Jagananna Colony InfraStructure: ఉమ్మడి చిత్తూరు జిల్లాలో జగనన్న కాలనీల నిర్మాణం నత్తనడకన సాగుతోంది. ప్రభుత్వం కేటాయించిన స్థలాలు కొన్ని జనావాసాలకు దూరంగా...మరికొన్ని కొండగుట్టల్లో ఉండటంతో లబ్ధిదారులు ఇబ్బందులు ఎదుర్కొంటున్నారు. నీరు, విద్యుత్, రోడ్లు వంటి కనీస మౌళిక వసతులు ప్రభుత్వం కల్పించలేదు. రోడ్లు లేకపోయినా...ఏదో విధంగా ఇబ్బందులు పడి వెళ్లినా.... నిర్మాణాలకు అవసరమైన కనీస వసతులు లేక లబ్ధిదారులు అల్లాడిపోతున్నారు. ప్రభుత్వం విడతల వారీగా ఇచ్చే లక్షా 80 వేల రూపాయలతో ... పునాదులు దాటి ఇళ్లు నిర్మాణాలు చేసుకోలేకపోతున్నారు.
శ్రీకాళహస్తి నియోజకవర్గంలో చిందేపల్లి, ఊరందూర్‌ కాలనీల్లో నిర్మాణం ఏమాత్రం ముందుకు సాగడం లేదు. కేటాయించిన స్థలాలు అనువుగా లేవని భావించిన లబ్ధిదారుల్లో కొంత మంది స్థలాల రిజిస్ట్రేషన్లకు ముందుకు రాలేదు. రిజిస్ట్రేషన్‌ చేసుకొన్న వారిలో 50 శాతం మంది ఇళ్ల నిర్మాణాలు చేపట్టారు. ఇళ్ల నిర్మాణాలు ప్రారంభమైన వాటిలో కొన్ని ఇంకా పునాదుల దశలో ఉన్నాయి. ఏదోవిధంగా కొందరు ఇంటి నిర్మాణం పూర్తి చేసినా.... విద్యుత్ లేకపోవడం.... కనీస అవసరమైన నీటివసతి కల్పించకపోవడంతో ... తీవ్ర ఇబ్బందులు పడుతున్నామని లబ్ధిదారులు వాపోతున్నారు.
ఇళ్ల నిర్మాణాలు నిర్ణీత గడువులోగా పూర్తి చేయాలని అధికారులు చెబుతున్నారని... మౌలిక వసతులు మాత్రం కల్పించడం లేదని లబ్ధిదారులు మండిపడుతున్నారు. నిర్మాణ ఖర్చు ఎక్కువ అవుతోందని లబ్ధిదారులు ఆవేదన వ్యక్తం చేస్తున్నారు.
జగనన్న కాలనీకి మూడు నెలల నుంచి నీళ్లు రావడం లేదు. దీనిపై అధికారులకు ఫిర్యాదు చేసినా.. ఎవరు పట్టించుకోవడం లేదు. ఒక వేళ అడిగినా కానీ, సమయం పడుతుందనే సమాధానాలు వినిపిస్తున్నాయి. ఇక అధికారులను నమ్ముకోకుండా సొంతంగా వాటర్ ట్యాంకర్ పెట్టుకుంటే 10 రోజులకు రూ. 3000 ఖర్చు అవుతుంది. ఈ లెక్కన మాకు రూ. 25000 వాటర్కే ఖర్చయింది. అలాగే కాలనీల్లో కనీస వసతులు లేక తీవ్ర ఇబ్బందులు ఎదుర్కొంటున్నాం. విద్యుత్ సరఫరా లేదు, సరైన రోడ్లు లేవు. -లబ్ధిదారులు
జగనన్న కాలనీలలో మౌళికవసతులు సరిగా లేవు. కాంట్రాక్ట్ దారులు నాణ్యంగా నిర్మించడం లేదు. అలాగే సరైన నీటి వసతి లేదు. ఇలాంటి పరిస్థితుల్లో జగనన్న కాలనీ లేకున్నా బాగుండు అని అనిపిస్తుంది. ఈ జగనన్న కాలనీల ఎవరికీ ఉపయోగం లేదు. రోడ్లు చిన్నపాటి వర్షానికే చతికిలపడి పోతున్నాయి. దీంతో వాహనాల రాకపోకలకు ఇబ్బందిగా ఉంది. రోడ్లు కారణంగా మెటీరియల్ రాకపోవడంతో ఇళ్ల నిర్మాణ పనులు ఆగిపోతున్నాయి. వీటితో పాటు బిల్లులు సరిగా రావడం లేదు ఇల్లు నిర్మాణం ప్రారంభించి 3 నెలలైన ఒక్క బిల్లు కూడా రాలేదు. -లబ్ధిదారులు
ఇవీ చదవండి :
