ఐపీఎల్.. ఈ మెగాలీగ్కు ఉన్న క్రేజ్ గురించి ప్రత్యేకంగా చెప్పాల్సిన అవసరం లేదు. ప్రపంచంలోని చిన్న క్రికెటర్ల నుంచి మేటి క్రికెటర్ల వరకు ఈ మెగా టోర్నీలో ఆడేందుకు ఆసక్తి చూపుతుంటారు. ఈ లీగ్లో తమ సత్తా చాటాలని ఉవ్విళ్లూరుతుంటారు. ఈ టోర్నీ నిర్వహించే సమయంలో సొంత దేశంలో సిరీస్‌లు ఉన్నా.. ఇందులో ఆడేందుకు ఇంట్రెస్ట్ చూపుతుంటారు. ఇప్పుడి న్యూజిలాండ్ కెప్టెన్ విలియమ్సన్ కూడా అదే చేశాడు! ఐపీఎల్ కోసం.. అతడిని ఆ దేశ క్రికెట్ బోర్డు ముందే విడిచిపెట్టనుంది. ప్రస్తుతం శ్రీలంకతో జరుగుతున్న టెస్టు సిరీస్‌లో ఆడుతున్న విలియమ్సన్ వన్డేలకు అందుబాటులో ఉండట్లేదు. దీంతో ఆ వన్డే సిరీస్‌లో కివీస్ టీమ్కు టామ్ లాథమ్ కెప్టెన్గా వ్యవహరించనున్నాడు.
ఇకపోతే గతేడాది జరిగిన ఐపీఎల్ ఆక్షన్లో విలియమ్సన్ను.. గుజరాత్ టైటాన్స్ జట్టు రూ.2 కోట్లకు కొనుగోలు చేసింది. దీంతో మంచి ఫామ్‌లో ఉన్న అతడు.. ఇక ఐపీఎల్‌లో సత్తా చాటేందుకు ఎంతో ఆత్రుతగా ఉన్నాడు. న్యూజిలాండ్ జట్టు.. ఐపీఎల్ కోసం విలియమ్సన్తో పాటు డేవాన్ కాన్వే(చెన్నై సూపర్ కింగ్స్), టిమ్ సౌథీ(కోల్‌కతా నైట్ రైడర్స్), మిచెల్ సాంట్నర్ను(చెన్నై సూపర్ కింగ్స్) కూడా వదిలిపెట్టనున్నట్లు తెలుస్తోంది. ఇక వీరి స్థానంలో న్యూజిలాండ్ జట్టులో కొత్త యంగ్ ప్లేయర్లు ఆడనున్నారు. ఇప్పటికే లంకతో మూడు వన్డేల సిరీస్ కోసం చాడ్ బోవాస్, బెన్ లిస్టర్‌ను న్యూజిలాండ్ బోర్డ్ సెలెక్ట్ చేసింది. అలానే మార్చి 25న జరగనున్న తొలి వన్డే తర్వాత లోకీ ఫెర్గ్యూసన్(కోల్‌కతా నైట్ రైడర్స్), ఫిన్ అలెన్(రాయల్ ఛాలెంజర్స్ బెంగళూరు), గ్లెన్ ఫిలిప్(సన్‌రైజర్స్ హైదరాబాద్) కూడా ఐపీఎల్ కోసం భారత్‌కు చేరుకోనున్నారు.
ఈ విషయంపై న్యూజిలాండ్ కోచ్ గ్యారీ స్టెడ్ మాట్లాడుతూ... "జట్టులో ఎప్పుడూ కొత్త ప్లేయర్స్ ఉండటం మంచి వాతావరణాన్ని సృష్టిస్తుంది. అలాగే నిర్దిష్ట ఫార్మాట్‌లో ఆటగాళ్లకు అవకాశాలిచ్చి తీర్చిదిద్దడం ఎప్పుడూ ఉత్తేజకరంగా ఉంటుంది." అని పేర్కొన్నారు. కాగా, లంకతో జరిగిన తొలి టెస్టులో విలియమ్సన్(121 నాటౌట్‌; 194 బంతుల్లో 11×4, 1×6) అదిరిపోయే ప్రదర్శన చేశాడు. ఆఖరి బంతి వరకు పోరాడి న్యూజిలాండ్‌ను విజయతీరాలకు చేర్చాడు. అతడు అద్భుత సెంచరీ బాదటంతో.. ఈ మ్యాచ్లో శ్రీలంక రెండు వికెట్ల తేడాతో ఓడిపోయింది. దీంతో కివీస్ రెండు మ్యాచ్‌ల టెస్టు సిరీస్‌లో 1-0తో ఆధిక్యం సంపాదించింది. అలా ఈ మ్యాచ్లో కివీస్ గెలవడం.. లంక ఓడిపోవడం వల్ల ప్రపంచ టెస్టు ఛాంపియన్‌షిప్‌ ఫైనల్‌కు చేరేందుకు భారత్‌కు మార్గం సుగుమమైంది.
ఇదీ చూడండి: ఇక వన్డే సిరీస్ సమరం.. బరిలోకి డబుల్ సెంచరీ వీరులు.. ప్లేయింగ్ 11 ఇదే!
