ఆస్ట్రేలియాతో జరుగుతోన్న వన్డే సిరీస్లో దారుణంగా విఫలమవుతోంది భారత జట్టు. ఆడిన రెండు వన్డేల్లోనూ ఓటమిపాలై సిరీస్ను చేజార్చుకుంది. దీంతో విరాట్ కోహ్లీ కెప్టెన్సీపైనా విమర్శలు వస్తున్నాయి. జట్టు కూర్పుపైనా పలువురు మాజీలు పెదవి విరుస్తున్నారు. మూడో వన్డేలోనైనా టీమ్ఇండియా మార్పులు చేస్తే బాగుంటుందని అభిప్రాయపడుతున్నారు. ఈ మ్యాచ్ కోసం భారత్ ఏ మార్పులు చేస్తే బాగుంటుందో ఓసారి చూద్దాం.
బ్యాటింగ్లో నో ఛేంజెస్!
దాదాపు ఇదే బ్యాటింగ్ లైనప్ను తరువాతి మ్యాచ్లోనూ కొనసాగిస్తే బాగుంటుందనేది విశ్లేషకుల మాట. 'ఒకవేళ మయాంక్ అగర్వాల్ను తప్పించాలని చూసినా అది ఎందుకూ ఉపయోగపడదు. అందువల్ల అతడికి మరో అవకాశం ఇవ్వడం మంచిదే. అలాగే కేఎల్ రాహుల్ను ఐదో స్థానంలోనే కొనసాగిస్తే బాగుంటుందనేది' మాజీల అభిప్రాయం.
పాండేకు అవకాశం?
రాహుల్తో ఓపెనింగ్ చేయించి మనీశ్ పాండేను మిడిలార్డర్లో ఆడిస్తే బాగుంటుందనే పలువురు అంటున్నారు. వ్యాఖ్యాత ఆకాశ్ చోప్రా కూడా ఇదే విషయమై మాట్లాడూతూ.. "కేవలం చివరి మ్యాచ్ కోసం పాండేను జట్టులోకి తీసుకుని.. రాహుల్ను ఓపెనింగ్ పంపడం సరైంది కాదు" అని తెలిపాడు. కానీ ఆ మార్పులు జరిగే అవకాశం లేకపోలేదని వెల్లడించాడు.
బౌలింగ్లో మార్పులు
ఈ మ్యాచ్లో నవదీప్ సైనీ, చాహల్ బదులు నటరాజన్, కుల్దీప్ యాదవ్కు అవకాశం ఇవ్వాలని అంటున్నారు మాజీలు. ఒకవేళ అవకాశం ఇస్తే వారు నిరూపించుకునే వీలు ఉంటుందని చెబుతున్నారు. అలాగే ఫిట్నెస్ సమస్యలు రానంతవరకు బుమ్రా, షమీని జట్టులో కొనసాగించాలని అభిప్రాయపడుతున్నారు.
