ఐసీసీ టీ20 వరల్డ్ కప్ షెడ్యూల్ రిలీజ్​.. ఫైనల్​కు స్పెషల్ గెస్ట్​గా మిథాలీ రాజ్

దక్షిణాఫ్రికా వేదికగా జరగనున్న ఐసీసీ మహిళల టీ20 వరల్డ్ కప్ షెడ్యూల్​ విడుదలైంది. తొలి మ్యాచ్​ సౌతాఫ్రికా, శ్రీలంక మధ్య జరగనుంది. అయితే ఫిబ్రవరి 26న జరగనున్న ఫైనల్​ మ్యాచ్​కు భారత మహిళల క్రికెట్​ జట్టు మాజీ కెప్టెన్​​ మిథాలీ రాజ్​ స్పెషల్​ గెస్ట్​గా హాజరుకానుంది.

Women T20 World Cup Schedule: ఐసీసీ మహిళల టీ20 వరల్డ్ కప్ షెడ్యూల్ వచ్చేసింది. సోమవారం రాత్రి ఐసీసీ.. తన వెబ్​సైట్​లో పూర్తి షెడ్యూల్​ను విడుదల చేసింది. దక్షిణాఫ్రికా వేదికగా ఈ టోర్నీ జరగబోతుంది. వచ్చే ఏడాది ఫిబ్రవరి 10న న్యూలాండ్స్‌లో తొలి మ్యాచ్‌ దక్షిణాఫ్రికా, శ్రీలంక మధ్య జరగనుంది. మొత్తం టాప్ 10 జట్లు టోర్నీలో తలపడనున్నాయి.

15 రోజుల పాటు కేప్​ టౌన్, పార్ల్, జెబెర్హా వేదికలుగా 23 మ్యాచ్‌లు జరగనున్నాయి. ఈ మ్యాచ్ టికెట్ల విక్రయాలు ప్రారంభం అవుతున్నట్లు కూడా ఐసీసీ పేర్కొంది. టిక్కెట్ల ధరలు 60 ర్యాండ్లు (275 రూపాయలు) నుంచి ప్రారంభమవుతాయని, ఆరేళ్లలోపు పిల్లలకు ఫ్రీ టికెట్ అని ఐసీసీ చెప్పింది.

ఫిబ్రవరి 26న న్యూలాండ్స్ క్రికెట్ గ్రౌండ్‌లో ఫైనల్ మ్యాచ్ జరగనుంది. ఆఫ్రికన్ వేడుకలతో ఫైనల్​ను ప్రత్యేకంగా నిర్వహించడానికి ఐసీసీ ప్లాన్ చేస్తోంది. ఈ మ్యాచ్​కు భారత మహిళల జట్టు మాజీ కెప్టెన్​ మిథాలీ రాజ్.. ప్రత్యేక అతిథిగా రానునట్లు పేర్కొంది.