AMMA VODI: ఉమ్మడి పశ్చిమగోదావరి జిల్లాలో వివిధ కారణాలతో అమ్మఒడి జాబితా నుంచి అనేక మందిని తొలగించారు. దానికి గల కారణాలు చూసి అర్హులు అవాక్కవుతున్నారు. ప్రధానంగా విద్యుత్ వినియోగం, మీటర్లు ఎక్కువగా ఉన్నాయనే సాకులతో.. చాలా మందికి కోతవేశారు. అయితే.. వాస్తవ విరుద్ధంగా జాబితా రూపొందించారని.. తల్లిదండ్రులు ఆవేదన వ్యక్తంచేస్తున్నారు. అసలు ఇల్లే లేకపోయినా.. కొందరిపేరిట విద్యుత్ కనెక్షన్ ఉన్నట్లు ఆన్‌లైన్‌లో చూపుతోంది.
గ్రామ సచివాలయాలకు వెళ్తే విద్యుత్‌శాఖ నుంచి.. నిరభ్యంతర పత్రాలు తెచ్చుకోవాలని చెప్తున్నారు. చేసేదేమీలేక ఆశావహులు కరెంటు కార్యాలయంలో తిరుగుతున్నారు. పనులు మానుకుని, ఛార్జీలు పెట్టుకుని రావాల్సి వస్తోందని లబ్దిదారులు వాపోతున్నారు.
గతంలో అమ్మఒడి తీసుకున్నవారిలో అనేక మంది పేర్లు ఈసారి జాబితాలో మాయం అయ్యాయి. ప్రభుత్వం భారం తగ్గించుకునేందుకు కావాలనే కొర్రీలు వేస్తోందని పిల్లల తల్లిదండ్రులు మండిపడుతున్నారు. గ్రామ సచివాలయాల్లోనే అభ్యంతరాలు పరిష్కరిస్తే మేలని.. కరెంటు కార్యాలయాల చుట్టూ తిరగడం పెద్ద ప్రహసనంగా మారిందని తల్లిదండ్రులు వాపోతున్నారు.
ఇవీ చదవండి:
