శాసనసభ బడ్జెట్ సమావేశాల్లో కీలక బిల్లులను చట్టంగా మార్చేందుకు ప్రభుత్వం కసరత్తు ముమ్మరం చేసింది. కీలక అంశాలకు చట్ట సవరణలు చేసే దిశగా... సభ ముందుకు ప్రతిపాదనలు తీసుకురానుంది. ఈ నెల 11వ తేదీన సమావేశాలు ప్రారంభమైన అనంతరం.. 12 న రాష్ట్ర బడ్జెట్ ను ఆర్ధిక మంత్రి బుగ్గన ప్రవేశపెట్టనున్నారు. అనంతరం సుమారు 11 సవరణ బిల్లులను అసెంబ్లీలో ప్రవేశపెట్టాలని ప్రభుత్వం యోచిస్తోంది.
- రాష్ట్రంలో తెలంగాణా తరహాలో లోకాయుక్త నియామకానికి సంబంధించి హైకోర్టు విశ్రాంత న్యాయమూర్తిని నియమించేలా చట్ట సవరణ చేపట్టనున్నారు.
- విద్యుత్ నియంత్రణ మండలి సిఫార్సుల అమలుకు సంబంధించిన అంశంలోనూ చట్ట సవరణకు ప్రభుత్వం భావిస్తోంది.
- జ్యుడీషియల్ కమిషన్ నియామకానికి ఏపీ ఇన్ఫ్రా డెవలప్మెంట్ ఎనేబిలింగ్ యాక్టు 2001కి చట్ట సవరణ చేసేందుకు ప్రణాళికలు సిద్ధమయ్యాయి. మౌలిక సదుపాయాల కల్పన, ఇంజినీరింగ్ ప్రాజెక్టుల్లో సమీక్షకు జ్యుడీషియల్ కమిషన్ను ఏర్పాటు చేయాలని ప్రభుత్వం అడుగులు వేస్తోంది. ఈ కమిషన్ ఏర్పాటు కోసం చట్ట సవరణ అవసరమని ప్రభుత్వం నిర్ణయించింది.
- పాఠశాలలు, కళాశాలల్లో ఫీజు నియంత్రణకు సంబంధించి కమిషన్లను ఏర్పాటు చేసేందుకు నూతన బిల్లులను శాసనసభ ముందుంచనుంది.
- రాష్ట్రంలో వైద్య, ఆరోగ్య శాఖల్లో సంస్కరణలు తీసుకురావాలని యోచిస్తున్న ప్రభుత్వం జిల్లా ఆసుపత్రులకు స్వయం ప్రతిపత్తి కల్పించేలా సొసైటీలు, ట్రస్టుల కిందకు తీసుకువచ్చేందుకు అవసరమైన చట్ట సవరణ చేయడంపై కసరత్తు చేస్తున్నారు.
- తిరుమల తిరుపతి దేవస్థాన ఛైర్మన్, పాలక మండలి సభ్యులను ఎప్పుడైనా రీకాల్ చేసేందుకు అవకాశం కల్పించేలా హిందూ ధార్మిక చట్టానికి సవరణ చేపట్టాలని ప్రభుత్వం నిర్ణయించింది. ఈ అంశంపైనా శాసనసభలో బిల్లు ప్రవేశపెట్టనుంది.
- రెవిన్యూతో పాటు కార్మిక శాఖకు సంబంధించిన రెండు అంశాలతో పాటు.. మరో 2 చట్ట సవరణ బిల్లులకూ కసరత్తు జరుగుతున్నట్టు తెలుస్తోంది.
ఇదీ చదవండి:
