IPL 2022 Social Media: రెండు నెలల పాటు క్రికెట్‌ ప్రేమికులను ఉర్రూతలూగించిన ఐపీఎల్ 15వ సీజన్లో గుజరాత్ టైటాన్స్ జట్టు విజేతగా నిలిచింది. లీగ్లో అడుగుపెట్టిన తొలి సీజన్లోనే ఫైనల్ చేరి అందరినీ ఆశ్చర్యానికి గురిచేసిన గుజరాత్.. అదే ఊపులో అద్భుతంగా ఆడి కప్పును కూడా కొట్టేసింది. ఆరంభ సీజన్లో టైటిల్ గెలిచాక ఇంత కాలానికి మళ్లీ ఫైనల్లో అడుగుపెట్టిన రాజస్థాన్ రాయల్స్కు నిరాశ ఎదురైంది.
అయితే హార్దిక్ పాండ్య సారథ్యంలో గుజరాత్ టైటాన్స్ జట్టు.. టైటిల్ను గెలుచుకుంది కానీ నెటిజన్ల హృదయాలను మాత్రం గెలుచుకోలేకపోయింది. అనూహ్యంగా ప్లేఆఫ్స్ చేరిన బెంగళూరు జట్టు.. క్వాలిఫయర్- 2 మ్యాచ్లో రాజస్థాన్ రాయల్స్ చేతిలో ఓటమిపాలై ఫ్యాన్స్ను నిరాశపరిచింది. కానీ, ట్విట్టర్లో మాత్రం అత్యంత ప్రజాదరణ పొందిన జట్టుగా నిలిచింది. అది తెలుసుకున్న అభిమానులు ఫుల్ హ్యాపీగా ఫీలవుతున్నారు. ట్విట్టర్లో ఆర్సీబీ జట్టుతో పాటు ఆ టీమ్ మాజీ సారథి విరాట్ కోహ్లీ గురించి నెటిజన్లు ఎక్కువగా చర్చించుకున్నారని ట్విట్టర్ అధికారికంగా వెల్లడించింది.
2022 ఐపీఎల్ సీజన్లో ఆర్సీబీపై అత్యధికంగా ట్వీట్లు చేశారు నెటిజన్లు. బెంగళూరు తర్వాత స్థానాల్లో చెన్నై సూపర్ కింగ్స్, ముంబయి ఇండియన్స్, కోల్కతా నైట్ రైడర్స్, రాజస్థాన్ రాయల్స్ జట్లు నిలిచాయి. ఇక, నెటిజన్లు ఎక్కువగా చర్చించుకున్న ఆటగాళ్లలో మొదటి స్థానంలో విరాట్ కోహ్లీ నిలవగా, తర్వాత స్థానాల్లో రోహిత్ శర్మ, రవీంద్ర జడేజా, డుప్లెసిస్ ఉన్నారు. కరోనా ఆంక్షల దృష్ట్యా ఆర్సీబీ.. బెంగళూరులో ఒక్క మ్యాచ్ కూడా ఆడకపోయినప్పటికీ పూర్తి మద్దతుగా నిలిచారు అభిమానులు. వాంఖడే, ఈడెన్ గార్డెన్స్ వంటి మైదానాల్లో మ్యాచ్ జరుగుతున్నంతసేపు విరాట్ కోహ్లీ, ఆర్సీబీ అంటూ అరుస్తూ తమ ఆనందాన్ని వెలిబుచ్చారు. దీని బట్టి చూస్తే ఆర్సీబీకి ఎంత ఫాలోయింగ్ ఉందో తెలుస్తోంది.
ఇవీ చదవండి: 'పతకాలతోనే మాట్లాడతా'.. డెఫ్‌లింపిక్స్‌లో చరిత్ర సృష్టించిన షూటర్ శ్రీకాంత్
ధోనీ వల్ల రిటైరవ్వాలనుకున్నా.. సచిన్ మధ్యలో వచ్చి..: సెహ్వాగ్
