తమిళనాడులోని తిరుపత్తూరుకు చెందిన నవీన్‌కుమార్‌ స్టూడియో నడుపతూ జీవనం సాగిస్తున్నాడు. తరచూ అతడు గుడుపల్లెకు వస్తుంటాడు. అతడికి శీనప్ప, మహదేవ అనే ఇరువురు ప్రథమంగా రైస్‌పుల్లింగ్‌ ఆశ చూపారు. ఆపై వారిద్దరు సహా మరో ఏడుగురు అతడికి మాయమాటలు చెప్పి అరుదైన రైస్‌పుల్లింగ్‌ పాత్ర ఉందంటూ నమ్మించి ఆకర్షించారు. కంతుల వారీగా అతడి నుంచి రూ.2.10 కోట్లు వసూలు చేశారు. దీనిపై పోలీసులకు సమాచారం అందగా... బాధితుడి సాయంతో కేసు నమోదు చేసి దర్యాప్తు ప్రారంభించారు. ఎస్పీ సెంథిల్‌కుమార్‌ ప్రత్యేక దృష్టి సారించి మోసం ఎలా జరిగింది, ఇందులో ఎవరెవరి పాత్ర ఉందనే కోణంలో విచారించారు.
ఈ వ్యవహారంలో నిందితులు తొమ్మిది మందిగా తేలడంతో పలు బృందాలు వారి కోసం గాలించాయి. మంగళవారం గుడుపల్లె మండలంలోని కామసముద్రం-బిసానత్తం కూడలి వద్ద వాహనాల తనిఖీ సమయంలో రెండు కార్లు, ఓ ద్విచక్ర వాహనంపై వస్తున్నవారు పోలీసులను చూసి వెనుతిరిగే ప్రయత్నం చేశారు. అనుమానంతో పోలీసులు వారిని వెంబడించి అడ్డుకుని వాహనాలు తనిఖీ చేశారు. వారి వద్ద కొన్ని పరికరాలు ఉండటం, పొంతన లేని సమాధానం చెప్పడంతో అందరినీ అదుపులోకి తీసుకుని విచారించారు.
చిత్తూరు జిల్లా గుడుపల్లికి చెందిన శీనప్ప, తమిళనాడు రాష్ట్రానికి చెందిన మహదేవ, రామచంద్రనాయుడు, వినాయగం, శేఖర్‌, కర్ణాటక రాష్ట్రానికి చెందిన గంగాధర్‌ అలియాజ్‌ రాజు, శివకుమార్‌ అలియాజ్‌ ధనశేఖర్ను రైస్‌పుల్లింగ్‌ కేసులో నిందితులుగా గుర్తించారు. వీరు కాజేసిన రూ.2.10కోట్లలో నిందితుల నుంచి రూ.1.30 కోట్లు స్వాధీనం చేసుకున్నారు. రెండు కార్లు, ఓ ద్విచక్ర వాహనాన్ని స్వాధీనం చేసుకున్నారు. ఈ కేసులో మరో నిందితుడు పరారీలో ఉన్నాడు.
ఇవీ చూడండి...
