరుపతయ్య గొర్రెల మందను తొలుకుంటూ గుంటూరు రోడ్డు నుంచి బైపాస్ రోడ్డుకు చేరేందుకు వెళ్తుండగా ఈ ప్రమాదం జరిగింది. మార్గంలోని రైలు పట్టాలు దాటించే క్రమంలో గొర్రెలన్నీ గుంపుగా వెళ్తున్నాయి. అదే సమయంలో విజయవాడ నుంచి హుబ్లీ వెళ్లే రైలు వస్తోందని గమనించిన కాపరి వెంటనే గొర్రెలన్నింటినీ మందలించే ప్రయత్నం చేశాడు. అప్పటికే వేగంగా వస్తున్న రైలు కాపరితో సహా గొర్రెలని ఢీ కొంటూ వెళ్ళింది. ఈ క్రమంలో గొర్రెల కాపరి అక్కడికక్కడే మృతి చెందాడు. సుమారు 170 గొర్రెలు చెల్లాచెదురుగా పడి మృత్యవాతపడ్డాయి. వీటి ఖరీదు సుమారు 15 లక్షలు ఉండవచ్చని తోటి కాపరులు చెబుతున్నారు. విషయం తెలుసుకున్న రైల్వే పోలీసులు సంఘటనా స్థలానికి చేరుకుని జరిగిన విషయం తెలుసుకున్నారు. తిరుపతయ్య మృత దేహాన్ని పోస్టుమార్టం నిమిత్తం ప్రభుత్వ ఆసుపత్రికి తరలించారు.
కుటుంబ సభ్యులకు సమాచారం అందడంతో మృతుని భార్య, బంధువులు తిరుపతయ్య మృతదేహాన్ని చూసి బోరున విలపించారు. గొర్రెల మంద మేతకు ఊరుగానీవురు వచ్చి మమ్మల్ని అన్యాయం చేసి వెళ్ళావయ్యా అంటూ మృతుని భార్య రోధిస్తున్న తీరు చూపరులను కంట తడి పెట్టించింది.
ఇవీ చదవండి
