''వైకాపాకు రాజీనామా చేస్తా''

ఆమంచి కృష్ణమోహన్ వైకాపాలో చేరడంపై.. ఆ పార్టీ చీరాల సమన్వయకర్త యడం బాలాజీ ఆగ్రహం వ్యక్తం చేశారు. పునరాలోచించుకోవాలంటూ జగన్​కు లేఖ రాశారు.

వైకాపా అధినేత జగన్ కు ఆ పార్టీ చీరాల సమన్వయకర్త యడం బాలాజీ బహిరంగలేఖ రాశారు. ఆమంచి కృష్ణమోహన్​ను పార్టీలోచేర్చుకోవడంపై తీవ్ర అభ్యంతరం వ్యక్తం చేశారు. 8 ఏళ్లుగా ఆమంచితో పోరాడుతున్నట్టు చెప్పారు.కేసులు పెట్టినా వెనుకాడలేదన్నారు. చీరాలలో వైకాపాను కాపాడుతూ వచ్చానని వివరించారు. వచ్చే ఎన్నికల్లో ఆమంచికి దీటుగా ఎదుర్కొనేలా పార్టీని అభివృద్ధి చేశానని చెప్పారు. ఆమంచి చేరికపై జగన్ పునరాలోచించాలని, లేని పక్షంలో వైకాపాను ఓడించి తీరుతామని హెచ్చరించారు. లేఖపై రెండు, మూడ్రోజుల్లో సమాధానం చెప్పాలని... జవాబు రాకపోతే కార్యకర్తల కోరిక మేరకు వైకాపాకు రాజీనామా చేస్తానని స్పష్టం చేశారు. ఆమంచిని చేర్చుకునే ముందు తనకు కనీస సమాచారం ఇవ్వలేదన్నారు. ప్రకాశం జిల్లాలో చాలా మంది జగన్ తీరుపై తీవ్ర అసంతృప్తితో ఉన్నారన్నారు. వైకాపాలో చేరి చాలా నష్టపోయానని.. తనకు జరిగిన అన్యాయం ఎవరికీ జరగకూడదనీ అన్నారు.