పోలింగ్ కేంద్రంలో ఘర్షణ.. ఈవీఎం ధ్వంసం

తెదేపాకు కంచుకోట అయిన రాప్తాడు నియోజకవర్గంలోని పలు పోలింగ్ కేంద్రాల్లో అల్లర్లు చెలరేగాయి. ఆత్మకూరు మండలంలోని ఓ కేంద్రంలో ఇరు వర్గాల మధ్య ఘర్షణ చోటుచేసుకుంది. ఈ ఉద్రిక్తతల మధ్య ఓ వ్యక్తి ఏకంగా ఈవీఎంను ధ్వంసం చేశాడు.

సార్వత్రిక ఎన్నికల పోలింగ్ సందర్భంగా అనంతపురం జిల్లా రాప్తాడు నియోజకవర్గంలోని ఆత్మకూరు మండలంలో గందరగోళ పరిస్థితులు చోటు చేసుకున్నాయి. మండల పరిధిలోని సనప గ్రామంలో ఇరు వర్గాల మధ్య జరిగిన ఘర్షణలో ఓ వ్యక్తి ఈవీఎంను ధ్వంసం చేశాడు. అధికారులు వెంటనే స్పందించి మరో ఈవీఎంను ఏర్పాటు చేసి పోలింగ్ ను ప్రారంభించారు. ఈ ఉద్రిక్తలతో అక్కడ ఓటు వేసేందుకు వచ్చిన వారు భయాందోళనలకు గురయ్యారు. మరోవైపు సిద్ధరాంపురం గ్రామంలో వైకాపా, తెదేపా వర్గీయుల మధ్య గొడవ చోటు చేసుకుంది. ఇరు వర్గాలు ఘర్షణకు దిగుతున్న సమయంలో పోలీసులు కలుగుజేసుకుని పరిస్థితిని చక్కదిద్దారు.