టీ20ల్లో సెంచరీ చేయడానికే క్రికెటర్లు శ్రమిస్తుంటారు. అలాంటిది డబుల్ సెంచరీ చేయాలంటే ఎలా. కానీ ఆ ఘనత ఓ క్రికెటర్కు సాధ్యమవుతుందని చెబుతున్నాడు ఆస్ట్రేలియా స్పిన్నర్ బ్రాడ్ హాగ్. ఆ ఘనత సాధించే వీలున్న ఆటగాడు మరెవరో కాదు టీమిండియా ఓపెనర్ రోహిత్ శర్మ.
"ఇప్పుడున్న క్రికెటర్లలో రోహిత్ శర్మకు మాత్రమే టీ20ల్లో డబుల్ సెంచరీ సాధించే సత్తా ఉంది. బంతిని టైమింగ్తో బాదడం, మంచి స్ట్రయిక్ రేట్, మైదానం నలువైపులా సిక్సులు కొట్టగల సామర్థ్యం అతడి సొంతం."
-బ్రాడ్ హాగ్, ఆస్ట్రేలియా స్పిన్నర్
సెప్టెంబర్ 2007లో డర్బన్ వేదికగా ఇంగ్లాండ్తో జరిగిన మ్యాచ్తో రోహిత్ శర్మ టీ20 అరంగేట్రం చేశాడు. ఇప్పటివరకు 94 టీ20లు ఆడిన హిట్మ్యాన్ 137.68 స్ట్రయిక్ రేట్తో 2,331 పరుగులు చేశాడు. ఇందులో నాలుగు సెంచరీలు, 16 అర్ధసెంచరీలు ఉన్నాయి. అలాగే వన్డేల్లో మూడు డబుల్ సెంచరీలు సాధంచిన ఏకైక క్రికెటర్గా రికార్డులకెక్కాడు రోహిత్. వన్డేల్లో అత్యధిక స్కోర్ 264 ఇతడి పేరిటే ఉంది.
2018లో జింబాబ్వేతో జరిగిన టీ20లో ఆస్ట్రేలియా ఆటగాడు ఆరోన్ ఫించ్ 76 బంతుల్లో 172 పరుగులు చేశాడు. అంతర్జాతీయ టీ20ల్లో ఇప్పటివరకు ఇదే అత్యధికం. డబుల్ సెంచరీకి చాలా సమీపంగా వచ్చినా ఆ ఘనతను సాధించలేకపోయాడు.
ఐపీఎల్ -2013లో బెంగళూర్ రాయల్ ఛాలెంజర్స్ ఆటగాడు క్రిస్ గేల్ 66 బంతుల్లోనే 175 పరుగులు చేశాడు. ఓవరాల్ టీ20ల్లో ఇదే ఇప్పటివరకు అత్యధికం.
