IPL 2023 PBKS Vs RR : ఐపీఎల్ 16వ సీజన్లో భాగంగా పంజాబ్ కింగ్స్, రాజస్థాన్ రాయల్స్ మధ్య కీలకమైన మ్యాచ్ ఉత్కంఠగా సాగింది. పంజాబ్‌తో జరిగిన కీలక పోరులో రాజస్థాన్ నాలుగు వికెట్ల తేడాతో విజయం సాధించింది. 188 పరుగుల లక్ష్యంతో బరిలోకి దిగిన రాజస్థాన్ 19.4 ఓవర్లలో ఆరు వికెట్లను కోల్పోయి ఛేదించింది. ఇక 14 మ్యాచులు ఆడిన పంజాబ్ 6 విజయాలు, 8 ఓటములతో ఈ సీజన్ను ముగించింది. అటు రాజస్థాన్ 14 మ్యాచుల్లో 7 ఓటములు, 7 విజయాలతో 14 పాయింట్లతో పట్టికలో ఐదో స్థానంలో నిలిచి.. ప్లేఆఫ్స్‌ ఆశలు సజీవంగా ఉంచుకుంది. రాజస్థాన్ ప్లే ఆఫ్స్ రేసులో ఉన్నప్పటికీ.. బెంగళూరు, ముంబయి తమ చివరి మ్యాచ్లో ఓడితేనే ప్లేఆఫ్స్‌లోని నాలుగో బెర్తును ఖరారు చేసుకొనే అవకాశం ఉంది. బాధ్యతాయుత ఇన్నింగ్స్తో హాఫ్ సెంచరీ సాధించిన దేవదత్‌ పడిక్కల్‌కు 'ప్లేయర్‌ ఆఫ్ ది మ్యాచ్' అవార్డు దక్కింది.
ఛేదనలో రాజస్థాన్..
డేంజరస్ ఓపెనర్ జోస్ బట్లర్ (0) మరోసారి డకౌట్గా వెనుదిరిగాడు. అయినప్పటికీ.. ఆ ప్రభావం రాజస్థాన్ ఛేదనపై పడలేదంటే దానికి కారణం యశస్వి జైస్వాల్ (50), దేవదత్‌ పడిక్కల్‌ (51). వీరిద్దరూ అర్ధ సెంచరీలతో కదం తొక్కారు. ఈ జోడి రెండో వికెట్కు 73 పరుగులు జోడించింది. అయితే, పడిక్కల్‌తోపాటు సంజూ శాంసన్ (2) పెవిలియన్‌కు చేరడంతో ఇబ్బంది పడినట్లు అనిపించింది. కానీ, యశస్వితో కలిసి హెట్మయర్‌ (46) కీలక ఇన్నింగ్స్ ఆడాడు.
19వ ఓవర్‌లో హెట్మయర్‌ ఇచ్చిన క్యాచ్‌ను శిఖర్ ధావన్ అద్భుతంగా ఒడిసి పట్టాడు. అప్పటికే పంజాబ్‌కు చేయాల్సిన నష్టం చేసేశాడు హెట్మయర్‌. ఆఖరి ఓవర్‌లో 9 పరుగులు అవసరం కాగా.. ఇంపాక్ట్‌ ప్లేయర్‌గా వచ్చిన ధ్రువ్‌ జురెల్‌ (10 నాటౌట్) సిక్స్‌తో మ్యాచ్‌ను ముగించాడు. పంజాబ్ బౌలర్లలో రబాడా 2, సామ్ కరన్, అర్షదీప్, ఎలిస్, రాహుల్ చాహర్ తలో వికెట్ తీశారు.
అంతకుముందు టాస్ ఓడి బ్యాటింగ్కు దిగిన పంజాబ్ కింగ్స్ నిర్ణిత 20 ఓవర్లలో ఐదు వికెట్ల నష్టానికి 187 పరుగులు చేసింది. మొదటి ఓవర్లోనే ప్రభ్సిమ్రన్ సింగ్ను బౌల్ట్ పెవిలియన్ చేర్చాడు. తర్వాత కెప్టెన్ ధావన్(17) జంపా ఔట్చేయగా.. అథర్వ(19)ను నవదీప్ సైనీ వెనక్కి పంపాడు. మరోవైపు సైనీ బౌలింగ్లో, లివింగ్స్టన్(9) క్లీన్ బౌల్డయ్యాడు. దీంతో 6.3 ఓవర్లకు పంజాబ్ 50-4 తో కష్టాల్లో పడింది.
ఈ క్రమంలో క్రీజులోకి వచ్చిన జితేశ్ శర్మ(44)తో కలిసి సామ్కరన్(49) రాజస్థాన్కు మరో ఛాన్స్ ఇవ్వలేదు. వీరిద్దరూ ఐదో వికెట్కు 64 పరుగుల భాగస్వామ్యాన్ని నెలకొల్పారు. ఫామ్లో జితేశ్ను సైనీ ఔట్చేయగా.. చివర్లో షారుక్ ఖాన్ (23 బంతుల్లో 41: 4x4, 2x6 )తో ధనాధన్ ఇన్నింగ్స్ వల్ల పంజాబ్ ఆ మాత్రం స్కోర్ చేయగలిగింది. రాజస్థాన్ బౌలర్లలో నవదీప్ సైనీ 3, బౌల్ట్, జంపా తలో వికెట్ పడగొట్టారు.
