Pure Little Hearts Foundation: చిన్నపిల్లలకు సాయపడటంలో ఎప్పుడూ ముందుంటారు సూపర్స్టార్ మహేశ్బాబు. 'మహేశ్బాబు ఫౌండేషన్' ద్వారా ఇప్పటివరకు వేల మంది పేద పిల్లలకు ఉచితంగా హార్ట్ ఆపరేషన్లు చేయించి వారికి పునర్జన్మ ప్రసాదించారు. రెయిన్బో హాస్పిటల్స్, ఆంధ్రా హాస్పిటల్స్ భాగస్వామ్యంతో గతేడాది తన స్వగ్రామమైన బుర్రిపాలెంలో ప్రజలందిరికీ ఉచితంగా కొవిడ్ టీకాలు వేయించి తన దాతృత్వాన్ని చాటుకున్నారు.
తాజాగా.. మరో బృహత్తర కార్యక్రమానికి శ్రీకారం చుట్టారు మహేశ్. 'మహేశ్బాబు ఫౌండేషన్' 'రెయిన్బో చిల్డ్రన్స్ హార్ట్ ఇన్స్టిట్యూట్'(ఆర్సీహెచ్ఐ) భాగస్వామ్యంతో 'ప్యూర్ లిటిల్ హార్ట్స్ ఫౌండేషన్(పీఎల్హెచ్ఎఫ్)ను ఆవిష్కరించారు. ఈ ఫౌండేషన్లో భాగంగా.. గుండె సంబంధిత వ్యాధితో బాధపడుతున్న పేద పిల్లలకు ఉచితంగా చికిత్స అందించనున్నారు.
ఈ కార్యక్రమానికి ముఖ్య అతిథిగా విచ్చేసిన మహేశ్బాబు.. ఈ ఫౌండేషన్ను ప్రారంభించారు. అనంతరం మాట్లాడారు. "ఈ ప్యూర్ లిటిల్ హార్ట్స్ ఫౌండేషన్ను ప్రారంభించడం నాకు సంతోషంగా ఉంది. పిల్లలు ఎప్పుడూ నా మనసుకు దగ్గరగా ఉంటారు. చిన్న పిల్లల హృదయాలకు ఎక్కువ కేర్ తీసుకోవాలి." అని అన్నారు.
అంతేగాక 'హీల్ ఏ చైల్డ్' అనే సంస్థతోనూ మహేశ్బాబు ఫౌండేషన్ భాగస్వామ్యంతో ఉంది. అనారోగ్య సమస్యలతో బాధపడుతున్న పేద పిల్లలకు ఉచితంగా వైద్య సాయం అందిస్తోంది ఈ సంస్థ.
ఇదీ చూడండి: హాట్కేకుల్లా అమ్ముడుపోతున్న 'రాధేశ్యామ్', 'ఆర్ఆర్ఆర్' టికెట్లు
