రాష్ట్రంలో చెరువుల్ని చెరబడుతున్న వైఎస్సార్సీపీ నాయకులు

YSRCP Leaders Occupying Ponds: రాష్ట్రంలో అధికార పార్టీ నాయకుల వ్యవసాయాలు, వ్యాపారాలు జోరుగా సాగుతున్నాయి! ఇందులో తప్పేముందంటారా? అవి వాళ్ల సొంత భూములైతే తప్పేలేదు! కానీ సర్కారీ భూములతో దందా చేస్తున్నారు! చెరువుల్ని చెరబట్టి చేస్తున్న స్థిరాస్తి వ్యాపారాలు! సాగునీటి వనరుల్ని విధ్వంసం చేసి వ్యవసాయ క్షేత్రాలు.! ఇలా చెరువుల్ని అధికార పార్ట నేతలు సొంత జాగీరుల్లా అనుభవిస్తున్నారు. ఒక ఉపముఖ్యమంత్రి అనుచరులు చెరువు గర్భాన్ని వ్యవసాయ క్షేత్రంలో కలిపేసుకుంటే మరో మంత్రి అనుచరులు ఏకంగా లేఔట్‌ వేశారు. రాష్ట్రంలో ప్రతీ జిల్లాలోనూ ఇదే దందా! ప్రభుత్వ హెచ్చరికల బోర్డులు అధికార పార్టీ అరాచకాలకు కాపాలాకు తప్ప దేనికీ పనికిరావడం లేదు.

YSRCP Leaders Occupying Ponds : అనకాపల్లి జిల్లా కశింకోట మండలం బయ్యవరం రెవెన్యూ పరిధిలో వేసినభారీ లేఔట్‌ నిజానికి ఇది వాగులు, గెడ్డలు ప్రవహించే మార్గం. ఆ మార్గాన్నే ఇలా తొలిచేసి మలిచేశారు. ఒకట్రెండు కాదు, దాదాపు పదెకరాలు చెరబట్టినట్లు అధికారుల సర్వేలోనే తేలింది. ఈ కబ్జాతో రంగబోలు గెడ్డ రిజర్వాయర్‌లోకి నీళ్లు చేరడం లేదని స్థానిక రైతులు గగ్గోలు పెడుతున్నారు. ఈ కబ్జాకోరులు సాక్షాత్తూ మంత్రి గుడివాడ అమర్నాథ్ అనుచరులే.

Occupying Ponds in AP : ఓ స్థిరాస్తి వ్యాపారి వ్యవసాయ క్షేత్రం. కాకపోతే ఇందులో అసలు ఎంతుందో ఆక్రమణ కూడా అంతే ఉంది. అనకాపల్లి జిల్లా తారువ గ్రామం, సర్వే నంబర్‌ 179లో రెడ్డివారి చెరువు ఉంది. ఈ చెరువులో 4.17 ఎకరాలను స్థిరాస్తి వ్యాపారి తన వ్యవసాయక్షేత్రంలో కలిపేసుకున్నారు. చదును చేసేసుకున్నారు. మరి మన అధికారులు ఊరుకుంటారా? అక్కడి వెళ్లారు. ఇదిగో ఈ హెచ్చరిక బోర్డ్ పెట్టేసి పలాయనం చిత్తగించారు. సదరు స్థిరాస్తి వ్యాపారి బోర్డును పీకిపక్కనేశారు. చెరువు గర్భాన్ని దర్జాగా మాయం చేశారు. ఏంటీ ఆయన ధైర్యం అంటారా? ఆయనకు ఉప ముఖ్యమంత్రి బూడి ముత్యాల నాయుడు ఆశీస్సులున్నాయి. ఈ ఊరుకూడా ముత్యాల నాయుడు స్వగ్రామమే. అందుకే అధికారులు ఆయనతో మనకెందుకుకొచ్చిన గొడవంటూ అటు వైపే చూడడం లేదు.

కమ్యూనిటీ హాళ్లు కట్టాలి-అందుకే చదును చేశాం : ఇక గుంటూరు జిల్లా పెదకాకాని సర్వే నెంబరు 653లోని రజక చెరువునూ వైఎస్సార్సీపీ నాయకుల్లో ఒక వర్గం చెరబట్టింది. శివాలయం రోడ్డు అభివృద్ధి పనుల్లో భాగంగా అక్కడ తొలగించిన మట్టిని ఈ చెరువులో డంప్ చేయించారు. చదును చేసి ఖాళీ స్థలంగా మార్చారు. ఇదేంటని అధికారులు ప్రశ్నిస్తే అక్కడ కమ్యూనిటీ హాళ్లు కట్టాలని హూంకరించారు. అలా చేయడానికి వీల్లేదని, ఆ చెరువులోకి ఎవరూ వెళ్లొద్దంటూ తహశీల్దార్‌ ఆదేశించారు. ఆక్రమణలు మాత్రం అలాగే ఉన్నాయి.

మొక్కుబడిగా హెచ్చరిక బోర్డు : గుంటూరు నగరంలోని SVNకాలనీ వెనుకగా ఉండే నేతాజీ నగర్‌ చెరువు. ఒకప్పుడు పదెకరాలకుపైగా ఉండేది. ఇప్పుడు కబ్జా కోరల్లా కరిగిపోయి రెండకరాలే మిగిలింది. గృహనిర్మాణ వ్యర్థాలను ఆ చెరువులో డంప్‌ చేస్తున్నారు. ఆ తర్వాత చదున చేసి ఇల్లు నిర్మిస్తున్నారు. వైఎస్సార్సీపీ నాయకుల అండదండలుండడంతో కార్పొరేషన్‌ అధికారులు కబ్జాకోరుల జోలికెళ్లడం లేదు. మొక్కుబడిగా ఇలా హెచ్చరిక బోర్డుపెట్టి చేతులు దులిపేసుకున్నారు.

అధికారులు మౌనవ్రతం : కర్నూలు జిల్లాలోనూ వైఎస్సార్సీపీ నాయకులు చెరువుల్ని ఆక్రమించేస్తున్నారు. పత్తికొండ చెరువు భూముల్ని మండల వైఎస్సార్సీపీ నాయకుడు నూర్‌బాషా చెరబట్టారు. వందల ట్రిప్పులు మట్టి తోలి చదును చేసేశారు. ఆయకట్టుకు నీళ్లు అందడంలేదని రైతులు గొడవ చేస్తే వాళ్లపైనా నూర్‌బాషా దాడి చేశాడు. ఆలూరు సమీపంలో చెరువు స్థలాన్ని ఆక్రమించేందుకు మంత్రి గుమ్మనూరు జయరాం అనుచరులు చదును చేశారు. ఆ తర్వాత వివాదం రచ్చకెక్కడంతో అలా వదిలేశారు. నంద్యాల జిల్లా పాణ్యం మండలం కొండజూటూరు చెరువు మధ్యలో అధికార వైఎస్సార్సీపీ నాయకులు ఏకంగా రోడ్డువేసేశారు. అధికారులు పట్టించుకోవడం లేదు.

ప్రభుత్వానికి తెలిసిందే ఆ ఒక్క పనే : కడప నగరంలోని పాలకొండలు, రిమ్స్‌ తెలుగుగంగ కాలనీ, బలిజపల్లి తదితర ప్రాంతాలు బుగ్గవంక వరద సమయంలో జలమయమవుతున్నాయి. చెరువులు, అలుగులు, వాగులు, వంకలు ఆక్రమణల్లో అదశ్యమయ్యాయి. పేదల ఇళ్లు కూల్చడం తప్ప పెద్దల ఆక్రమణలకు ప్రభుత్వానికి పట్టడం లేదు.

రాష్ట్రంలో అధికార పార్టీ ఆక్రమణల పర్వం : శ్రీకాకుళం జిల్లాలో చెరువుల ఆక్రమణలకు అంతే లేదు. ఎచ్చెర్లనియోజకరవ్గంలో చిన్న, పెద్ద చెరువులు 1200కుపైగా ఉంటే దాదాపు వెయ్యి చెరువులు ఆక్రమణల్లోనే ఉన్నాయి. లావేరు మండలంలో చిట్టగెడ్డ, ఆదపాక, బుడుమూరు, పెద్దగడ్డలను ఆనుకుని జాతీయ రహదారి ఉంది. ఇక్కడ ఎకరా భూమి ధరలు ఆకాశన్నంటుతున్నాయి. ఇదే అదునుగా కొందరు చెరువును చదును చేసి ప్లాట్లు అమ్మేస్తున్నారు. అధికార పార్టీ ఆక్రమణల పర్వంలో ఇవి కొన్ని మాత్రమే. రాష్ట్రంలో ఏ నియోజకవర్గానికి వెళ్లినా, అధికార పార్టీ నేతలు వాళ్లవాళ్ల స్థాయికి తగినట్లు చెరువులు కప్పెట్టేశారు. అధికారం అండతో వ్యవసాయమో, వ్యాపారమో చేసుకుంటున్నారు.