'ఎస్సై నన్ను మోసం చేశాడు'... 'కాదు ఎస్సై మోసపోయాడు'

గుంటూరు జిల్లా నరసరావుపేటలో ఓ ముక్కోణపు ప్రేమ కథ పోలీసు స్టేషన్​కు చేరింది. ఓ ఎస్సై తనను మోసం చేశాడంటూ ఓ మహిళ ఫిర్యాదు చేసింది. అయితే ఆ ఎస్సైనే తన భార్య మోసం చేస్తోందంటూ ఆమె భర్త చెప్పటంతో కథ మలుపు తిరిగింది.

గుంటూరు జిల్లా ముప్పాళ్ల ఎస్ఐ జగదీష్ తనను లొంగదీసుకుని అన్యాయం చేశాడని ఓ మహిళ నరసరావుపేట పోలీసు స్టేషన్​లో ఫిర్యాదు చేసింది. అయితే ఆమె కేసు కొత్త మలుపు తిరిగింది. ఎస్సై జగదీష్​కి ఆమెకు ఎలాంటి సంబంధం లేదని ఆమె మాజీ భర్త మీడియా ముందుకు వచ్చి వెల్లడించారు. బ్లాక్ మెయిల్ చేసి డబ్బులు సంపాదించడానికే తన మాజీ భార్య ఇలా చేస్తోందని ఆరోపించారు.

ఇదీ జరిగింది

గుంటూరు జిల్లా నరసరావుపేట మండలం రావిపాడు గ్రామానికి చెందిన సింధూర అనే మహిళ... సత్తెనపల్లి నియోజకవర్గంలోని ముప్పాళ్ల పోలీసు స్టేషన్​లో ఎస్సైగా విధులు నిర్వహిస్తున్న జగదీష్​పై నరసరావుపేట గ్రామీణ పోలీస్ స్టేషన్​లో గురువారం ఫిర్యాదు చేసింది.

'2013లో నా భర్తతో మనస్పర్థల కారణంగా నరసరావుపేట గ్రామీణ పోలీసు స్టేషన్​లో ఫిర్యాదు చేసేందుకు వచ్చాను. అప్పటి ఎస్సై జగదీష్... తప్పుడు కేసులు పెడతానంటూ నన్ను బెదిరించి లొంగదీసుకున్నారు. ఆ తరువాత నా భర్తతో స్నేహం పేరుతో జగదీష్ ప్రతి రోజూ మా ఇంటికి వచ్చిపోయేవాడు. అతని వల్ల నేను ఒక బిడ్డకు తల్లిని కూడా అయ్యాను. ఎస్సైకి వివాహం అయిన సంగతి నాకు ఆలస్యంగా తెలిసింది. 2017లో నా మొదటి భర్తకు విడాకులు ఇచ్చాక ఎస్సై నన్ను రహస్యంగా వివాహం కూడా చేసుకున్నాడు. అయితే కొద్ది రోజులగా జగదీష్​కు... ఆయన మొదటి భార్యతో విబేధాలు రావటంతో నన్ను, నా బిడ్డను వేధింపులకు గురిచేస్తున్నాడు. బిడ్డతో సహా వెళ్లిపోవాలని బెదిరిస్తున్నాడు. నాకు, నా బిడ్డకు ఎస్సై జగదీష్ వల్ల ప్రాణహాని ఉంది'. అని సింధూర నరసరావుపేట గ్రామీణ పోలీసులకు ఫిర్యాదు చేసింది.

ఆమె ఎంతో మందిని మోసగించింది

సింధూర చెప్పే మాటల్లో నిజం లేదని చెప్పారు ఆమె మొదటి భర్త సుబ్బారావు. ఆమె చేతిలో ఎంతోమంది అమాయకులు మోసపోయారని ఆరోపించారు.

'డబ్బులు కోసం బ్లాక్ మెయిల్ చేయడం సింధూరకి అలవాటు. విలాస జీవితానికి అలవాటు పడిన ఆమె అసాంఘిక కార్యకలాపాలు సాగిస్తోంది. ప్రవర్తన మార్చుకోవాలని ఆమెకు పలుమార్లు సూచించా. అయినా మారకపోగా నా పైనే దాడికి పాల్పడింది. ఆమెను భరించలేక 2017లో చట్టపరంగా విడాకులు తీసుకున్నాం. అప్పటికే మాకు ఓ పాప, బాబు ఉన్నారు. ఇదే విషయాన్ని ఆమె విడాకులు తీసుకునే సమయంలో కోర్టులో చెప్పింది. ఇప్పుడు ఎస్​ఐ జగదీష్​ వల్లే తనకు బాబు పుట్టడాని అబద్ధాలు చెబుతోంది. ఎస్​ఐ జగదీష్ లానే గతంలో అనేక మంది అమాయకులు ఆమె చేతిలో మోసపోయారు. ఇంకెవరూ సింధూర చేతిలో మోసపోకూడదన్న ఉద్దేశంతో నేను మీడియా ముందుకు వచ్చాను' అని ఆమె మాజీ భర్త సుబ్బారావు తెలిపారు. ఈ కేసులో నిజనిజాలు పోలీసుల దర్యాప్తులో తేలాల్సి ఉంది.

ఇదీ చదవండి: స్నేహం మోహంలో తల్లి... ప్రాణం పోగొట్టుకుంది చిట్టి తల్లి