IPL 2023 MI vs CSK : ఐపీఎల్ 2023లో భాగంగా ముంబయి ఇండియన్స్, చెన్నై సూపర్ కింగ్స్ జట్ల మధ్య మ్యాచ్ జరిగింది. ముంబయి నిర్దేశించిన 140 పరుగుల లక్ష్యంతో బరిలోకి దిగిన చెన్నై 6 వికెట్ల తేడాతో ముంబయిపై విజయం సాధించింది. 17.4 ఓవర్లలో 4 వికెట్ల నష్టానికి ఛేసింగ్ పూర్తి చేసింది. మొదటి నుంచి చెన్నై జట్టు ఆధిపత్యం కనబర్చింది. ఓపెనర్లు రుతురాజ్ గైక్వాడ్ (30), డేవన్ కాన్వే (44) అదరగొట్టారు. అంబటి రాయుడు (12) తడబడగా.. అజింక్య రహానే (21) ఫర్వాలేదనిపించాడు. శివమ్ దుబే (26*), ధోనీ ( 2*)పరుగులు చేశాడు. ఇక, ముంబయి బౌలర్లలో పీయుశ్ చావ్లా రెండు వికెట్లు తీయగా.. ఆకాశ్ మధ్వల్, స్టబ్స్ ఒక వికెట్ పడగొట్టారు.
అంతకుముందు, టాస్ ఓడి మొదట బ్యాటింగ్ చేసిన ముంబయి జట్టు.. స్వల్ప స్కోరుకే వెనుదిరిగింది. నిర్ణీత 20 ఓవర్లలో 8 వికెట్ల నష్టానికి 139 పరగులు చేసింది. మొదటి నుంచి ముంబయి తడబడింది. ఓపెనర్లు కామెరూన్ గ్రీన్ (6), ఇషాన్ కిషన్ (7) పేలవ ప్రదర్శన చేశారు. ఆ తర్వాత వచ్చిన రోహిత్ (0) ఖాతా తెరవకుండానే వెనుదిరిగాడు. అనంతరం క్రీజులోకి దిగిన నేహల్ వధేరా (64) జట్టును కాపాడాడు. 8 ఫోర్లు ఒక సిక్స్తో చెలరేగిపోయాడు. అతడు ఔట్ అయిన తర్వాత సూర్య కుమార్ యూదవ్ (26), స్టబ్స్ (20) ఫర్వాలేదనిపించారు. టిమ్ డేవిడ్ (2), అర్షద్ ఖాన్ (1) జోఫ్రా ఆర్చర్ (3*), చావ్లా (2*) పరుగులు చేసి వెనుదిరిగారు. ఇక, చెన్నై బౌలర్లలో మతీశ పతిరణ (3) వికెట్లతో చెలరేగిపోయాడు. చాహర్, తుశార్ దేశ్పాండే రెండు చొప్పున వికెట్లు తీశారు. జడేజా ఒక వికెట్ పడగొట్టాడు.
13 ఏళ్ల తర్వాత ముంబయిపై విక్టరీ..
ఈ మ్యాచ్ మరో అద్భుతమైన ఘట్టానికి వేదికైంది. 13 సంవత్సరాల తర్వాత తన సొంత గడ్డలో ముంబయిపై చెన్నై సూపర్ కింగ్స్ విజయం సాధించింది. చెపాక్ స్టేడియం వేదికగా 2010లో ముంబయిపై చెన్నై విజయం సాధించింది. ఆ తర్వాత నుంచి హోమ్ గ్రౌండ్లో ముంబయి ఆధిపత్యం కనబర్చింది.
రోహిత్ చెత్త రికార్డు..
ఈ మ్యాచ్లో ముంబయి ఇండియన్స్ కెప్టెన్ రోహిత్ శర్మ చెత్త రికార్డు నమోదు చేశాడు. ఇప్పటివరకు 16 సార్లు సున్నా పరుగులకే ఔట్ అయి.. ఐపీఎల్ చరిత్రలోనే అత్యధిక సార్లు డకౌట్ అయిన ప్లేయర్గా రికార్డు నమోదు చేశాడు. దీంతో పాటు ఐపీఎల్లో అత్యధిక సార్లు డకౌటైన కెప్టెన్గా కూడా రికార్డుకెక్కాడు. ఈ జాబితాలో రోహిత్ తర్వాతి స్థానాల్లో 15 డకౌట్లతో సునీల్ నరైన్, మన్దీప్ సింగ్, దినేశ్ కార్తిక్.. 14 డకౌట్లతో అంబటి రాయుడు ఉన్నారు. ఇంతే కాకుండా రోహిత్ ఫామ్ కూడా ఆందోళనకరంగానే ఉంది. గత నాలుగు మ్యాచ్ల్లో కలిపి కేవలం ఐదు పరుగులు మాత్రమే చేశాడు.
