విద్యార్థులను దారి మళ్లిస్తున్న భయాలివే - కనిపెట్టుకోకుంటే కన్నీళ్లే!

గంజాయి వ్యసనానికి బానిసలుగా మారుతున్న విశ్వవిద్యాలయాలు, ఇంజినీరింగ్‌, పాఠశాల విద్యార్థులు - ప్రత్యేక గృహాల్లో పెరుగుతున్న బాలనేరస్థులు

Special Training to Juvenile offenders on Ganja : గంజాయి మహమ్మారి ముక్కుపచ్చలారని బాలల జీవితాలను సర్వనాశనం చేస్తొంది. వారిని జీవచ్ఛవాలుగా మారుస్తోంది. గత వైఎస్సార్సీపీ ప్రభుత్వం చేసిన తప్పు ఈ తరానికి పెద్దగా ముప్పుగా పరిణమిస్తోంది. విశ్వవిద్యాలయాలు, ఇంజినీరింగ్‌ కళాశాలలు, చివరికి పాఠశాలల విద్యార్థులు కూడా గంజాయి వ్యసనానికి బానిసలుగా మారడం తీవ్రంగా కలవరపరుస్తోందని పోలీసు అధికారులు చెబుతున్నారు. గడిచిన నాలుగేళ్ల కాలంలో వందలాది మంది బాలలు నేర ఘటనల్లో పాల్గొని నేరస్థులుగా మారారని, ఇది సమాజాన్ని తీవ్రంగా ఆందోళన పరిచే అంశమని పోలీసులు పేర్కొంటున్నారు.

నేర స్వభావాన్ని తొలగించి విద్యాబుద్ధులు నేర్పించి : బాల నేరస్థుల్లో పరివర్తన తేవడానికి విశాఖపట్నంలోని ముడసర్లోవ రోడ్‌ దీనదయాళ్‌పురంలో ప్రభుత్వ బాలుర ప్రత్యేక గృహం ఏర్పాటు చేశారు. శ్రీకాకుళం, విజయనగరం, ఉమ్మడి విశాఖపట్నం, తూర్పుగోదావరి, పశ్చిమగోదావరి జిల్లాలకు చెందిన బాల నేరస్థులను ఈ గృహంలో ఉంచుతున్నారు. వీరిలో గంజాయి రవాణా కేసుల్లో పట్టుబడిన వారు ఎక్కువగా ఉండడం గమనార్హం. ఇక్కడి బాలురలో నేర స్వభావ లక్షణాలను తొలగించి విద్యాబుద్ధులు నేర్పించేందుకు గృహం నిర్వాహకులు కృషి చేస్తున్నారు. బాల నేరస్థులు పూర్తి స్థాయిలో పరివర్తన చెంది ఇక్కడి నుంచి బయటకు వెళ్లేలా చూస్తున్నారు.

1. ఉదాహరణకు.. రమేష్‌ (పేరు మార్చాం) 9వ తరగతి చదివే సమయంలో చదువులో వెనుకబడ్డాడు. గత వైఎస్సార్సీపీ ప్రభుత్వం ప్రవేశపెట్టిన ఆంగ్ల మాధ్యమం కారణంగా సైన్సు, గణితం ఆ విద్యార్థికి అర్థం కాలేదు. 10వ తరగతిలో ఉత్తీర్ణత సాధించలేనని తీవ్ర ఆందోళన చెందాడు. దీంతో పాఠశాలకు వెళ్లకుండా బయట తిరగడంతో వ్యసనపరులు స్నేహితులయ్యారు. వారితో కలిసి గంజాయి తాగడం అలవాటైంది. దాని కోసం డబ్బులు అవసరం కావడంతో దొంగతనాలు చేయడం మొదలు పెట్టాడు. చివరికి పోలీసులకు చిక్కి బాల నేరస్థుడిగా మారాడు.

2. ఉదాహరణకు.. ముకుంద్‌ (పేరు మార్చాం) 9వ తరగతి చదివే సమయంలో పరీక్షల్లో తక్కువ మార్కులు వచ్చేవి. తండ్రి కొడతారనే భయంతో ఇంటికి కూడా సరిగా వెళ్లేవాడు కాదు. పాఠశాలకు వెళ్లకుండా స్నేహితులతో కలిసి తిరగడం ప్రారంభించాడు. అలా మెల్లగా మత్తుపదార్థాలకు అలవాటు పడ్డాడు. ఈ క్రమంలో గంజాయి ముఠాతో పరిచయమైంది. వారి మాటలు నమ్మి సులువుగా డబ్బు సంపాదించడానికి గంజాయి రవాణా చేయడం ప్రారంభించాడు. చివరికి పోలీసులకు చిక్కి, బాల నేరస్థుడిగా జీవితం సాగిస్తున్నాడు.

• ప్రత్యేక గృహంలో బాలనేరస్థులు : 60 మంది
• గంజాయి రవాణా నిందితులు : 40 మంది

అధ్యయనంలో తేలిన అంశాలు..

• చదువులో ఒత్తిడిని తట్టుకోలేక పోవడం
• ఆంగ్ల విద్య అర్థం కాకపోవడం
• చెడు స్నేహాలు
• సులువుగా డబ్బు సంపాదించాలనుకోవడం
• తల్లిదండ్రుల పర్యవేక్షణ లేకపోవడం

"తప్పు, ఒప్పు తెలియని వయస్సు వారిది. పలు ముఠాలు పేద బాలలకు డబ్బు ఆశ చూపి గంజాయి రవాణా చేయిస్తున్నారు. వారిని మంచి బాలురగా తీర్చిదిద్దడం సవాలుతో కూడుకున్నది. ప్రధానంగా నిపుణుల చేత కౌన్సెలింగ్‌ ఇప్పిస్తున్నాం. వారి కాళ్లపై వారు నిలబడేలా ఎలక్ట్రికల్, ప్లంబింగ్‌ వంటి వృత్తి విద్యలు నేర్పిస్తున్నాం. కంప్యూటర్‌ కోర్సులు నేర్పించేందుకు ప్రయత్నాలు చేస్తున్నాం. వారి ఆలోచనా విధానంలో మార్పులు తెచ్చేందుకు ప్రముఖల చేత ఉపన్యాసాలు ఇప్పిస్తున్నాం. పేద పిల్లలకు జిల్లా లీగల్‌ సర్వీసెస్‌ సంస్థ ఉచిత న్యాయ సహాయం అందిస్తోంది. మత్తుకు అలవాటు పడిన బాలురకు మానసిక ఆసుపత్రిలో చికిత్స ఇప్పించి దాని నుంచి బయటపడేలా చూస్తున్నాం. ఒక రకంగా బాల నేరస్థుల్లో పరివర్తన వచ్చే వరకు శిక్షణ ఇస్తున్నాం." - కె.వీరయ్య, కార్యనిర్వహణాధికారి, ప్రభుత్వ బాలుర ప్రత్యేక గృహం