Roger Federer Retirement : ప్రపంచ పురుషుల టెన్నిస్‌లో ఓ శకం ముగిసింది. తన అద్భుత ఆటతీరుతో, అసాధారణ ప్రదర్శనతో దాదాపు రెండున్నర దశాబ్దాల పాటు టెన్నిస్ ప్రపంచాన్ని ఉర్రూతలూగించిన వీరుడు రాకెట్‌ వదిలేయనున్నాడు. 24 ఏళ్ల పాటు సుదీర్ఘంగా సాగిన తన కెరీర్‌కు తెరదించుతూ.. 41 ఏళ్ల వయసులో రోజర్‌ ఫెదరర్ ప్రొఫెషనల్‌ టెన్నిస్‌కు వీడ్కోలు పలికాడు. 20 విజయాలతో పురుషుల సింగిల్స్‌లో అత్యధిక గ్రాండ్‌స్లామ్‌ టైటిళ్ల జాబితాలో మూడో స్థానంలో ఉన్న అతను గురువారం రిటైర్మెంట్‌ ప్రకటించాడు.
వచ్చే వారం లండన్‌లో జరిగే లేవర్‌ కప్‌ తనకు చివరి టోర్నీ అని వెల్లడించాడు. తన నిర్ణయాన్ని ప్రకటిస్తూ ట్విటర్‌లో నాలుగు పేజీల లేఖ పోస్టు చేశాడు. "ఇన్నేళ్లుగా టెన్నిస్ నాకిచ్చిన గొప్ప బహుమతి.. ఈ ప్రయాణంలో నేను కలిసిన వ్యక్తులే. నా స్నేహితులు, ప్రత్యర్థులు, అభిమానులు ఆటకు ప్రాణం పోశారు. మీ అందరితో ఓ వార్త పంచుకోవాలనుకుంటున్నా. గత మూడేళ్లుగా గాయాలు, శస్త్రచికిత్సలు నాకు సవాలు విసిరాయని మీకు తెలుసు.
తిరిగి పూర్తి స్థాయి పోటీతత్వంతో ఆటలోకి తిరిగొద్దామనుకున్నా. కానీ నా శరీరం సామర్థ్యం, పరిమితులు నాకు తెలుసు. అది నాకు ఆలస్యంగా ఓ సందేశం పంపింది. నాకిప్పుడు 41 ఏళ్లు. 24 ఏళ్లకు పైగా 1500 మ్యాచ్‌ల కంటే ఎక్కువ ఆడా. నా కల కంటే టెన్నిస్ నాకెంతో ఇచ్చింది. వచ్చే వారం లండన్‌లో ఆడే లేవర్‌ కప్‌ నా చివరి ఏటీపీ టోర్నీ. భవిష్యత్‌లో టెన్నిస్ ఆడతా. కానీ గ్రాండ్‌స్లామ్‌ లేదా టూర్ టోర్నీల్లో పాల్గొనను. ఇదో చేదు తీపి కలగలిసిన నిర్ణయం. నాతో ప్రతి నిమిషాన్ని గడిపిన నా భార్య మిర్కాకు ధన్యవాదాలు. గత 24 ఏళ్లు 24 గంటలుగా అనిపిస్తోంది. మరోవైపు పూర్తి జీవితాన్ని గడిపేశాననిపిస్తోంది" అని అందులో ఫెదరర్ పేర్కొన్నాడు.
నంబర్‌వన్‌ ఆటగాడిగా అయిదు సీజన్లను ముగించిన అతను.. గత కొన్నేళ్లుగా మోకాలి గాయం, శస్త్రచికిత్సలతో ఆటకు దూరమవుతూ వచ్చాడు. చివరగా 2021 వింబుల్డన్‌లో ఆడాడు. టెన్నిస్ క్రీడాకారిణి మిర్కాను పెళ్లాడిన ఫెదరర్‌కు నలుగురు (రెండు జతల కవలలు) పిల్లలున్నారు. 103 టూర్ స్థాయి టైటిళ్లు, సింగిల్స్‌లో 1,251 మ్యాచ్‌లతో జిమ్మీ కానర్స్‌ తర్వాత ఓపెన్‌ శకంలో ఈ ఘనతలు సాధించిన రెండో ఆటగాడిగా నిలిచాడు.
సొగసు చూడతరమా..
మనిషే కాదు.. ఆటా అందమే. ఫెదరర్ ప్రస్తావన రాగానే అభిమానుల్లో స్ఫురించేదిదే. టెన్నిస్ చరిత్రలో మేటి ఆటగాడెవరన్న దానిపై భిన్నాభిప్రాయాలుండొచ్చు. ఎవరు గొప్పన్న దానిపై ఏకాభిప్రాయం ఉండకపోవచ్చు. అత్యంత అందమైన, చూడముచ్చటైన ఆట ఎవరిదంటే మాత్రం చర్చ ఫెదరర్ దగ్గరే మొదలై ఫెదరర్ దగ్గరే ఆగిపోతుంది. వివాదానికి తావే లేదు. బోర్గ్‌, ఎమర్సన్‌, సంప్రాస్‌, నాదల్‌, జకోవిచ్‌ లాంటి స్టార్లు పోటీలో వెనుకే. తన కళాత్మక ఆటతో, హుందాతనంతో అభిమానుల మనసులపై అంత బలమైన ముద్ర వేశాడు రోజర్‌. దూకుడుకు అందాన్ని జోడించిన అతడి ఆటను చూడడానికి రెండు కళ్లూ చాలవు.
ఫెదరర్ ఓ చిత్రకారుడే..
కోర్టులో ఫెదరర్ ఓ చిత్రకారుడే. అంత అందంగా ఉంటుంది అతడు కదిలేతీరు. కనులకు ఇంపైన ఆటతో దాదాపు పాతికేళ్లు.. ప్రపంచ వ్యాప్తంగా అభిమానులను అలరించాడు ఫెదరర్. వేగం, నియంత్రణ, సహనం, చురుకుదనం.. ఇలా స్విస్‌ యోధుణ్ని దిగ్గజాన్ని చేసిన లక్షణాలెన్నో. అందరూ ఆడే షాట్లే అయినా ప్రతి షాట్లోనూ తనదైన శైలిని చొప్పించాడతడు. ఏ షాట్‌ అయినా అలవోకగా ఆడగల సామర్థ్యం అతడి సొంతం.
అయితే ఫెదరర్ అమ్ములపొదిలో ఎన్నో అస్త్రాలున్నా ముందు గుర్తొచ్చేది అతడి అద్వియతీమైన ఫోర్‌ హ్యాండే. ఏ పాత చిత్రాన్నో చూడండి ఫెదరర్ ఫోర్‌ హ్యాండ్‌తో మంత్ర ముగ్దుల్ని చేస్తూ కనిపిస్తాడు. ఏ పాత వీడియోనో చూడండి ఆ అనుభూతి రెట్టింపవుతుంది. చిరుతలా కదిలి ఎంత కచ్చితంగా, అలవోకగా షాట్‌ కొడతాడో! ప్రత్యర్థులు బెంబేలెత్తాల్సిందే. అతడి ఫోర్‌ హ్యాండ్‌ క్రాస్‌ కోర్టు షాటూ అంతే. అలా ఎన్నో విన్నర్లు కొట్టాడు.
సాధారణంగా ర్యాలీల సందర్భంగా డిఫెన్సివ్‌ షాట్‌గా దీన్ని ఆడతాడు. పదే పదే ప్రత్యర్థి బేస్‌లైన్‌ మూలకు ఆడుతూ చివరికి విన్నర్‌ కొడతాడు. ముఖ్యంగా స్లో మోషన్‌లో చూసినప్పుడు తన పాదాలను కోర్టుకు రెండు అంగుళాలు పైకి లేపుతూ.. మణికట్టును తిప్పుతూ అతడు ఆడే ఈ షాట్‌ ఎంత తృప్తినిస్తుందో మాటల్లో చెప్పలేం. స్లైస్‌, స్క్వాష్‌, ఇన్‌సైడ్‌ ఔట్‌, డ్రాప్‌ షాట్‌.. ఇలా ఫోర్‌ హ్యాండ్‌తో అతడు చేసే మాయలెన్నో.
కానీ ఎలా ఆడినా, ఎప్పుడు ఆడినా ఆ అందం మాత్రం పోదు. బహుశా బ్యాక్‌హ్యాండ్‌ ఫెదరర్ ప్రధాన బలం కాకపోవచ్చు. కానీ అందులోనూ విజయవంతమయ్యాడు ఫెదరర్. అతడు ఒంటి చేత్తో కొలిచినట్లుగా ఆడే బ్యాక్‌హ్యాండ్‌, ముఖ్యంగా క్రాస్‌కోర్టు షాట్‌ను చూసి తీరాల్సిందే. ఫెదరర్ పాయింట్‌ కోల్పోయినా అతడి బ్యాక్‌ హ్యాండ్‌ అభిమానులను కట్టిపడేస్తుంది.
ఇక సర్వీస్‌ ఫెదరర్ చేతిలో బ్రహ్మాస్త్రం. సగటున 195-200 కి.మీ వేగంతో సర్వీస్‌ చేసే అతడు.. కీలక సమయాల్లో ఏస్‌లు సంధించే తీరు అద్భుతం. అతడి సర్వీసులతో వైవిధ్యాని అర్థం చేసుకోవడం ప్రత్యర్థులకు చాలా కష్టం. కచ్చితంగా అనుకున్న చోట బంతిని కొట్టగల నైపుణ్యం అతడి సొంతం. ప్రత్యర్థులు అయోమయానికి గురికావడం చాలా సాధారణ విషయం.
కెరీర్‌లో మొత్తం 11478 ఏస్‌లు కొట్టాడు రోజర్‌. ఆడడమే కాదు.. ఆటలో ఎప్పుడూ సృజనాత్మకంగా ఉంటాడు ఫెదరర్. ప్రపంచానికి స్క్వాష్‌ షాట్‌ను పరిచయం చేసింది అతడే. అలాగే కాళ్ల మధ్య నుంచి షాట్‌ ఆడే తీరు, మునివేళ్ల దగ్గర బంతిని అందుకునే తీరు ఎంతగానో ఆకట్టుకుంది. షాట్లు ఆడేటప్పుడు చాలా మందిలా అరవకపోవడం కూడా అతడి ఆట అందాన్ని మరింత పెంచింది. 'ఫెదరర్ ఆట కదులుతున్న కవిత్వం' అన్న ఓ టెన్నిస్ పండితుడి మాట అక్షర సత్యం. మొత్తంగా ఫెదరర్ టెన్నిస్ చరిత్రలో అత్యంత పరిపూర్ణ ఆటగాడు.
"ఆహా.. ఏమా కెరీర్‌ ఫెదరర్. నీ శైలి ఆటతీరుతో మేం ప్రేమలో పడ్డాం. నెమ్మదిగా నీ టెన్నిస్ అలవాటుగా మారింది. అలవాట్లు ఎప్పటికీ రిటైరవ్వవు. అవి మనలో భాగంగానే ఉంటాయి. అద్భుతమైన జ్ఞాపకాలను ఇచ్చిన నీకు ధన్యవాదాలు"
- సచిన్‌ తెందూల్కర్
- 20
కెరీర్‌లో రోజర్‌ సాధించిన గ్రాండ్‌స్లామ్‌ టైటిళ్లు 20. అత్యధికంగా ఎనిమిది వింబుల్డన్‌ టైటిళ్లు గెలిచిన అతడు.. ఆరు ఆస్ట్రేలియన్‌ ఓపెన్‌, అయిదు యుఎస్‌ ఓపెన్‌, ఒకే ఒక్క ఫ్రెంచ్‌ ఓపెన్‌ నెగ్గాడు. 2012లో రోజర్‌ 17 గ్రాండ్‌స్లామ్‌ టైటిళ్లు సాధించే సమయానికి నాదల్‌ (10), జకోవిచ్‌ (5) అతడికి చాలా దూరంలో ఉన్నారు. ఆ తర్వాత మూడు ట్రోఫీలు గెలవడానికి సమయం తీసుకున్నాడు. 2018లో చివరిగా ఆస్ట్రేలియన్‌ ఓపెన్‌ రూపంలో ఫెదరర్ గ్రాండ్‌స్లామ్‌ టైటిల్‌ నెగ్గాడు. - 30
ఫెదరర్ ఆడిన గ్రాండ్‌స్లామ్‌ ఫైనల్స్‌. 43సార్లు సెమీస్‌, 52సార్లు క్వార్టర్స్‌ చేరాడు. - 103
గెలిచిన ఏటీపీ టైటిళ్లు. అత్యధిక ఏటీపీ ట్రోఫీల జాబితాలో రెండో స్థానంలో ఉన్నాడు. జిమ్మి కానర్స్‌ (109) ముందున్నాడు. - 310
ర్యాంకింగ్స్‌లో రోజర్‌ నంబర్‌వన్‌గా ఉన్న వారాలు. 2021లో జకోవిచ్‌ అధిగమించే వరకు అత్యధిక వారాలు నంబర్‌వన్‌గా ఉన్న రికార్డు అతడిదే. 2004లో తొలిసారి నంబర్‌వన్‌ అయిన అతడు. 2008 వరకు కొనసాగాడు. ఆ తర్వాత మరో మూడు దఫాలు (2009, 2012, 2018) ఈ ర్యాంకు దక్కించుకున్నాడు. పురుషుల్లో, మహిళల్లో కలిపి వరుసగా అత్యధిక వారాలు (237) నంబర్‌వన్‌గా నిలిచిన ఘనత రోజర్‌దే. పెద్ద వయస్కుడైన (36 ఏళ్లు) నంబర్‌వన్‌ కూడా అతడే. - 1
వింబుల్డన్‌, యుఎస్‌ ఓపెన్‌ను నాలుగేళ్లు (2004-2007) వరుసగా గెలిచిన ఏకైక ఆటగాడు. ఫెదరర్ ఖాతాలో రెండు ఒలింపిక్స్‌ పతకాలు ఉన్నాయి. 2008 బీజింగ్‌లో డబుల్స్‌ స్వర్ణం గెలిచిన అతడు.. 2012 లండన్‌ క్రీడల్లో సింగిల్స్‌ రజతం సాధించాడు.
ఇవీ చదవండి: 'ఆస్ట్రేలియా పిచ్‌లపై వాళ్లిద్దరు ఓపెనింగ్‌ చేస్తే బాగుంటుంది'
